Andheri By Poll : विजयानंतर ऋतुजा लटकेंची पहिली प्रतिक्रिया, म्हणाल्या..

काय म्हटलं आहे ऋतुजा लटके यांनी?

आज या निवडणुकीत जो विजय झाला तो माझा नसून माझे पती रमेश लटके यांचा विजय आहे असं मी मानते. रमेश लटके यांनी हयात असताना जी जनसेवा केली, लोकांची कामं मार्गी लावली त्यामुळेच त्याचंच रूपांतर हे आजच्या विजयात झालं आहे असं मी मानते. मतदारांनी त्याचीच परफेड केली आहे असं मला वाटतं.

भाजपने उमेदवारी मागे घेतली पण नोटा निवडा हे सांगण्यात येत होतं. त्याच्या क्लिप्सही आल्या होत्या. मतदारांनी बऱ्याच प्रमाणात नोटावर मतदान केलं आहे. ते का? याचं कारण हे लोकांना, मतदारांनाच विचारलं पाहिजे असं लटके यांनी म्हटलं आहे.

मातोश्रीवर जाऊन आशीर्वाद घेणार

मी सगळ्या मतदारांचे आभार मानते. लोकांची मला साथ आहे त्यामुळेच मी निवडून आले. शिवसेना पक्षप्रमुख उद्धव ठाकरे यांच्या आशीर्वादाने मी निवडून आले त्यांचे मी आभार मानते असंही ऋतुजा लटके यांनी म्हटलं आहे. मी आता मातोश्रीवर जाणार आहे. महाविकास आघाडीच्या प्रत्येक कार्यकर्त्यांची आणि पदाधिकाऱ्यांची मी आभारी आहे असंही ऋतुजा लटके यांनी म्हटलं आहे. ही निवडणूक माझ्या पतीच्या जाण्यानंतर मला लढवावी लागली याची मला खंत वाटते आहे असंही म्हणत ऋतुजा लटकेंनी त्यांच्या भावना बोलून दाखवल्या. आपल्याला संघर्ष करावा लागला. पक्षाला नवं नाव आणि चिन्ह मिळालं तरीही आपण ही निवडणूक जिंकली याचं समाधान आहे असंही ऋतुजा लटके यांनी म्हटलं आहे.

अंधेरी पूर्व विधानसभा पोटनिवडणूक निकाल : 19वी फेरी

ऋतुजा लटके – 66,247

बाळा नाडार – 1,506

मनोज नाईक – 888

मीना खेडेकर – 1,511

फरहान सय्यद – 1,087

मिलिंद कांबळे – 614

राजेश त्रिपाठी – 1,569

नोटा – 12,776

एकुण मतदान – 86,198