छोटा राजन अजुनही जिवंत ! एम्सच्या डॉक्टरांनी मृत्यूची बातमी फेटाळली

६१ वर्षीय राजन दिल्लीच्या तिहार जेलमध्ये कैदेत आहे. २०१५ साली छोटा राजनला इंडोनेशियामधून भारतात आणण्यात आलं होतं. बाली येथे राजनला अटक करण्यात आली होती, त्यानंतर CBI ने त्याला भारतात आणलं. राजनविरोधात सर्वाधिक गुन्हे महाराष्ट्रात दाखल असुनही त्याला मुंबईत आणण्यात आलं नाही. दाऊद विरुद्ध राजन यांच्यातील गँगवॉरच्या भीतीमुळे सीबीआयने त्याला दिल्लीच्या तिहार जेलमध्येच ठेवलं होतं.

अपहरण, हत्या आणि अशा अनेक गुन्ह्यांमध्ये छोटा राजनवर देशभरात ७० गुन्हे दाखल आहेत. मुंबईतील पत्रकार जे.डे. यांच्या हत्येप्रकरणी छोटा राजनला आजन्म कारावासाची शिक्षा सुनावण्यात आली होती. तिहार जेलमध्येच छोटा राजनवर व्हिडीओ कॉन्फरन्सिंगच्या माध्यमातून खटला चालवण्यात येत होता. २६ एप्रिल रोजी तिहार जेलमधील एका अधिकाऱ्याने छोटा राजन आज सुनावणीसाठी येणार नाही कारण त्याला कोरोनाची लागण झाली असल्याचं सांगितलं.