अनिल परब यांना ED ची नोटीस; संजय राऊतांचं ट्विट म्हणाले, ‘शाब्बास’

नारायण राणे यांच्या जनआशीर्वाद यात्रेची आज सांगता झाली. यात्रेनंतर शिवसेनेचे नेते संजय राऊत यांनी ट्विट करत संजय राऊत यांनी ट्विट करून अनिल परब यांना ईडीने नोटीस बजावली असल्याची माहिती दिली. तसेच केंद्र सरकारवर निशाणा साधला आहे.

काय म्हणाले संजय राऊत?

‘शाब्बास! जन आशीर्वाद जत्रेची सांगता होताच अपेक्षेप्रमाणे अनिल परब यांना ईडीची नोटीस बजावण्यात आली. वरचे सरकार कामाला लागले. भूकंपाचा केंद्रबिंदू रत्नागिरीत होता. परब हे रत्नागिरीचे पालकमंत्री आहेत. chronology कृपया समज लिजिये. कायदेशीर लढाई कायद्यानेच लढू… जय महाराष्ट्र’, असं राऊत यांनी म्हटलं आहे.

अनिल परब यांना मंगळवारी चौकशीसाठी बोलावण्यात आल्याची माहिती आहे. अनिल परब यांना शंभर कोटी वसुली प्रकरणात ही नोटीस बजावण्यात आली असल्याची माहिती समोर आली आहे.

किरीट सोमय्या म्हणतात…

अनिल परब यांना ईडीकडून नोटीस बजावण्यात आल्यानंतर भाजप नेते किरीट सोमय्यांनी सरकारवर निशाणा साधला. ‘ठाकरे सरकारमधील आणखी एका मंत्र्याला ईडीच्या समोर जावं लागणार आहे. सचिन वाझे १०० कोटींची वसुली करायचा. त्यात अनिल परबांचा वाटा किती होता? दापोलीत बंगला बांधला. तो पैसा कुठून आला. आता सगळं सांगावं लागणार आहे’, असं सोमय्यांनी म्हटलं आहे.

नारायण राणे यांना अटक करण्यासाठी दबाब?

जनआशीर्वाद यात्रा सुरू असतानाच नारायण राणे यांनी मुख्यमंत्र्यांबद्दल केलेल्या वक्तव्यावरून संतप्त पडसाद उमटले होते. या प्रकरणी राज्यात काही ठिकाणी गुन्हे दाखल झाले. त्याचबरोबर राणे यांना अटकही करण्यात आले होते. राणे यांना जामीन मिळालेला असून, राणे यांना अटक करण्यात आली. त्यादिवशीचा अनिल परब यांचा एक व्हिडीओ समोर आला होता.

या व्हिडीओचा हवाला देत भाजपने अनिल परब यांच्यावर आरोप केला होता. अनिल परब यांनी पोलीस अधिकाऱ्यांना अटक करण्यासाठी दबाब टाकला, असं भाजपनं म्हटलं होतं. तर अनिल परब हे रत्नागिरीचे पालकमंत्री असून, कायदा व सुव्यवस्थेसंबंधित आदेश पोलिसांना दिले असतील, असं शिवसेनेकडून सांगण्यात आलं होतं. मात्र, आता याचं प्रकरणावरून अनिल परब यांना ईडीची नोटीस बजावण्यात आली असल्याचं शिवसेनेनं म्हटलं आहे.