PBKS vs GT : तेवतिया ठरला ‘बाजीगर’! दोन अवर्णनीय षटकार अन् पंजाबचा खेळ खल्लास

आयपीएलच्या १५व्या हंगामात प्रेक्षकांना रोमहर्षक सामना बघायला मिळाला. पंजाब किंग्ज आणि गुजरात टायटन्स यांच्या झालेल्या सामन्यात अखेरच्या दोन चेंडूंवर सामन्याचा निकालच बदलला. पंजाब किंग्जने गुजरात टायटन्ससमोर १९० धावांचं आव्हान ठेवलं होतं. या आव्हानाचा पाठलाग करताना गुजरात टायटन्सने २० षटकात यशस्वी पाठलाग केला.

१९० धावांच्या आव्हानाचा पाठलाग करताना गुजरातकडून सलामीला शुभमन गिल आणि मॅथ्यू वेड मैदानात आले. संघाची धावसंख्या ३२ असताना मॅथ्यू वेड बाद झाला. त्यानंतर पहिलाच सामना खेळत असलेल्या साई सुदर्शनने नेत्रदीपक खेळी करत सर्वाचं लक्ष वेधून घेतलं. गिल आणि सुदर्शनने दुसऱ्या गड्यासाठी १०१ धावांची भागीदारी केली.

सुदर्शन ३२ धावा करून बाद झाला. त्यानंतर कर्णधार हार्दिक पंड्या खेळण्यास आला. त्याचवेळी शतकाच्या उंबरठ्यावर असणारा शुभमन गिल झेलबाद झाला. गिलने ५९ चेंडूत ११ चौकार आणि एका षटकाराच्या मदतीने ९६ धावा केल्या. रबाडाने शुभमन गिलला तंबूचा रस्ता दाखवला.

अंतिम षटकातील थरार

गिल बाद झाल्यानंतर गुजरातला शेवटच्या षटकात विजयासाठी १९ धावांची गरज होती. पंजाबकडून शेवटचं षटक टाकण्यासाठी मयांकने चेंडू ओडियनच्या हाती दिला. ओडियनने पहिलाच चेंडू वाईड टाकला. त्यानंतरच्या चेंडूवर मिलर फटका मारण्यात अपयशी ठरला, पण रन पूर्ण करण्यासाठी धावाला. याच वेळी बेअरस्टोने २७ धावांवर खेळत असलेल्या हार्दिक पंड्याला धावबाद केलं.

हार्दिकनंतर राहुल तेवतियात खेळपट्टीवर आला. दुसऱ्या चेंडूवर तेवतियाने एक धाव काढली. त्यानंतर तिसऱ्या चेंडूवर मिलरने चौकार खेचला. त्यानंतर चौथ्या चेंडूवर ओव्हर थ्रो रन गुजरातला मिळाला. आता गुजरातला दोन चेंडूमध्ये १२ धावांची गरज होती. तेवतियाने ५ आणि ६ व्या चेंडूवर दोन उत्तुंग षटकार खेचत गुजरातला अविश्वसनीय विजय मिळवून दिला. तेवतियाने तीन चेंडूत नाबाद १३ धावा काढल्या.

पंजाबची खराब सुरूवात

नाणेफेक हरल्यानंतर प्रथम फंलदाजीस आलेल्या पंजाब किंग्जची सुरूवात निराशाजनक झाली. कर्णधार मयंक अग्रवाल ५ धावा करून बाद झाला. त्याचबरोबर जॉनी बेअरस्टोही ८ धावा करून तंबूत परतला. शिखर धवनने ३५ धावा केल्या, तर जितेश शर्माने २३ धावांचं योगदान दिलं. पंजाबकडून लिव्हिंगस्टोनने झटपट फलंदाजी करत अवघ्या २७ चेंडूत ६४ धावा फटकावल्या. शेवटच्या षटकात राहुल चाहरनेही २२ धावांची तुफानी खेळी केली. त्यामुळे पंजाबला २० षटकात ९ बाद १८९ धावांपर्यंत मजल मारता आली.