Online Game मध्ये पालकांचे ४० हजार उडवले, आईने ओरडल्यानंतर अल्पवयीन मुलाची आत्महत्या

पोलिसांनी दिलेल्या माहितीनुसार ही घटना घडली त्यावेळी मुलगा आणि त्याची बहिण घरात एकटी होती. आई कामावर असताना तिला मोबाईलवर आपल्या खात्यामधून दीड हजार रुपये कट झाल्याचा मेसेज आला. यानंतर मुलाच्या आईने त्याला फोन करत याबद्दल विचारणा केली. ज्यानंतर मुलानेही आपण दीड हजार रुपये वापरल्याचं सांगितलं. हे समजताच मुलाच्या आईने त्याला चांगलीच समज दिली. या घटनेनंतर मुलाने आपल्या खोलीत जाऊन पंख्याला गळफास घेत आपलं जीवन संपवलं.

या घटनेचा तपास करायला आलेल्या पोलिसांना मुलाने लिहून ठेवलेली एक सुसाईड नोट सापडली. ज्यात त्याने पालकाचे ४० हजार रुपये ऑनलाईन गेमिंगवर उडवल्याचं कबूल केलं. पोस्टमार्टम झाल्यानंतर मुलाचा मृतदेह त्याच्या पालकांच्या ताब्यात सोपवण्यात आला आहे. पोलीस या घटनेचा तपास करत आहेत. मुलाने ४० हजारांऐवढी मोठी रक्कम ही स्वतःहून खर्च केली की त्याला असं करायला कोणी भाग पाडत होतं याचा शोध सध्या घेतला जात आहे.