Sharad Pawar : "मंत्री म्हणतोय, पंतप्रधान मोदींना देशाची घटना बदलायचीय"

"आज हिंदुस्थानामध्ये लोकशाहीचं संरक्षण करणं याची अत्यंत गरज आहे. संविधानाचं रक्षण करण्याची गरज आहे. मी गेल्या आठवड्यामध्ये कर्नाटकातल्या एका भाजप नेत्याचा जो पार्लमेंटमध्ये सभासद आहे. त्याचं भाषण ऐकत होतो. त्यांनी भाषणात काय सांगितलं की, आम्ही तुम्हाला मत मागतोय आणि या देशाची घटना नरेंद्र मोदींना बदलायची आहे. घटना बदलण्यासाठी तुम्ही आम्हाला विजयी करा. आणि अशी भूमिका मांडली, जो केंद्र सरकारमध्ये सत्ताधारी पक्षाचा मंत्री होता, आणि मोदींना यासाठी मतदान करा, हे जे सांगत आहेत हे अत्यंत धोक्याची परिस्थिती आहे. म्हणून या निवडणुकीकडे नेहमीपेक्षा अधिक लक्ष देण्याची गरज आहे", असे आवाहन पवारांनी यावेळी केले.

"अनेक धोरणं आखली गेली. या धोरणांमध्ये सातत्य नाही. बारामतीमध्ये शेती हा महत्त्वाचा उद्योग आहे. शेतीमध्ये ऊसाचा धंदा हा मोठा धंदा आहे. आज काय चित्र दिसतंय, जगातील दोन नंबरचं साखर उत्पादन हे भारतामध्ये होतं आणि भारतात दोन नंबरचं उत्पादन हे महाराष्ट्रात होतं. काय धोरणं आखली? ऊसाची किंमत वाढली आनंद आहे. पण साखरेचं काय? साखर ही दुनियामध्ये पाठवली पाहिजे. निर्यातीचं धोरणं आखलं आणि एका दिवशी सांगून टाकलं की,  उद्यापासून निर्यातीवर बंदी. आज निर्यातीवर बंदी आहे. उत्पादन वाढवायचं, शेतकऱ्याला दोन पैसे देण्याची खात्री द्यायची. आणि जो माल तयार करतो त्याच्यावर विक्रीवर बंधनं आणायची. आज हे काम त्या ठिकाणी केलेलं आहे", असेही पवार म्हणाले. 

इथेनॉल निर्मितीच्या धोरणावरून पवारांची टीका

पवार यावेळी म्हणाले की, "आपण बारामतीमध्ये नुसती साखर केली नाही. आपण साखर केली, आपण वीज तयार केली, आपण इथेनॉल तयार केलं. नवीननवीन पदार्थ आपण याठिकाणी तयार करतोय. आणि त्याचं मार्केट कसं मिळेल याची काळजी घेतोय. मार्केट मिळालं म्हणजे उत्पादकाला २ पैसे आणि उत्पादकाच्या हातात दोन पैसे आले तर व्यापार वाढेल. आणि म्हणून हा निकाल घेतला."

हेही वाचा >> 'मविआ'ला आंबेडकरांचा अल्टिमेटम! महाराष्ट्रात गणित बदलणार

"सरकारने इथेनॉलचे कारखाने उभे करायला परवानगी दिली. लोकांनी बँकांचं कर्ज काढलं, कारखाने उभे केले. आणि ऑर्डर काढून टाकलं की, साखरेपासून इथेनॉल तयार करणं आजपासून बंद. म्हणजे तुम्ही सांगता, प्रधानमंत्री भाषण करताहेत, इथेनॉल करा, त्यासाठी कारखानदारी काढा. प्रधानमंत्र्यांवर लोकांनी विश्वास ठेवला. कर्ज काढलं, कारखानदारी उभी केली, आणि आता म्हणत आहेत, त्याच्यावर बंदी. हा व्यवसाय कसा करायचा? आज ऊसाची किंमत कमी आहे, याचा अर्थ शेतकऱ्यांचं पेमेंट कमी आणि शेतकऱ्यांचं पेमेंट कमी याचा अर्थ, अर्थव्यवस्था दुबळी व्हायची प्रक्रिया ही सुरु झालेली आहे", असा इशारा शरद पवार यांनी यावेळी दिला.