Narayan Rane येऊन गेल्यानंतर शिवसैनिकांकडून बाळासाहेबांच्या स्मारकाचं शुद्धीकरण

शुद्धीकरणानंतर स्थानिक शिवसैनिकांनी बाळासाहेबांच्या प्रतिमेला फुलं वाहून हार घालत धुपही ओवाळला. शिवसैनिकांच्या या कृत्यानंतर राज्यात पुन्हा एकदा नारायण राणे विरुद्ध शिवसेना हा वाद रंगण्याची चिन्ह दिसत आहेत. दरम्यान बाळासाहेबांच्या स्मारकाचं शुद्धीकरण करणाऱ्या स्थानिक शिवसैनिकांनी यावेळी नारायण राणेंवर जोरदार टीका केली.

आम्ही ठाकरे कुटुंबाबद्दल निष्ठा राखणारे शिवसैनिक आहोत. त्यांना आज शिवसेना दिसली. इतक्या वर्षात शिवसेना सोडून गेल्यानंतर त्यांना बाळासाहेब दिसले नव्हते. देशाच्या टॉप ५ मध्ये असणारे मुख्यमंत्री उद्धव ठाकरे यांना ते काहीही बोलत होते. त्यामुळे आम्ही हे सहन करू शकत नाही. म्हणून आम्ही हे शुद्धीकरण केलं आहे अशी प्रतिक्रीया शिवसेनेच्या कार्यकर्त्यांनी दिली. नारायण राणेंच्या येण्याने ही वास्तू अपवित्र झाल्याचा टोलाही शिवसैनिकांनी लगावला.

केंद्रीय मंत्री नारायण राणे जनआशिर्वाद यात्रेदरम्यान बाळासाहेब ठाकरे स्मृतीस्थळाला भेट देणार असल्याचं जाहीर झाल्यानंतर शिवसेनेतून त्याला विरोध करण्यात आला होता. खासदार विनायक राऊत यांनी राणेंना स्मृतीस्थळाच्या ठिकाणी पाऊल ठेऊ देणार नाही, अशी घोषणा देखील केली होती. मात्र, त्यानंतर वातावरण निवळलं आणि राणेंनी विनासायास स्मृतीस्थळावर जाऊन दर्शन घेतलं.

मराठी माणसासाठी शिवसेनेने काय केलं? Narayan Rane यांनी विचारला प्रश्न