खासदार नवनीत राणा यांना शिवसेनेच्या लेटरहेडवर जीवे मारण्याची धमकी

नवनीत राणा यांनी दिल्लीच्या नॉर्थ अव्हेन्यू पोलीस ठाण्यात यासंबंधीची तक्रार नोंदवली आहे. यामध्ये आरोप लावण्यात आला आहे की या परिसरात त्यांचं जे घर आहे तिथे हे पत्र फेकण्यात आलं. या पत्रामध्ये नवनीत राणा यांच्याबद्दल काही आक्षेपार्ह शब्दही वापरण्यात आले आहेत. याप्रकरणी पोलिसांनी आयपीसीच्या कलम 506 आणि 509 अंतर्गत तक्रार दाखल केली आहे आणि या प्रकरणाची चौकशी सुरू केली आहे.

मागील काही दिवसांपासून खासदार नवनीत राणा यांनी उद्धव ठाकरे सरकारवर टीका केली होती. शेतकऱ्यांच्या समस्या, वाढीव, वीजबिल या आणि अशा अनेक मुद्द्यांवर नवनीत राणा यांनी लोकसभेत बोलताना टीका केली होती. या पार्श्वभूमीवर आता नवनीत राणा यांना धमकीचं पत्र आलं आहे. या पत्रात नवनीत राणा यांच्या चेहऱ्यावर ऍसिड फेकण्याची धमकीही देण्यात आली आहे.