Crime News: तरुणीचे नग्न फोटो आणि Video व्हायरल करण्याची धमकी देत अनेकदा बलात्कार

नेमकी घटना काय?

याबाबतची माहिती अशी की, सुमारे नऊ महिन्यापूर्वी जानेवारी 2024 मध्ये केज येथील नीटची तयारी करीत असलेली 19 वर्षाची महाविद्यालयीन  तरुणी ही लातूरला जाण्यासाठी बसची वाट पहात थांबली होती. त्याचवेळी तिथे तिच्या ओळखीचा व सोशल मीडियावर ओळख झालेला सूरज गुंड नावाचा एक तरुण तेथे आला. तो तिला म्हणाला की, तो पण लातूरला जात आहे. असे म्हणून त्याने त्या युवतीला त्याच्या चारचाकी कारमध्ये बसविले. केजपासून पुढे 70 किमी अंतरावर असलेल्या रेणापूर येथील एका हॉटेलवर त्याने गाडी थांबवली.

हे ही वाचा>> Jalna Crime: धारदार शस्त्राने वार करुन तरुणाची निर्घृण हत्या! 'त्या' ढाब्यावर नेमकं काय घडलं?

यानंतर तिला जिवे मारण्याची धमकी देत बळजबरीने त्या हॉटेलच्या एका रूममध्ये घेऊन गेला. त्यावेळी तिने आरडाओरड करण्याचा प्रयत्न केला असता तिचे तोंड दाबून त्याने तिचे सर्व कपडे काढून तिच्यावर लैंगिक अत्याचार केला. त्यानंतर त्याने मोबाइलमध्ये तिचे नग्न फोटो आणि व्हिडीओ रेकॉर्डिंग केले. 

तसेच हा प्रकार कुणाला सांगितला तर हे सर्व फोटो आणि व्हिडीओ व्हायरल करण्याची धमकीही त्याने तिला दिली. त्यानंतर त्याने तिला लातूर येथील हॉस्टेलवर नेऊन सोडले. पण नंतर तो तिला वारंवार फोन करून तिचे फोटो आणि व्हिडिओ हे सोशल मीडियावर व्हायरल करण्याचे आणि तिच्या आई-वडिलांसह नातेवाईकांच्या मोबाइलवर पाठविण्याची धमकी देऊन तिला ब्लॅकमेल करत असे.

याच गोष्टीची भीती दाखवून आरोपी सूरजने तरुणीवर सुमारे 10 ते 12 वेळा लैंगिक अत्याचार केला. भीतीपोटी व कुटुंबाच्या इज्जतीपोटी पीडित तरुणी हे सर्व सहन करीत होती. त्या नंतर एके दिवशी सूरज गुंड याने ते सर्व व्हिडीओ आणि फोटो हे तिच्या आई-वडिलांच्या मोबाइलवर पाठवून दिले. त्यानंतर आईवडिलांनी त्या तरुणीला याचा जाब विचारल्यानंतर तिने सर्व प्रकार सांगितला.

हे ही वाचा>> Crime : विवाहितेवर सासरा, दिर आणि मामेभावाने आळीपाळीने अत्याचार केला मग...टिटवाळा हादरलं!

दरम्यान, 11 सप्टेंबर रोजी केज पोलीस ठाण्याचे प्रभारी पोलीस निरीक्षक प्रशांत महाजन यांना या सर्व प्रकारची कल्पना दिल्यानंतर सहाय्यक पोलीस निरीक्षक सुरेश बनसोडे आणि पोलीस उपनिरीक्षक राजेश पाटील यांनी पोलीस निरीक्षक यांचे लेखनिक पोलीस नाईक संतोष गित्ते यांच्या मदतीने पीडित तरुणीची तक्रार नोंदवून घेतली.
 
तरुणीवर वारंवार अत्याचार करणाऱ्या सूरज गुंड याच्या विरुद्ध केज पोलीस ठाण्यात गु. र. नं. ४८५/२०२४ भा. न्या. सं. २०२३ अधिनियम कलम ६४(१), ६४(२)(एम), ३३२(ब), ११५(२), ३५२, ३५१(१), ३५१(२) यासह अनुसूचित जाती व अनुसूचित जमाती अत्याचार प्रतिबंधक अधिनियम १९८९ चे कलम ३(२) (पाच), ३(२)(व्ही ए), ३(१)(आर), ३(१)(एस) आणि माहिती तंत्रज्ञान अधिनियम २००० चे ६६, ६६(ई) नुसार बलात्कार, ॲट्रॉसिटी आणि आय टी ॲक्ट नुसार गंभीर स्वरूपाचा गुन्हा दाखल करण्यात आला आहे.

दरम्यान, हा प्रकार गंभीर असल्याने आरोपी फरार होऊ नये याची दक्षता घेत केज पोलिसांनी अत्यंत गुप्तपणे सूरज गुंड याच्यावर पाळत ठेवून गुन्हा दाखल होताच त्याच्या मुसक्या आवळल्या. या प्रकरणाचा तपास सहाय्यक पोलीस अधीक्षक कमलेश मीना हे करीत आहेत.

इन्स्टाग्रामवरची मैत्री पडली महागात 

पीडित तरुणीने सूरज गुंड याची इन्स्टाग्रामवरची फ्रेन्ड रिक्वेस्ट स्वीकारली. त्यानंतर ते एकमेकांशी बोलत होते. त्याचा गैरफायदा घेत तो एके दिवशी तिच्या हॉस्टेलवर गेला आणि त्याने फोन करून बाहेर बोलावून घेतले व ते दोघे मोटार सायकलवर शहरात फिरले.