चंद्रकांत पाटील महाविकास आघाडीत येणार असल्याचं ऐकलं: उद्धव ठाकरे

चंद्रकांत पाटलांनी नेमकं काय वक्तव्य केलं होतं?

पुण्यातील एका कार्यक्रमाचं उद्घाटन हे माजी मंत्री चंद्रकांत पाटील यांच्या हस्ते करण्यात आलं. यावेळी सूत्रसंचालक सतत चंद्रकांत पाटील यांचा उल्लेख माजी मंत्री असाच करत होता. जेव्हा चंद्रकांत पाटील हे फित कापण्यासाठी आले तेव्हा ते त्या व्यक्तीला उद्देशून म्हणाले की, ‘माजी मंत्री म्हणून माझा उल्लेख करू नका. दोन-तीन दिवसात काय ते कळेल.’

दरम्यान, चंद्रकांत पाटील यांच्या याच वक्तव्यावरुन शिवसेना-भाजप एकत्र येणार का? अशी चर्चा सुरु झाली.

अशावेळी मुख्यमंत्री उद्धव ठाकरे यांनी देखील औरंगाबादमधील एका कार्यक्रमात भाजपचे केंद्रीय राज्यमंत्री रावसाहेब दानवे यांच्याकडे पाहून भावी सहकारी म्हणत या चर्चेला अधिकच हवा दिली. पण दुसरीकडे यानंतर झालेल्या पत्रकार परिषदेत त्यांनी चंद्रकांत पाटील यांना टोला देखील हाणाला.

मुख्यमंत्री नेमके काय म्हणाले?

‘माजी मंत्री म्हणून माझा उल्लेख करू नका. दोन-तीन दिवसात काय ते कळेल.’ असं चंद्रकांत पाटील यांनी वक्तव्य केलं आहे. त्यामुळे आपली याबाबत नेमकी काय भूमिका आहे? असा सवाल पत्रकारांनी मुख्यमंत्र्यांना विचारला.

पत्रकारांच्या या प्रश्नाला मुख्यमंत्री उद्धव ठाकरे यांनी थेट काहीही उत्तर देणं टाळलं. मात्र, आपल्या मिश्किल शैलीत मुख्यमंत्री ठाकरे असं म्हणाले की, ‘माझ्या कानावर असं आलं की, आमच्या तीन पक्षापैकी ते एकामध्ये येण्याचा विचार करतायेत.’ असं म्हणत मुख्यमंत्र्यांनी एक प्रकारे चंद्रकांत पाटलांची विकेटच काढली.

‘माजी मंत्री म्हणू नका… दोन-तीन दिवसात कळेल’ चंद्रकांत पाटील यांचं सूचक वक्तव्य

दरम्यान, राज्यातील राजकारणात मागील काही दिवसांपासून भाजप-शिवसेना एकत्र येणार असल्याच्या चर्चेने बराच जोर धरला आहे. अशावेळी मुख्यमंत्र्यांनी चंद्रकांत पाटलांच्या वक्तव्याची जरी खिल्ली उडवली असली तरीही पडद्यामागे अनेक गोष्टी घडत असल्याचं सध्या सूत्रांकडून समजतं आहे. त्यामुळे आगामी काळात काही मोठ्या राजकीय घडामोडी नक्कीच घडू शकतात असा अंदाज राजकीय विश्लेषकांकडून व्यक्त केला जात आहे.