Solapur Lok Sabha Election : "राम सातपुते दोन लाख मतांनी पडतील", जानकरांचं भाकित

सोलापूर लोकसभा मतदारसंघात प्रणिती शिंदेंना ही निवडणूक जड जाईल, अशी स्थिती निवडणूक जाहीर होण्यापूर्वी होती. मात्र, आता या मतदारसंघातील समीकरणे पूर्णपणे बदलून गेली आहेत. सोलापूर जिल्ह्याच्या राजकारणावर प्रभाव असलेल्या विजयसिंह मोहिते पाटील यांनीच भाजपला राम राम केल्याने माढा आणि सोलापूर मतदारसंघात भाजपला निवडणूक जड जाईल, असे राजकीय विश्लेषक सांगत आहेत. त्यात आता उत्तमराव जानकर यांनी राजकीय भविष्यवाणी केली आहे. 

उत्तमराव जानकर राम सातपुतेंबद्दल काय बोलले?

धैर्यशील मोहिते पाटील यांच्या प्रचार करताना उत्तमराव जानकर फिरत आहे. एका प्रचारसभेनंतर माध्यमांशी त्यांनी संवाद साधला. सोलापूरमध्ये काय स्थिती राहिल? असा प्रश्न जानकर यांना विचारण्यात आला. त्यावर जानकर म्हणाले की, "राम सातपुते दोनने (लाख) जातील. इथले (माढा लोकसभा मतदारसंघ) खासदार मात्र चारने (लाख) येतील."

हेही वाचा >> दोन नावांना मनसेचा विरोध, शिंदेंसमोर पेच?

महाविकास आघाडीचे किती उमेदवार निवडून येतील?

या प्रश्नाला उत्तर देताना उत्तमराव जानकर म्हणाले, "अजितदादांचा तर भोपळा दिसतोय, शिंदेंना दोन-तीन जागा दाखवत आहेत. पण, या राज्यातील वातावरण पाहिलं, तर निश्चितपणाने मला वाटत नाही की, या राज्यामध्ये दुसरं कुणाचं काही येईल. महाविकास आघाडी ताकदीने आणि 40 प्लस (४० पेक्षा जास्त जागा) येईल असं माझं मत आहे."

हेही वाचा >> 'तोंड दाखवायला जागा राहणार नाही, सगळंच बाहेर काढेन', शिंदेंचा ठाकरेंना इशारा

'अजित पवार, एकनाथ शिंदे चायना माल' 

अजित पवार आणि एकनाथ शिंदेंची उत्तम जानकर यांनी खिल्ली उडवली. ते म्हणाले, "अॅपलचे मोबाईल समजून फडणवीसांनी यांना (एकनाथ शिंदे, अजित पवार) घेतलं, ते चायना निघाले. मी एक चायना मोबाईल घेतला होता. त्यावेळी त्यांना गॅरंटी मागितली होती. त्या मोबाईल दुकानदाराने मला सांगितलं होतं की, चायना मालाची गॅरंटी नसते. हे चले तो चाँद तक, नही तो रात तक. अशी या अजित पवार, एकनाथ शिंदेंचं आहे, हे सर्वेक्षणावरून दिसून येत आहे."