Kalyan : गांधारी पूल वाहतुकीसाठी सुरक्षीत, २० तासांनी पूल वाहनचालकांसाठी खुला

हा पूल वाहतुकीसाठी पुन्हा सुरु झाल्यामुळे नागरिकांना मोठ्या प्रमाणात दिलासा मिळाला आहे. गांधारी पुलाच्या खांबाला तडे गेल्याच्या प्राथमिक माहितीच्या आधारे काल रात्री १० वाजल्यापासून इथली वाहतुक पूर्णपणे बंद करण्यात आली होती. या पार्श्वभूमीवर आज दुपारी पीडब्ल्यूडीच्या अधिकाऱ्यांनी केलेल्या पाहणीत पुलाला कोणतेही तडे गेलेले नसून पुराच्या पाण्यात वाहून आलेल्या काळ्या कापडाने सर्व गोंधळ उडाल्याचे समोर आले.

PWD च्या अधिकाऱ्यांनी हिरवा कंदील दिल्यानंतर आज संध्याकाळी सव्वा सहा वाजण्याच्या सुमारास पुन्हा खुला करण्यात आल्याची माहिती ट्रॅफिक एसीपी उमेश माने पाटील यांनी दिली. तसेच वाहतुक बंद करण्यासाठी घालण्यात आलेले बॅरिकेट्सही तातडीने बाजूला करण्यात आले.

गांधारी पूल वाहतुकीसाठी सुरक्षित असून नागरिकांनी त्याचा वापर करण्याचे आवाहनही वाहतुक पोलिसांनी केले आहे. दरम्यान हा पूल वाहतुकीसाठी पुन्हा सुरू झाल्याने पुला पलीकडे राहणाऱ्या गावातील हजारो नागरिकांनी सुटकेचा निःश्वास सोडला आहे. पूल बंद असल्याने अनेकांना भिवंडीमार्गे लांबचा वळसा घालून ये-जा करावी लागली. मात्र पूल सुरू झाल्याचा आनंद त्यांच्या चेहऱ्यावर दिसून आला.