फुकट ते पौष्टीक ! डिझेलची वाहतूक करणारा टँकर उलटला, स्थानिकांची डिझेल पळवण्यासाठी झुंबड

बारामती MIDC भागातून पाटसच्या दिशेने हा टँकर निघाला होता. परंतू काही किलोमीटर प्रवास केल्यानंतर हा टँकर एका ओढ्याजवळ उलटला आणि सगळं डिझेल हे ओढ्यात वहायला लागलं. स्थानिकांना या अपघाताची माहिती समजताच त्यांनी गर्दी केली. अपघातात जखमी झालेल्या चालक आणि क्लिनरची विचारपूस करायची सोडून सर्व नागरिक डिझेल मिळवण्यासाठी धडपड करत होते.

लहान मुलांपासून ते मोठ्यांपर्यंत सर्व लोकांनी मिळेल त्या साधनाचा वापर करुन यावेळी अपघातस्थळावरुन डिझेलवर डल्ला मारला. घरातील हंडे, बादल्या, ड्रम इतकच नव्हे तर तांब्यातूनही काही लोकं डिझेल भरुन घेऊन जात होती. अखेरीस पोलिसांना या घटनेची माहिती मिळताच त्यांनी घटनास्थळी पोहचत जमावाला पांगवलं. रात्री उशीरा क्रेनच्या सहाय्याने हा टँकर हटवण्यात आला.