मराठी भाषेला अभिजात भाषेचा दर्जा, विधानसभेपूर्वी मोदींचा मोठा निर्णय

केंद्रीय मंत्रिमंडळाची बैठक आज पार पडली आहे. या बैठकीत मराठी भाषेला अभिजात भाषेचा दर्जा देण्याबाबत निर्णय घेण्यात आला आहे. केंद्र सरकारने मराठी भाषेसह आणखी पाच भाषांना अभिजात भाषेचा दर्जा दिला आहे. मराठी सोबत पाली, बंगाली, आसामी आणि प्राकृतला देखील अभिजात भाषेचा दर्जा देण्यात आला आहे. केंद्र सरकारच्या या निर्णयाने मराठी भाषा सातासमुद्रापार जगभरात आणखी प्रभावीपणे पोहोचणार आहे. 

हे ही वाचा : Mazi Ladki Bahin: ऑक्टोबर महिन्यात थेट मिळणार 3000 रुपये, 'हे' आहे खरं कारण!

केंद्रीय मंत्रिमंडळाच्या या निर्णयानंतर राजकीय वर्तुळात विविध प्रतिक्रिया समोर येत आहे. पंतप्रधान नरेंद्र मोदी यांनी देखील यावर प्रतिक्रिया दिली आहे. मराठी ही भारताची शान आहे. या अभूतपूर्व भाषेला अभिजात भाषेचा दर्जा मिळाल्याबद्दल अभिनंदन. हा सन्मान आपल्या राष्ट्राच्या इतिहासात मराठीच्या समृद्ध सांस्कृतिक योगदानाची कबुली देतो. मराठी हा नेहमीच भारतीय वारशाचा आधार राहिला आहे, असे मोदी यांनी एक्सवर म्हटलंय.

 

मुख्यमंत्री एकनाथ शिंदे यांनी यावर मराठीजनांचे अभिनंदन करून प्रतिक्रिया दिली आहे. माझा मराठाचि बोलु कौतुके।
परि अमृतातें ही पैजा जिंके ॥  समस्त मराठी जनांचे हार्दिक अभिनंदन!!! अखेर माय मराठीला अभिजात भाषेचा दर्जा मिळाला! एका लढ्याला यश आले. यासाठी महाराष्ट्र सरकारने केंद्राकडे सतत पाठपुरवठा केला होता. आपल्या लाडक्या भाषेचा यथोचित सन्मान केल्याबद्दल पंतप्रधान नरेंद्र मोदीजी, तसेच केंद्रीय सांस्कृतिक मंत्री श्री. गजेंद्रसिंह शेखावत यांचे आम्ही आभार मानतो. या कामात अनेक मराठी भाषक, विचारवंत, भाषेचे अभ्यासक, साहित्यिक आणि समीक्षकांचे साह्य झाले. त्यांचेही मन:पूर्वक आभार!

उप मुख्यमंत्री देवेंद्र फडणवीस यांनी एक्सवर ट्वीट करून प्रतिक्रिया दिली आहे.आजचा दिवस मायमराठीच्या इतिहासातील एक ऐतिहासिक दिवस! मराठी भाषेला अभिजात दर्जा देण्याचा निर्णय आज केंद्रीय मंत्रिमंडळाने घेतला. मी मा. पंतप्रधान नरेंद्र मोदीजी आणि केंद्रीय मंत्रिमंडळातील सर्व सन्माननीय मंत्र्यांचे महाराष्ट्रातील 12 कोटी जनतेच्या वतीने अतिशय मनापासून आभार मानतो.

हा दिवस उजाडावा, यासाठी मी मुख्यमंत्री असताना आणि आताही मुख्यमंत्री एकनाथराव शिंदे यांच्या नेतृत्त्वात सातत्याने पाठपुरावा केला. लीळाचरित्र, ज्ञानेश्वरी, विवेकसिंधू अशा अनेक ग्रंथाचा आधार घेत मराठी भाषा ही अभिजातच आहे, हे सिद्ध करण्यासाठी अनेक थोरा-मोठ्यांचे, अभ्यासकांचे यासाठी हातभार लागले. मी त्यांचाही अत्यंत आभारी आहे. अखेर आज तो सुदिन अवतरला.

