सलमान रश्दी यांच्यावर जीवघेणा हल्ला, कट्टर पंथीयांच्या निशाण्यावर का आहेत रश्दी?

सलमान रश्दींवर न्यूयॉर्कमध्ये जीवघेणा हल्ला

सलमान रश्दी हे पुन्हा चर्चेत आले आहेत कारण त्यांच्यावर न्यूयॉर्कमध्ये हल्ला झाला. बुकर पुरस्कार मिळवणारे लेखक म्हणून ते सगळ्या जगाला परिचित आहेत. १९८१ मध्ये त्यांना पहिलं बुकर अवॉर्ड मिळालं त्यानंतर सलमान रश्दी यांना बुक ऑफ द बुकर्स असा किताब देऊनही गौरवण्यात आलं.

सलमान रश्दींवर न्यूयॉर्कमध्ये चाकू हल्ला झाला आहे. त्यांना रूग्णालयात दाखल करण्यात आलं असून त्यांच्यावर उपचार सुरू आहेत. सध्या ते मृत्यूशी झुंज देत आहेत असंही काही मीडिया रिपोर्ट्सवरून कळतं आहे. मात्र जिवे मारण्याची धमकी त्यांना यााधीही मिळाली होती.

द सॅटेनिक व्हर्सेस हे पुस्तक सलमान रश्दींचं वादग्रस्त पुस्तक ठरलं

द सॅटेनिक व्हर्सेस हे पुस्तक सलमान रश्दी यांनी लिहिलं. या पुस्तकामुळे त्यांच्याविषयी असे वाद निर्माण झाले जे वाद अजूनही त्यांच्या मानगुटीवर बसले आहेत. १९८० च्या दशकात त्यांना या पुस्तकामुळे पहिल्यांदा ठार मारलं जाण्याची धमकी इराणहून मिळाली होती. हे पुस्तक ईश्वर निंदा करणारं आणि इस्लाम विरोधी आहे असा कट्टरपंथियांचा आक्षेप आहे. १९८८ मध्ये या पुस्तकावर इराणमध्ये बंदी घालण्यात आली मात्र कट्टर पंथियांच्या निशाण्यावर सलमान रश्दी तेव्हापासूनच आहेत.