Salman Khan च्या घराबाहेर गोळीबार करणाऱ्या आरोपींचं रायगड कनेक्शन! 

या प्रकरणासंबंधित आता नुकतीच एक अपडेट समोर आली आहे. CCTV फुटेजमध्ये सलमान खानच्या मुंबईतील घराबाहेर गोळीबार करताना दिसलेल्या दोन आरोपींपैकी एक गुरुग्राम येथील असल्याचा संशय आहे. दिल्ली पोलिसांच्या सूत्रांनी रविवारी ही माहिती दिली. गोळीबारप्रकरणी मुंबई पोलिसांनी एफआयआरही नोंदवला आहे. पोलिसांनी सांगितले की, 'त्यांनी सलमानच्या घरापासून सुमारे एक किलोमीटर अंतरावर एक मोटरसायकल जप्त केली आहे आणि ती हल्लेखोरांनी वापरली असल्याचा संशय आहे.'

गोळीबार करणाऱ्या आरोपींचं रायगड कनेक्शन?

माहितीनुसार, हवेत गोळीबार करणाऱ्या आरोपींनी रायगडमधून जुनी दुचाकी खरेदी केली होती. हीच जुनी दुचाकी घेऊन आरोपींनी सलमानच्या घरापर्यंत प्रवास केला होता. या दुचाकीची विक्री करणाऱ्यांची पोलिसांकडून कसून चौकशी सुरू आहे. गोळीबारानंतर मुंबईबाहेर पळून जाण्याचा त्यांचा पूर्वनियोजित प्लॅन होता. आरोपींनी या घटनेनंतर ट्रेनने प्रवास केल्याचीही माहिती आहे.  

पोलीस अधिकारी या प्रकरणाबाबत काय म्हणाले?

वांद्रे पोलीस अधिकाऱ्यांच्या म्हणण्यानुसार, भारतीय दंड संहिता आणि शस्त्रास्त्र कायद्याच्या कलम 307 (हत्येचा प्रयत्न) अंतर्गत अज्ञात व्यक्तींविरुद्ध FIR नोंदवण्यात आला आहे. अधिकाऱ्यांनी सांगितले की, पहाटे 4.50 वाजता वांद्रे भागात असलेल्या गॅलेक्सी अपार्टमेंट्सच्या बाहेर दोन व्यक्तींनी 5 गोळ्या झाडल्या आणि तेथून पळ काढला. या इमारतीत अभिनेता सलमान खान राहतो. दिल्ली पोलिसांच्या एका अधिकृत सूत्राने सांगितले की, आरोपींपैकी एक गुरुग्रामचा असल्याचा संशय आहे, जो हरियाणातील अनेक खून आणि दरोड्याच्या प्रकरणात सामील आहे.

गँगस्टर लॉरेन्स बिश्नोईच्या भावाने घेतली गोळीबाराची जबाबदारी?

गँगस्टर लॉरेन्स बिश्नोई हा काळवीट हत्या प्रकरणानंतर सलमान खानला धमक्या देत आला आहे. यानंतर सलमान खानला पोलीस संरक्षणही देण्यात आले. आता रविवारी झालेल्या गोळीबारानंतर त्याच्या भावाचं नाव चर्चेत आलं आहे. अनमोल बिश्नोई याने या गोळीबाराची जबाबदारी घेतली आहे असं बोललं जातंय.

"हा फक्त एक ट्रेलर होता", अशी पोस्टही अनमोल बिश्नोईने सोशल मीडियावर केली आहे. तो तुरुंगात असलेल्या गँगस्टर लॉरेन्स बिश्नोईचा भाऊ आहे आणि पंजाबी गायक-राजकारणी सिद्धू मूसवाला याच्या हत्येचाही आरोपी आहे.

सलमान खानच्या घरावर हल्ला झाल्यानंतर पाच-सहा तासांनी ही पोस्ट शेअर करण्यात आली. पोस्टमध्ये अनमोलने पुढे म्हटले आहे की, 'सलमान खानला आमची ताकद दाखवण्यासाठी हा ट्रेलर होता. आता आमचा अंत पाहू नका. हा पहिला आणि शेवटचा इशारा आहे.'

सिद्धू मूसवाला हत्याकांडात आरोपी बनल्यानंतर अनमोल बिश्नोई अझरबैजानला पळून गेला होता. तो शेवटचा अमेरिकेत एका लग्नात दिसला होती.