MVA: कोल्हापूरची जागा ठाकरे गटाने सोडली, पण मागितला 'हा' मतदारसंघ; अन्...

शिवसेना (UBT) ने  'या' जागेच्या मोबदल्यात कोल्हापूरची जागा सोडली?

महाविकास आघाडीतील कोल्हापूरचा तिढा हा जवळजवळ सुटला असल्याचं समजतं आहे. सूत्रांनी दिलेल्या माहितीनुसार, शिवसेना (UBT) कोल्हापूर लोकसभा मतदारसंघ हा छत्रपती शाहू महाराजांना सोडण्याची तयारी दर्शवली आहे. मात्र, या मोबदल्यात काँग्रेसकडून सांगली लोकसभा मतदारसंघाची जागा मागितील आहे. त्यामुळे महाविकास आघाडीमध्ये बरीच चर्चा झाली. पण सांगलीची जागा शिवसेनेला सोडण्यावर महाविकास आघाडीचं एकमत झाल्याचंही आता बोललं जात आहे.. 

सांगली लोकसभा मतदारसंघातून 2014 आणि 2019 साली भाजपचे संजय काका पाटील हे निवडून आले होते. त्यांनी माजी मुख्यमंत्री वसंतदादा पाटील यांचे नातू प्रतीक पाटील आणि विशाल पाटील यांना पराभूत केलं होतं.

प्रतीक पाटील यांनी राजकारणातून संन्यास घेतल्यानंतर त्यांचे बंधू विशाल पाटील यांनी काँग्रेसऐवजी स्वाभिमानी शेतकरी पक्षातून 2019 ची लोकसभा लढवली होती. कारण 2019 लोकसभा आघाडीत काँग्रेसने सांगलीची जागा ही स्वाभिमानीसाठी सोडली होती. त्यामुळेच विशाल पाटील यांनी स्वाभिमानीच्या तिकिटावर निवडणूक लढवली होती. 

दरम्यान, भाजपच्या संजय काका पाटील यांच्याविरोधात तगडा उमेदवार नसल्याने आता ही जागा शिवसेनेला सोडण्यास तयार झाली असल्याचं बोललं जात आहे.

शरद पवारांनी घेतलेली शाहू महाराजांची भेट 

लोकसभा निवडणुकीत भाजपविरोधात आव्हान उभं करण्यासाठी महाविकास आघाडी सर्व प्रकारचे प्रयत्न करत आहे. त्यासाठी स्वत: शरद पवार हे लोकसभेच्या मैदानात उतरले आहेत. काही दिवसांपूर्वीच त्यांनी कोल्हापूरला जाऊन छत्रपती शाहू महाराजांची भेट घेतली होती. याच भेटीनंतर त्यांच्या लोकसभा निवडणुकीच्या चर्चेने जोर धरला होता. 

जर शाहू महाराजांची महाविकास आघाडीचे अधिकृत उमेदवार म्हणून निवड करण्यात आली तर ते कोणत्या पक्षाकडून लढणार हे पाहणंही महत्त्वाचं ठरणार आहे. सूत्रांकडून मिळालेल्या माहितीनुसार, ते राष्ट्रवादी काँग्रेस पक्ष - शरदचंद्र पवार या पक्षातून तुतारी चिन्हावर लढण्याची दाट शक्यता आहे. 

शाहू महाराजांची उमेदवारी निश्चित झाली तर कोल्हापुरात प्रचंड अटीतटीची लढत ही पाहायला मिळू शकते. या निवडणुकीत संजय मंडलिक यांना शाहू महाराजांचं मोठं आव्हान मिळण्याची शक्यता आहे.