उल्हासनगर : छोट्याश्या घरांमध्ये स्वॅब स्टिक्सचं पॅकिंग, व्हिडीओ सोशल मीडियावर व्हायरल

उल्हासनगरच्या ज्ञानेश्वर नगर भागातील काही घरांमध्ये महिला आणि लहान मुलं कोरोना चाचणीसाठी लागणाऱ्या स्वॅब टेस्टचं पॅकिंग करत असताना एक व्हिडीओ सकाळपासून सोशल मीडियावर व्हायरल झाला. स्टिक्सचं पॅकिंग करत असताना या घरांमध्ये स्वच्छता व इतर नियमाचं पालन होताना दिसत नव्हतं. उल्हासनगर महापालिकेला याबद्दल माहिती कळताच त्यांनी वैद्यकीय अधिकाऱ्यांसोबत पोलिसांच्या मदतीने धाड मारली. यावेळी घराघरांमध्ये जाऊन चौकशी केली असता स्टिक्सचा साठा पोलिसांना आढळला.

१० ते १५ घरांमध्ये या स्टिक्सचं पॅकिंग केलं जात असून एका घरात सुमारे ५ हजार स्टिक्स पॅक केल्या जात होत्या. दरम्यान या नागरिकांना इतक्या मोठ्या प्रमाणात स्टिक्सचं पॅकिंग करण्याची ऑर्डर कुठून मिळाली याचा तपास पोलीस अधिकारी घेत आहेत. याबाबत FDA ला लवकरच अहवाल पाठवण्यात येणार असून तपासाअंती दोषी व्यक्तींवर कारवाई केली जाईल अशी माहिती उल्हासनगर महानगरपालिकेचे जनसंपर्क अधिकारी युवराज भदाणे यांनी दिली.