Sanjay Singh arrested : ‘आप’च्या खासदाराला ईडीने केली अटक! प्रकरण काय?

दिल्लीतील दारू धोरण घोटाळ्याप्रकरणी अंमलबजावणी संचालनालयाने (ईडी) मोठी कारवाई केली आहे. ईडीने संजय सिंह यांना अटक केली. ईडीने बुधवारी ईडीने खासदार संजय सिंह यांच्या घरावर छापा टाकला होता. ईडी मद्य धोरण घोटाळ्यात मनी लाँड्रिंगचा तपास करत आहे. यामध्ये संजय सिंह यांचेही नाव आहे.

हेही वाचा >> देवेंद्र फडणवीसांच्या पत्रात पवारांनी काढल्या चुका, वाचा 2019 ची Inside Story

मिळालेल्या माहितीनुसार, ईडीने संजय सिंह यांची जवळपास 10 तास चौकशी केली होती. सध्या संजय सिंह त्यांच्या घरी हजर आहेत. चौकशीनंतर ईडीने संजय सिंह यांना अटक केली आहे. यानंतर निमलष्करी दलाचा बंदोबस्त वाढवण्यात आला आहे. आता ईडीचे अधिकारी संजय सिंह यांना ताब्यात घेणार आहेत. त्याचवेळी आम आदमी पक्षाचे कार्यकर्तेही संजय सिंह यांच्या घराबाहेर जमायला लागले आहेत.

संजय सिंह रात्रभर ईडीच्या मुख्यालयात राहणार

संजय सिंह यांना त्यांच्या निवासस्थानाच्या मागील गेटमधून बाहेर काढून त्यांना दिल्लीतील ईडीच्या मुख्यालयात नेण्यात येणार आहे. ते रात्रभर लॉकरमध्ये राहणार आहे. यानंतर सकाळी वैद्यकीय तपासणी करून त्यांना न्यायालयात हजर करण्यात येणार आहे. तेथे संजय सिंह यांच्या कोठडीची मागणी करण्यात येणार आहे.

राघव चढ्ढा म्हणाले, भाजपला विरोधकांना घाबरवायचे

आम आदमी पक्षाचे खासदार राघव चढ्ढा म्हणाले की, “हे राजकीयदृष्ट्या सुडबुद्धीने टाकलेलं पाऊल आहे. पुढील वर्षी होणाऱ्या निवडणुकीत भाजपचा पराभव होत आहे. यामुळे ते घाबरले आहे. ही नामुष्की ओढवली असून, भाजप घाबरून असे काम करत आहे. ईडीच्या छाप्यात एक पैसाही जप्त करण्यात आलेला नाही. कारण घोटाळा नसेल तर काय मिळणार? ही भाजपची शेवटची खेळी आहे, ज्याचा वापर करून भाजपला विरोधकांना घाबरवायचे आहे.”

हेही वाचा >> ‘अजित पवारांना युतीत घेतलं, कारण…’, फडणवीसांनी दिलं उत्तर

संजय सिंह यांच्या अडचणी कशा वाढल्या?

संजय सिंह यांच्या घरावर हा छापा अशा वेळी पडला जेव्हा एक दिवस आधी दिल्ली न्यायालयाने YSR खासदार श्रीनिवासुलू रेड्डी यांचा मुलगा राघव मागुंटा आणि व्यापारी दिनेश अरोरा यांना अबकारी धोरण घोटाळ्यातील मनी लाँड्रिंग प्रकरणात सरकारी साक्षीदार बनण्याची परवानगी दिली होती.

ईडीने आरोपपत्रात काय आरोप केले आहेत?

आरोपी दिनेश अरोरा हा या प्रकरणातील मुख्य दुवा मानला जात आहे. ईडीने आरोपपत्रात आरोप केला आहे की, दिनेश अरोरा यांनी दिल्लीचे मुख्यमंत्री अरविंद केजरीवाल यांची त्यांच्या निवासस्थानी भेट घेतली होती. या बैठकीला संजय सिंह देखील उपस्थित होते. दिनेश अरोरा यांनी चौकशीदरम्यान सांगितले होते की, एका कार्यक्रमात संजय सिंह यांची पहिली भेट झाली होती. यानंतर ते मनीष सिसोदिया यांच्या संपर्कात आले. सूत्रांचे म्हणणे आहे की, दिल्ली निवडणुकीपूर्वी आप नेत्याने आयोजित केलेला हा निधी उभारणीचा कार्यक्रम होता.

हेही वाचा >> OBC Politics Election 2024 : ओबीसी व्होट बँक राजकारणात किती मोठी गेमचेंजर?

आरोपपत्रानुसार, संजय सिंह यांच्या सांगण्यावरून, दिनेश अरोरा यांनी दिल्लीतील आगामी निवडणुकांसाठी पक्ष निधी गोळा करण्यासाठी अनेक रेस्टॉरंट मालकांशी चर्चा केली. एवढेच नाही तर ३२ लाखांचा धनादेशही त्यांनी सिसोदिया यांच्याकडे सुपूर्द केला. उत्पादन शुल्क विभागाकडे प्रलंबित असलेले दिनेश अरोरा यांचे एक प्रकरण संजय सिंह यांनी सोडवल्याचा आरोपही ईडीने केला आहे.