चंद्रपूरमध्ये कॉल रेकॉर्डिंगमुळे उघडकीस आला तीन महिन्यापूर्वीचा खून, महिलेसह प्रियकराला अटक

चंद्रपूरमध्ये तीन महिन्यापूर्वी घडलेली एक खुनाची घटना मोबाइलवरच्या फोन रेकॉर्डिंगमुळे उघडकीस आली आहे. पत्नीने अनैतिक संबंधात अडसर ठरणाऱ्या पतीला संपवलं होतं. तिने प्रियकराच्या मदतीने पतीची हत्या केली होती. हा प्रकार मोबाइल फोन रेकॉर्डिंगमुळे उघड झाला आहे. मृत माणसाच्या मुलीने केलेल्या तक्रारीनंत पोलिसांनी या प्रकरणातल्या महिलेला आणि तिच्या प्रियकराला अटक केली आहे.

नेमकी काय घडली घटना?

महाराष्ट्रातल्या चंद्रपूरमध्ये सगळ्यांना चक्रावून टाकणारी एक घटना घडली आहे. चंद्रपूरमधल्या ब्रह्मपुरी शहरात ही गटना घडली आहे. तीन महिन्यांपूर्वी झालेल्या एका खुनाची उकल मोबाइलमधल्या कॉल रेकॉर्डिंगमुळे झाली आहे. ५० वर्षांच्या एका महिलेने आपल्या अनैतिक संबंधांच्या आड येणाऱ्या पतीचा काटा काढला. ही हत्या झालीच नाही तर पतीला हार्ट अटॅक आला असा बनाव तिने रचला. मात्र तीन महिन्यापूर्वीची ऑडिओ क्लिप मिळाल्याने ती हत्या होती हे उघड झालं आहे.

६ ऑगस्टला काय घडली होती घटना?

६ ऑगस्टला ब्रह्मपुरी शहरातल्या गुरूदेव नगर भागात राहणारे श्याम रामटेके यांचा मृत्यू झाला. त्यांची पत्नी रंजना यांनी त्यांच्या दोन्ही मुलींना सांगितलं की तुमच्या वडिलांचा मृत्यू हार्ट अटॅकमुळे झाला. दोन्ही मुली नागपूरमध्ये रहात होत्या. आईवर त्यांनी विश्वास ठेवल्या पारंपरिक पद्धतीने वडिलांच्या मृतदेहावर अंत्यसंस्कार करण्यात आले. आता वडिलांच्या मृत्यूनंतर आई एकटी राहिल म्हणून एक मुलगी आईसोबत राहू लागली. मात्र तिने आईच्या वागणुकीत बदल झाल्याचं या काळात अनुभवलं.

रंजना रामटेके असं आपल्याच पतीची हत्या केलेल्या महिलेचं नाव आहे. रंजना रामटेके या पतीच्या मृत्यूनंतर वारंवार शहरातल्या आंबेडकर चौकात असलेल्या मुकेश त्रिवेदीची भेट घेत असल्याचं मुलीच्या लक्षात आलं. तसंच मुकेश त्रिवेदीही वारंवार घरी येत असल्याचंही या मुलीने पाहिलं. आईची ही वागणूक पाहून मुलीला संशय आला. आई वडील एकटेच असतात म्हणून या मुलीने आपल्या आई वडिलांना स्मार्ट फोन दिला होता. वडिलांच्या मृत्यूनंतर तीन महिन्यांनी या मुलीला ६ ऑगस्टच्या सकाळची एक ऑडिओ क्लीप आढळली. यामध्ये तिची आई रंजना आणि मुकेश यांच्यातलं संभाषण रेकॉर्ड झालं होतं. त्यावरून तिला कळलं की आपल्या वडिलांचा मृत्यू हार्ट अटॅकने नाही तर मुकेशच्या मदतीने केला गेला आहे. आधी वडिलांना विष पाजण्यात आलं. त्यानंतर त्यांचे हात पाय बांधण्यात आले आणि तोंडावर उशी ठेवून त्यांची हत्या करण्यात आली. या प्रकरणी मुलीने तक्रार दिल्यानंतर तीन महिन्यांनी रंजना रामटेके आणि मुकेश त्रिवेदी या दोघांना अटक करण्यात आली आहे.