NCP: 'बारामतीत भावकीची निवडणूक करणाऱ्यांना मी बघूनच घेतो..' अजितदादांचा सख्ख्या भावाला थेट इशारा?

'मित्रांनो, ही गावकीची आणि भावकीची निवडणूक नाही.. काही जणांनी ती भावकीची केलीए माझ्या भागात.. ते मी बघतो काय करायचं ते. पण गावकीची देखील नाही आणि भावकीची पण नाही..'

'खासदारकीला एक, आमदारकिला एक यापुढं असं अजिबात चालणार नाही. दोन्ही ठिकाणी घड्याळ चालवायचं आहे. प्रत्येकानं आपापला गाव बघा.. आधी तर भावकी सोबत आहे का, हे पण बघा.. अरे बाबा मला भावकीच माहितेय.' असं आवाहन अजित पवारांनी यावेळी केलं आहे.

मावळ लोकसभा शिंदेंच्या शिवसेनेला जाणार, अजित पवारांकडून घोषणा...

दरम्यान, मावळ लोकसभा ही शिंदेच्या शिवसेनेला जाणार हे आता समोर आलं आहे. कारण याच सभेत बोलताना अजित पवार यांनी त्याबाबत वक्तव्य केलं आहे. ते म्हणाले, 'तुमच्या पाहुण्या-रावळ्यांना सांगा... बारामतीत घड्याळ चालवा. पिंपरी आणि चिंचवडमध्ये धनुष्यबाण बटन दाबा... इथं (शिरुर) घड्याळ आणि पुण्यात कमळ चिन्ह दाबायला सांगा.'

मोदींना मत म्हणजे कमळ, धनुष्यबाण आणि घड्याळ...

'भोसरी, खडकवासला आणि हडपसरमध्ये आपल्याला पटवून द्यावं लागेल.  घड्याळ हे मोदींना पाठिंबा देण्यासाठी आहे. मोदी साहेबांना मत म्हणजे कमळ, धनुष्यबाण आणि घड्याळ.. हे ठणकावून सांगावं लागेल.' असंही अजित पवार यावेळी म्हणाले

'याच्यासारखा नालायक माणूस नाही..', श्रीनिवास पवारांनी केलेली अजितदादांवर जहरी टीका.. 

काही दिवसांपूर्वीच अजित पवार यांचे सख्खे बंधू श्रीनिवास पवार यांनी जहरी टीका केली होती. जी अजित पवार यांच्या चांगलीच जिव्हारी लागली आहे. यावेळी श्रीनिवास पवार म्हणाले होते की, 'तुम्हाला आश्चर्य वाटत असेल की, मी दादांच्या (अजित पवार) विरोधात कसा? मी नेहमी त्याला साथ दिली. चांगला काळ असेल, वाईट काळ असू दे, नेहमी दादांच्या (अजित पवार)बरोबर राहिलो. भाऊ म्हणून तो म्हणेल तशी मी उडी मारली. दादाची माझी चर्चा झाली, त्यावेळी मी त्याला म्हटलं की, आमदारकीला तू आहेस, तर खासदारकी साहेबांना दिली पाहिजे. कारण साहेबांचे आपल्यावर उपकार आहेत, हे तुम्हा सगळ्यांना माहिती आहे.'

हे ही वाचा>> बारामतीत जाऊन अजित पवारांना नालायक म्हणणारे 'श्रीनिवास पवार' आहेत तरी कोण?

'जमीन आपल्या नावावर केली म्हणून त्यांना घराबाहेर काढायचं नाही. ज्यांना कुणाला काही पदे मिळाली, ती साहेबांमुळे (शरद पवार) मिळाली. साहेबांना कीर्तन करा, घरी बसा म्हटलेलं मला काही पटलं नाही. मी वेगळा माणूस आहे. माझ्या शाळेतील मित्र मला न सांगता गेले. औषध विकत आणतो त्याला एक्सपायरी डेट असते. तशी नात्यांची देखील एक्सपायरी डेट असते. वाईट वाटून घ्यायचं नाही. मला दबून जगायचं नाही. जगायचं तर स्वाभिमानाने. जे लाभार्थी आहेत, त्यांच्यामागे जायचं मला वाटत नाही.'