Ajit Pawar: अजितदादांचा 'हा' कोणता डाव?, बारामतीची जागा सेफ करण्यासाठी नवी खेळी?

बारामतीची जागा सेफ करण्यासाठी अजित पवारांची नवी खेळी?

बारामतीची जागा सेफ करण्यासाठी अजित पवार हे एखादी नवी रणनिती आखत आहेत का? याबाबत आपण सविस्तरपणे जाणून घेऊया.. 

अजित पवार यांनी काल (14 ऑगस्ट) एका मुलाखतीत म्हटलं की, त्यांनी सुप्रिया सुळेविरोधात आपल्या पत्नीला म्हणजेच सुनेत्रा पवार यांना उभं करणं ही त्यांची चूक होती.

हे ही वाचा>> Ajit Pawar: महाराष्ट्राच्या राजकारणातील सगळ्यात मोठी बातमी, अजितदादा मुलासाठी बारामती विधानसभा सोडणार?

त्यानंतर आज (15 ऑगस्ट) म्हणजे दुसऱ्याच दिवशी अजित पवारांचे पुत्र जय पवार यांना बारामतीमधून तिकीट देण्यात यावं अशी मागणी कार्यकर्त्यांनी केली आणि त्याला अजित पवार यांनी देखील एक प्रकारे पाठिंबा दिला. 

"मला त्यात फार रस नाही. कारण मी सात-आठ निवडणुकीत लढलो आहे. त्यासंदर्भात जनतेचा आणि कार्यकर्त्यांचा कौल कसा असेल, याबाबत पार्लमेंटरी बोर्डात नक्कीच विचार केला जाईल" असं म्हणत एकप्रकारे अजित पवार यांनीही बारामतीमधून ते लढण्यास उत्सुक नसल्याचे संकेत दिले आहेत. 

अजित पवार पुन्हा म्हणाले, 'कुटुंबाला त्रास झाला...' 

दरम्यान, त्यानंतर आज (15 ऑगस्ट) पुन्हा एकदा एएनआयला दिलेल्या मुलाखतीमध्ये देखील अजित पवारांनी आपल्या निर्णयाचा कुटुंबाला त्रास झाला असं म्हटलं.. 
 
'निवडणुकीनंतर मी विचार करत होतो की, हे कसं झालं.. काय झालं.. या सगळ्याला जबाबदार मी आहे.. मी कोणालाही दोष देणार नाही. मला असं वाटलं की, मी हे करायला नको होतं.. आणि तेच मी बोललो..' 

'सुनेत्रा पवारला सुप्रिया विरोधात उभं करणं हा कुटुंबाच्या दृष्टीने योग्य निर्णय नव्हता. कारण आम्ही कुटुंब म्हणून अनेक वर्षांपासून एकत्र आहोत. त्यामुळे माझ्या मनात आलं की, कुटुंबा-कुटुंबात एकमेकांविरोधात उभं राहिले.. यापैकी एक हरणार होता आणि एक जिंकणार होता. दोघेही कुटुंबातीलच होते. त्यामुळे कुटुंबातील इतर लोकांना त्रास होत होता. त्यामुळे मी मनात जे होतं ते म्हटलं. मी जे म्हटलं ते म्हटलं... ते मी मनापासून बोललो.' असं भावनिक वक्तव्य अजित पवार यांनी यावेळी केलं.

बारामतीची जागा सेफ करण्यासाठी अजितदादांचा नेमका प्लॅन काय? 

लोकसभा निवडणुकीच्या प्रचारादरम्यान अजित पवार म्हणाले होते की, ' 'माझी बारामतीकरांना विनंती आहे की, आम्ही ज्या उमेदवाराला खासदारकीसाठी उभं करू त्याला तुम्ही विजयी केलं पाहिजे. तर मी पुढे विधानसभेला उभा राहील. खरं सांगतो.. मी नाही तर खुशाल... तुम्ही जर मला साथच देणार नसतील तर मला प्रपंच आहे. मी कशाला यात पडू..' 

