Tushar Kharat : भाजप मंत्री जयकुमार गोरेंना बिनधास्त नडलेले पत्रकार तुषार खरात कोण?

कोण आहे तुषार खरात?

तुषार खरात हे ‘लय भारी’ नावाच्या युट्यूब चॅनलचे संपादक असून, गेली अनेक वर्ष ते पत्रकार म्हणून काम करत आहेत. वेगवेगळ्या वृ्त्तसमुहांसोबत काम करताना, त्यांनी शिक्षण क्षेत्रातील घोटाळे आणि भ्रष्टाचार, मागासवर्गीय आणि ओबीसी समाजाच्या जमिनी बळकावण्याच्या घटना,  कोविड काळातील वैद्यकीय महाविद्यालयातील अनियमितता, महिलांवरील अन्याय, अशा घटनांचं वार्तांकण केलं होतं. यातली अनेक प्रकरणं चर्चेची ठरली होती.

हे ही वाचा >> Beed Crime: 'Walmik Karad ने एकदा नव्हे तर 6 वेळा...' धक्कादायक माहिती आली समोर, 'तो' जबाब जसाच्या तसा...

तुषार खरात हे माण-खटाव परिसरातील रहिवासी असून, एक चर्चेतले पत्रकार म्हणून ओळखले जातात. त्यांनी आपल्या ‘लय भारी’ या युट्यूब चॅनलच्या माध्यमातून स्थानिक पातळीवरील गैरप्रकार आणि सत्ताधाऱ्यांचे गैरउद्योग यावर नेहमीच भाष्य केलं आहे. पत्रकारितेमध्ये काम करत असातना, त्यांना अनेकदा धमक्या आणि दबाव आल्याचा दावा त्यांनी केला आहे.

अधिवेशनाच्या सुरूवातीलाच माध्यमांशी संवाद साधताना जयकुमार गोरे यांनी या प्रकरणावर आपली बाजू मांडली होती. त्यावेळी तुषार खरात आणि जयकुमार गोरे यांच्यातली खडाजंगी चांगलीच रंगली होती. जयकुमार गोरे यांना प्रश्न विचारतानाचा हा व्हिडीओ राज्यभर व्हायरल झाला होता. यावेळी कॅमेऱ्याच्या मागून प्रश्न विचारणारा पत्रकार म्हणजे तुषार खरात. 

स्थानिक प्रशासनाने त्यांच्यावर खोटे गुन्हे दाखल करून ही अटकेची कारवाई केल्याचा आरोप अनेकांनी केला असून, यामुळे स्वतंत्र पत्रकारितेवर दबाव टाकण्याचा प्रयत्न होत असल्याची टीका होत आहे.

ऑगस्टमध्ये त्यांच्यावर जमीन हडपणाऱ्या गुंडांकडून हल्ला झाल्याचीही माहिती आहे. तुषार खरात यांच्या समर्थकांनी त्यांच्या सुटकेसाठी आंदोलनाची तयारी सुरू केली असून, ही लढाई आता न्यायालयात आणि रस्त्यावरही लढली जाण्याची शक्यता आहे. या प्रकरणावर पुढील कायदेशीर कारवाई काय होते, याकडे सर्वांचे लक्ष लागले आहे.

तुषार खरात यांच्यावर काय आरोप? 

जयकुमार गोरे यांची बदनामी करणाऱ्या एकतर्फी बातम्या दाखवणे, न्यायालयाचा अवमान करणे अशा आरोपांखाली तुषार खरात यांना अटक करण्यात आली आहे. तुषार खरात यांच्यावर अॅट्रॉसिटी, खंडणी, बदनामी करणारे, विनयभंग अशा प्रकारचे गुन्हे दाखल केले आहेत. वडूज, दहवडी, म्हसवड, तलभीड, सोलापूर अशा अनेक ठिकाणी हे गुन्हे दाखल आहेत. 

हे ही वाचा >> संतोष देशमुखांच्या हत्येचा जिथे कट रचला, तिथल्या प्रत्यक्षदर्शीचा जबाब आला समोर, वाचून तुम्हीही जाल हादरून!

जयकुमार गोरेंकडून हक्कभंग...

जयकुमार गोरे यांनी 6 मार्चला स्वत: सभागृहात बोलताना सांगितलं की, 2017 साली जिल्हा न्यायालय साताऱ्यामध्ये दाखल प्रकरणाचा आधार घेऊन माझ्यावर बिनबुडाचे आरोप आणि अश्लाघ्य भाषा वापरली. त्यामुळे मला टीकेला तोंड द्यावं लागलं. सदर गुन्ह्यात न्यायालयाने मला निर्दोष सिद्ध केलं असून, पुरावे नष्ट करण्याचे आदेश दिले होते. 

जयकुमार गोरे यांनी असंही सांगितलं होतं की, न्यायालयाने या प्रकरणात आपल्याला निर्दोष मुक्त केलं होतं. तसंच एका युट्यूब चॅनलने दीड वर्षांपासून माझ्यावर टीका करण्याचं काम केल्याचं म्हटलं आहे. खालच्या पातळीवर जाऊन, माझ्यावर, पक्षावर आणि नेतृत्वावर टीका करण्याचं काम या चॅनलने केलं असं जयकुमार गोरे म्हणाले. जयकुमार गोरेंनी उल्लेख केलेले युट्यूब चॅनलचे ते पत्रकार म्हणजेच तुषार खरात आहेत. त्यामुळे आता या प्रकरणात काय कारवाई होणार हे पाहणं महत्वाचं असेल.