लॉकडाउनमुळे काम बंद, पैश्यांसाठी हॉटेलचे कुक बनले मोबाईल चोर

अटकेत असलेले तिन्ही आरोपी हे मुळचे दिल्लीचे असल्याचं कळतंय. लॉकडाउन काळात तिघांची ओळख झाली होती. या काळात तिघांनाही केरळमधील एका हॉटेलमध्ये कुकची नोकरी मिळाली होती. काही काळ केरळमध्ये काम केल्यानंतर दुसऱ्या लाटेचा सामना करत असताना सरकारने पुन्हा एकदा लॉकडाउनची घोषणा केली, आणि तिन्ही मित्रांचं काम बंद झालं. अखेरीस पैशाची चणचण दूर करण्यासाठी तिघांनीही हॉटेलजवळील मोबाईल दुकानात चोरी करण्याचं ठरवलं. चोरी करुन झाल्यानंतर हे मोबाईल मुंबईत विकण्याचा तिघांना बेत होता.

नीठरलेल्या प्लानप्रमाणे तिन्ही आरोपीं मोबाईलची चोरी करुन तीन वेगवेगळ्या बॅगमध्ये हा माल ठेवत मुंबईच्या दिशेने कूच केलं. केरळमध्ये पोलिसांनी या चोरीबद्दल गुन्हा दाखल करुन तपासाला सुरुवात केली. तपासात हॉटेलमध्ये काम करणाऱ्या तिघा कुकवर संशयाची सुई येऊन थांबली. हे तिन्ही आरोपी रेल्वेने केरळ सोडून गेल्याचं कळताच केरळ पोलिसांनी पनवेल रेल्वे पोलिसांना याबद्दल माहिती दिली. तिन्ही आरोपी प्रवास करत असलेली गाडी पनवेल स्थानकात येताच रेल्वे पोलिसांनी या आरोपींना मुद्देमालासह अटक केली असून सर्व चोरीचा माल ताब्यात घेतला आहे.