त्यामुळेच जेव्हा सुनेत्रा पवार यांचा पराभव झाल्यानंतर अनेकांनी विचारणा केली होती की, आता अजित पवार हे विधानसभा निवडणूक लढवणार की नाही? 

दरम्यान, आज (15 ऑगस्ट) अजित पवारांनी स्वत:च म्हटलं की, "मला त्यात फार रस नाही. कारण मी सात-आठ निवडणुकीत लढलो आहे.''

हे ही वाचा>> Ajit Pawar : शरद पवार अजित पवार एकत्र येणार का? 'दादां'चं मोठं विधान

अजित पवारांच्या याच विधानाचा असाही अर्थ लावला जात आहे की, सुनेत्रा पवार यांचा जो पराभव झाला त्यानंतर अजित पवार हे बारामतीतून विधानसभा लढवणार नाहीत. अशावेळी ते आपला कनिष्ठ पुत्र जय पवार यांना तिकीट देऊ शकतात. पण असं असलं तरी ती जागा सेफ करणं हे मोठं आव्हान अजित पवार यांच्यासमोर आहे. 

त्यामुळेच अजित पवार हे सध्या कौटुंबिक पातळीवर भावनिक विधान करत असल्याचं त्यांच्या विरोधकांकडून बोललं जात आहे. 

जर बारामतीत अजित पवार यांना किंवा त्यांच्या पक्षाला जर पुन्हा पराभवाचा फटका बसला तर त्याने कार्यकर्त्यांमध्ये चांगला संदेश जाणार नाही. यामुळेच आतापासून अजित पवारांनी बारामतीसाठी रणनिती आखण्यास सुरुवात केली असल्याचं बोललं जात आहे. 

शरद पवार कोणता हुकमी पत्ता खेळणार? 

एकीकडे अजित पवार हे आतापासूनच राजकीय डावपेच आखत असले तरी त्यांचे काका आणि राष्ट्रवादी काँग्रेस - शरदचंद्र पवार पक्षाचे अध्यक्ष शरद पवार हे देखील नक्कीच नवी रणनिती आखण्यात व्यस्त आहेत. 

मागील काही दिवसांपासून अजित पवार हे अत्यंत अॅक्टिव्ह झालेले आहेत. तर शरद पवार मात्र हे अत्यंत शांत असल्याचं दिसून येतंय. अशावेळी अगदी शेवटच्या क्षणी एखादा हुकमी पत्ता आणून अजित पवारांना अडचणीत आणू शकतात.

आतापर्यंत बारामती विधानसभा मतदारसंघामध्ये केवळ अजित पवार हे एकमेव आमदार होते जे सातत्याने निवडून येत होते. पण पक्षातील फुटीनंतर बारामतीची जागा आपल्याकडे खेचून आणण्यासाठी शरद पवार हे नक्कीच शर्थीचे प्रयत्न करू शकतात. जी अजित पवारांसाठी धोक्याची घंटा ठरू शकतात. कारण त्याचा प्रतत्य हा लोकसभा निवडणुकीत अजित पवारांना आलाच आहे. 

शरद पवार गटाकडून युगेंद्र पवार हे बारामती विधानसभा निवडणुकीच्या रिंगणात उतरण्याची दाट शक्यता आहे. त्यामुळे युगेंद्र पवार यांच्याविरोधात कोण उमेदवार द्यायचा हा अजित पवारांसमोर यक्ष प्रश्न असेल. 

पण पुन्हा पवार विरुद्ध पवार अशी निवडणूक बारामतीत होऊ नये यासाठी अजित पवार प्रयत्नशील असल्याचं आताच्या घडीला दिसतं आहे. त्यामुळेच आपली बारामतीची जागा सेफ करण्यासाठी अजित पवारांनी रणनिती आखण्यास सुरुवात केली आहे. त्यामुळे आता बारामतीकर पुन्हा एकदा कोणाच्या बाजुने उभे राहतात हे पाहणं महत्त्वाचं ठरणार आहे.