IPL 2022 : लखनऊचा विजयरथ सुस्साट, हैदराबादच्या नशिबात दुसरा पराभव

सामन्यात पहिल्यांदा बॅटींग करणाऱ्या लखनऊ संघाची सुरुवात अडखळती झाली. वॉशिंग्टन सुंदरने क्विंटन डी-कॉक आणि एविन लुईस या दोघांनाही स्वस्तात माघारी धाडलं. यानंतर आलेला मनिष पांडेही फारसा प्रभाव पाडू शकला नाही. त्यामुळे लखनऊची अवस्था एका क्षणाला ३ बाद २७ अशी झाली होती. यानंतर लोकेश राहुल आणि दिपक हुडाने भागीदारी करत संघाचा डाव सावरला.

या दोन्ही फलंदाजांनी चौथ्या विकेटसाठी ८७ धावांची भागीदारी करत लखनऊला आव्हानात्मक धावसंख्या गाठून दिली. या दोघांनीही आपली अर्धशतकं पूर्ण करताना मैदानात चौफेर फटकेबाजी केली. दीपक हुडाला ५१ धावांवर आऊट करत हैदराबादने लखनऊची जमलेली जोडी फोडली.

यानंतर लोकेश राहुलने मझल्या फळीतल्या फलंदाजांसोबत फटकेबाजी सुरुव ठेवत लखनऊला १६९ धावांचा टप्पा गाठून दिला. लोकेश राहुलने ५० बॉलमध्ये ६८ धावा केल्या. हैदराबादकडून सुंदर, शेफर्ड आणि नटराजन यांनी प्रत्येकी २-२ विकेट घेतल्या.

प्रत्युत्तरादाखल हैदराबादने आपल्या डावाची सावध सुरुवात केली. आवेश खानने कर्णधार विल्यमसनला माघारी धाडत हैदराबादला पहिला धक्का दिला. परंतू यानंतर ठराविक अंतराने हैदराबादचे फलंदाज माघारी परतत राहिले. मोक्याच्या क्षणी मोठी भागीदारी करण्यात अपयश आल्यामुळे हैदराबादचा संघ पिछाडीवर पडला. राहुल त्रिपाठी आणि निकोलस पूरनने मधल्या ओव्हर्समध्ये फटकेबाजी करुन संघाला आशा निर्माण करुन दिली होती.

परंतू हे दोन्ही फलंदाज माघारी परतल्यानंतर हैदराबादचा संघ पुन्हा बॅकफूटला गेला. अखेरच्या ओव्हर्समध्ये फटकेबाजी करण्याच्या नादात विकेट फेकल्यामुळे लखनऊच्या संघाने सामन्यात बाजी मारली. लखनऊकडून आवेश खानने ४, जेसन होल्डरने ३ आणि कृणाल पांड्याने २ विकेट घेतल्या.

सचिन तेंडुलकर रमला जुन्या आठवणीत, शिवाजी पार्कच्या BEST बसमध्ये खास फोटोसेशन