हे ही वाचा : Ladki Bahin Yojana : बँकेत 4500 जमा झालेच नाही, 'या' यादीत तुमचं नाव तपासा

नवरात्रीच्या पहिल्या दिवशी मायमराठीचा हा बहुमान मनाला अतिशय सुखद अनुभूती देणारा आहे. महाराष्ट्रातील आणि जगभरातील तमाम मराठीजनांचे मी अतिशय मनापासून अभिनंदन करतो. मराठी भाषेच्या सर्वांगिण विकासासाठी आता अनुदानासह केंद्र सरकारच्या पातळीवर सुद्धा सर्व ते सहकार्य मिळण्याचा मार्ग मोकळा झाला आहे.

'अमृताशीही पैजा जिंकणाऱ्या' आपल्या मायमराठीला अभिजात भाषेचा दर्जा मिळाला ! मराठी भाषेला अभिजात भाषेचा दर्जा मिळावा ही महाराष्ट्रातील प्रत्येक मराठी मनाची अनेक वर्षांपासूनची इच्छा पूर्ण करत मोदी सरकारने महाराष्ट्राला मोठी भेट दिली आहे. साहित्यिक इतिहासासह आधुनिक रुपातही आपले भाषिक सौंदर्य जपणाऱ्या आपल्या मराठी भाषेला अभिजात भाषेचा दर्जा देऊन महाराष्ट्रीयन माणसाचा अभिमान उंचावल्याबद्दल पंतप्रधान मोदी आणि केंद्रीय मंत्रिमंडळाचे मनःपूर्वक आभार!, अशी प्रतिक्रिया भाजप नेते विनोद तावडे यांनी दिली आहे. 

खासदार वर्षा गायकवाड यांनी देखील यावर प्रतिक्रिया दिली आहे. 'लाभले आम्हांस भाग्य बोलतो मराठी, जाहलो खरेच धन्य ऐकतो मराठी...''अमृतातेहि पैजा जिंके' अशी महती असलेल्या माय मराठीला अभिजात भाषेचा दर्जा मिळावा यासाठी आम्ही लोकसभेत आवाज उठवला आणि अखेर आज तो भाग्याचा दिवस उजाडला याचा अभिमान आहे.

गेल्या १० वर्षांपासून केंद्राकडे प्रलंबित असणारा मराठीला अभिजात भाषा म्हणून घोषित करण्याबद्दलचा प्रस्ताव आज अखेर केंद्राने मंजूर केला याचा आनंद आहे. आजचा दिवस सर्व मराठी भाषा प्रेमींसाठी गौरवाचा दिवस आहे. मराठीला अभिजात भाषेचा दर्जा त्वरित जाहीर करावा ही मागणी मी लोकसभेत जुलैमध्ये केली होती.

राज्यात काँग्रेसची सरकार असताना मराठीला अभिजात भाषा म्हणून घोषित करण्यासाठी तत्कालीन मुख्यमंत्री पृथ्वीराज चव्हाणजी यांनी मराठीच्या समृद्ध इतिहासाचा सबळ पुरावा देणारा तज्ञांचा अहवाल ११ जुलै २०१४ रोजी केंद्राकडे सादर केला होता. मात्र या अहवालावर पंतप्रधान नरेंद्र मोदी व महाराष्ट्रावर सूड उगवणाऱ्या त्यांच्या सरकारने मागील दहा वर्षांत काहीही निर्णय घेतला नव्हता.
लोकसभा निवडणुकीत महाराष्ट्रातील जनतेने भाजपाच्या याच मराठी भाषा आणि महाराष्ट्राबद्दलच्या द्वेषाची खबर घेतली, त्यांना चांगलाच धडा शिकवला. आता विधानसभा निवडणुकांच्या तोंडावर सरकारने अखेरेस मराठीला अभिजात भाषेचा दर्जा जाहीर केला. असो.. सर्वांना पुन्हा एकदा मन:पूर्वक शुभेच्छा.