Nikhil Wagle: पुण्यात तुफान राडा, भाजपच्या कार्यकर्त्यांचा निखिल वागळेंवर हल्ला, कारच फोडली!

Nikhil Wagle: पुणे: पुण्यात एका कार्यक्रमासाठी गेलेल्या ज्येष्ठ पत्रकार निखिल वागळे यांच्यावर भाजप कार्यकर्त्यांनी हल्ला केल्याची धक्कादायक घटना घडली आहे. यावेळी आक्रमक झालेल्या कार्यकर्त्यांनी वागळेंची कारच फोडली. तसंच त्यांच्या गाडीवर शाईफेक देखील केली. (senior journalist nikhil wagle was attacked by bjp workers in pune his car was smashed)

ज्येष्ठ पत्रकार निखिल वागळे यांनी भाजपचे ज्येष्ठ नेते लालकृष्ण अडवाणी यांना भारतरत्न जाहीर केल्यानंतर एक वादग्रस्त ट्विट केलं होतं. याच विरोधात भाजप कार्यकर्त्यांनी निखिल वागळेंच्या कारवर तुफान हल्ला चढवला. 

पुण्यात नेमकं काय घडलं?

पुण्यात आज (9 फेब्रुवारी) राष्ट्रीय सेवा दलाच्या वतीने 'निर्भय बनो' या कार्यक्रमाचं आयोजन करण्यात आलं होतं. यासाठी निखिल वागळे यांना आमंत्रित करण्यात आलं होतं. पण हा कार्यक्रम उधळून लावू अशी धमकी पुण्यातील काही भाजप नेत्यांनी दिली होती. 

हे ही वाचा>> MOTN: नितीन गडकरी होणार मोदींचे उत्तराधिकारी, पण..

दरम्यान, पुण्यात आज दुपारपासून निखिल वागळेंवर भाजपने जोरदार आंदोलन सुरू होतं. मात्र, संध्याकाळी कार्यक्रमस्थळी निखिल वागळे यांची कार येताच भाजप कार्यकर्ते हे प्रचंड आक्रमक झाले आणि त्यांनी वागळेंच्या कारवर जोरदार हल्ला केला. एवढंच नव्हे तर शाईफेक देखील करण्यात आली. पुण्यात शास्त्री रोडवर महाविकास आघाडी आणि महायुतीचे कार्यकर्ते हे प्रचंड  आक्रमक झाले. त्यामुळे जेव्हा वागळेंची गाडी ही दांडेकर पूल चौकामध्ये आली तेव्हा अचानक निखिल वागळे यांच्या गाडीवर हल्ला करण्यात आला. 

अजित पवारांची प्रतिक्रिया

दरम्यान याप्रकरणी बोलताना उपमुख्यमंत्री अजित पवार असं म्हणाले की, 'आम्ही कारवाईचे आदेश दिले आहेत. अशाप्रकारे कोणताही प्रकार सहन केला जाणार नाही. महाराष्ट्र हा सुसंस्कृत आहे. त्यामुळे इथे असे प्रकार घडता कामा नये.' असे अजित पवार म्हणाले.

भाजप नेते सुनील देवधरांची वागळेंविरोधात तक्रार

निखिल वागळे यांनी 4 फेब्रुवारी रोजी ट्विटरवर भाजप नेते लालकृष्ण अडवाणी आणि पंतप्रधान मोदी यांच्याबाबत एक वादग्रस्त ट्विट केलं होतं. त्याच प्रकरणी भाजप नेते सुनील देवधर यांनी पुण्यातील विश्रामबाग पोलीस ठाण्यात वागळे यांच्या विरोधात तक्रार दाखल करून कायदेशीर कारवाईची मागणी केली होती. ज्यानंतर पोलिसांनी एफआयआर दाखल केला होता.

हे ही वाचा>> Bharat Ratna : इंदिरा गांधींना तुरुंगात टाकणाऱ्या चौधरी चरण सिंहांची कहाणी

वागळे विरोधात गुन्हा दाखल

भाजपचे ज्येष्ठ नेते सुनील देवधर यांनी तक्रार दाखल केल्यानंतर वागळे यांच्यावर कलम 153A (विविध गटांमधील शत्रुत्व वाढवणे), 500  आणि 505 (IPC) या कलमांनुसार गुन्हा दाखल करण्यात आला.

वागळेंवर नेमके काय आरोप?

भाजप नेते देवधर यांनी दिलेल्या तक्रारीत आरोप केला आहे की, वागळे यांनी पंतप्रधान नरेंद्र मोदी आणि अडवाणी यांच्याबद्दल अपमानास्पद वक्तव्य करून समाजातील शांतता भंग करण्याचा प्रयत्न केला आहे. दरम्यान, वागळे यांनी आपल्या विधानावर ठाम असल्याचं यावेळी म्हटलं आहे.