होम
विधानसभा 2024
राजकीय आखाडा
गुन्ह्यांची दुनिया
शहर-खबरबात
नॉलेज
बातम्या
स्पोर्ट्स
मनोरंजन
टॉपिक
महाराष्ट्रात आलेल्या तौकताई Tauktae चक्रीवादळाने हाहाकार माजवला. या वादळामुळे महाराष्ट्रात 18 जणांचा मृत्यू झाला आहे. तर 28 जण या वादळाच्या तडाख्यात जखमी झाले आहेत. मुंबईत वादळामुळे दोघांचा मृत्यू झाला तर 9 जण जखमी झाले आहेत. राज्यातल्या विविध 11 हजार ठिकाणी नुकसान झालं आहे. तर 10 हजार हेक्टर शेती क्षेत्र वादळामुळे बाधित झालं आहे. आत्तापर्यंत 13 हजार 500 जणांना सुरक्षित स्थळी हलवण्यात आलं आहे. हे चक्रीवादळ गुजरातकडे मार्गस्थ झालं असलं तरीही या वादळाचा महाराष्ट्राला मोठा फटका बसला आहे. आधीच कोरोनाचं संकट सहन करणाऱ्या राज्याला आता या वादळाच्या संकटाचाही सामना करावा लागला आहे.
ADVERTISEMENT
सोमवारी दिवसभरात काय काय घडलं?
सोसाट्याचा वारा सुटल्याने मुंबईतल्या घाटकोपर-विक्रोळीच्या दरम्यान लोकल ट्रेनवर झाडाच्या फांद्या पडल्या. त्यामुळे काही काळासाठी मुंबईची लोकल सेवा विस्कळीत झाली होती. सावधगिरीचा इशारा म्हणून काही ठिकाणी वाहतूक थांबवण्यात आली त्यानंतर पूर्ववत करण्यात आली .
मुंबई, ठाणे, रायगड, पालघर, रत्नागिरी, सिंधुदुर्ग या ठिकाणी सोसाट्याचा वारा आणि मुसळधार पाऊस यामुळे अनेक ठिकाणी झाडं उन्मळून पडण्याच्या घटना घटल्या. मुंबईतल्या गेट वे ऑफ इंडिया या सुप्रसिद्ध वास्तूजवळ असलेल्या रस्त्यांवरही पाणी जमा झालं होतं.
हवामान विभागाने महाराष्ट्रात ऑरेंज अलर्ट जारी केला आहे. चक्रीवादळ आणि वातावरणात अचानक झालेले बदल या सगळ्यासाठी राज्याच्या प्रमुख किनाऱ्यांवर एनडीएआरएफची पथकंही तैनात करण्यात आली. लोकांनी अकारण घराबाहेर पडू नये, पडलात तरीही समुद्राजवळ मुळीच जाऊ नये असाही इशारा देण्यात आला होता.
उत्तराखंडमध्ये हाय अलर्ट
हवामान विभागाने उत्तराखंडमध्येही 18 मे रोजी ऑरेंज अलर्ट जारी केला आहे. तसंच 19 आणि 20 मे या दोन दिवशी मुसळधार पाऊस कोसळेल असा अंदाज व्यक्त करत रेड अलर्टही दिला आहे. देहरादून, उत्तर काशी, चमौली, रूद्रप्रयाग आणि पिथौरगढ या ठिकाणी हा रेड अलर्ट देण्यात आला आहे.
ADVERTISEMENT
