विधान परिषद निवडणूक: 'या' नावांची जोरदार चर्चा, पण भाजप वापरणार धक्कातंत्र?

महाआघाडीत भाजपला तीन, शिवसेना (शिंदे गट) आणि राष्ट्रवादी काँग्रेस (अजित पवार) यांना प्रत्येकी एक जागा मिळणार आहे. हे तिन्ही पक्ष महाराष्ट्राच्या महायुती सरकारचा भाग आहेत. भाजप नेते देवेंद्र फडणवीस मुख्यमंत्री आहेत. तर एकनाथ शिंदे आणि अजित पवार हे उपमुख्यमंत्री आहेत.

हे ही वाचा>> Dhananjay Munde यांच्या राजीनाम्यानंतर कुणाची अडचण, कुणाला संधी, मंत्रिपद कुणाला?

भाजप पुन्हा एकदा वापरणार धक्कातंत्र?

आतापर्यंत अशा प्रकारच्या निवडणुकांमध्ये भाजप उमेदवार देताना कायमच धक्कातंत्राचा वापर करत असल्याचे दिसून आले आहे. खरं तर सध्या राजकीय वर्तुळात दादाराव केचे, अमरनाथ राजूरकर आणि माधव भंडारी यांच्या नावाची जोरदार चर्चा सुरू आहे. पण भाजपचा इतिहास लक्षात घेता काही अनपेक्षित नावं देखील आपल्याला पाहायला मिळू शकतात. 

'या' तीन नावाची जोरदार चर्चा

1. दादाराव केचे - माजी आमदार आर्वी विधानसभा मतदारसंघ. देवेंद्र फडणवीस यांचे स्वीय सहाय्यक सुमित वानखडे यांना या क्षेत्रातून संधी मिळाल्याने केचे यांचे पुनर्वसन करण्यात येऊ शकते.

2. अमरनाथ राजूरकर - माजी काँग्रेस आमदार आणि अशोक चव्हाण यांचे जवळचे. त्यांच्यासोबतच ते भाजपमध्ये देखील सामील झाले.

3. माधव भंडारी - हे भाजपचे दीर्घकाळ प्रवक्ते आहेत. जनसंघापासून ते पक्ष संघटनेपर्यंत सक्रिय आहेत.

हे ही वाचा>> Uddhav Thackeray: "गद्दारांनो 'छावा' बघा..", उद्धव ठाकरेंनी शिंदेंवर डागली तोफ, अबू आझमी, नीलम गोऱ्हेंनाही सुनावलं

राष्ट्रवादी काँग्रेस (अजित पवार गट) कडून या दोन नावाची चर्चा

राष्ट्रवादी काँग्रेस पक्षाच्या (अजित पवार गट) कोट्यातही एक जागा आहे. यासाठी नावांवर विचार सुरू झाला आहे.

1. संग्राम कोते पाटील - राष्ट्रवादी युवक काँग्रेस आणि विद्यार्थी परिषदेचे प्रदेशाध्यक्ष म्हणून त्यांनी काम केलं आहे. उत्तर महाराष्ट्रातील शिर्डी विधानसभा मतदारसंघातील तरुण चेहरा. क्रीडा, कला आणि सामाजिक क्षेत्रात व्यापक जनसंपर्क.

2. सुनील टिंगरे - वडगाव शेरी मतदारसंघाचे माजी आमदार. अजित पवार यांचे विश्वासू म्हणून ओळखले जातात. पुण्यातील पक्ष संघटनेच्या विस्तारात त्यांचे मोठे योगदान आहे. 

शिवसेना (एकनाथ शिंदे गट) कडून 3 नावांची चर्चा

शिवसेना (एकनाथ शिंदे गट) च्या कोट्यातही एक जागा आहे. यासाठी दावेदारांची एक मोठी रांग आहे. तथापि, अद्याप कोणताही निर्णय झालेला नाही. पण काही नावांबाबत सध्या जोरदार चर्चा सुरू आहे.

1. रवींद्र फाटक - माजी विधान परिषद सदस्य. एकनाथ शिंदे यांच्या जवळचे आणि ठाण्याच्या स्थानिक राजकारणातील एक प्रमुख चेहरा.

2. शहाजी बापू पाटील - माजी आमदार, सोलापूर जिल्ह्यातील शिवसेनेचा ग्रामीण चेहरा.

3. शीतल म्हात्रे - शिवसेना प्रवक्त्या, माजी नगरसेविका. मुंबईत संघटना बांधण्याची मोठी जबाबदारी.