Nagpur Violence : "दूध आणायला गेलेला मुलगा व्हेंटीलेटरवर, रेल्वे पकडायला निघालेला भाऊ ऑक्सिजनवर"

ट्रेन पकडण्यासाठी निघालेले इरफान अन्सारी ऑक्सिजनवर...

बडे नवाज नगर येथील रहिवासी असलेला इम्रान अन्सारी मोठ्या भावासोबत झालेल्या घटनेनं हादरले आहेत. व्यवसायाने वेल्डर असलेला इरफान सोमवारी रात्री अकराच्या सुमारास घरातून बाहेर पडला. तो नागपूर रेल्वे स्थानकावरून इटारसीला जाणारी पहाटे 1 ची ट्रेन पकडणार होता. मात्र तो ट्रेन पकडू शकला नाही. हिंसाचारात तो जखमी झाला. आपला मोठा भाऊ इरफान अन्सारी याच्या गंभीर प्रकृतीमुळे इम्रान आणि कुटुंब हादरलं आहे.

हे ही वाचा >> Pune Bus Fire : चालती बस पेटली, सिमेंट ब्लॉकला धडली, 4 जणांचा होरपळून मृत्यू, भयावह दृश्य समोर

या कुटुंबाला इंदिरा गांधी शासकीय रुग्णालयाकडून (IGGMCH) फोन आला. इरफानला जखमी अवस्थेत इथे दाखल करण्यात आल्याचं सांगण्यात आलं होतं. इम्रानने माध्यमांशी बोलताना सांगितलं की, माझ्या भावाच्या डोक्याला गंभीर दुखापत झाली. पायाला फ्रॅक्चर झालं आहे. सध्या त्याला आयसीयूमध्ये भरती केलं असून, ऑक्सिजनवर आहे.

मात्र, कुटुंबाचं लक्ष सध्या इरफान यांच्यावर उपचावर असल्यानं त्यांना पोलीस स्टेशनमध्ये जाऊन अजून तक्रार दाखल करता आलेली नाही. स्टेशनला जाताना नेमकं काय घडलं, इरफान कसा जखमी झाला? याबाबत घरच्यांना काहीच माहिती नाही.

दूध आणण्यासाठी घरून निघालेला रझा 17 वर्षाचा मुलगा व्हेंटीलेटवर...

नागपूरमध्ये भडकलेल्या या हिंसाचारात 12 वीत वाणिज्य शाखेचा विद्यार्थी असलेला 17 वर्षीय रझा युनूस खान जखमी झाला आहे. एका खासगी रुग्णालयात त्याच्यावर उपचार सुरू असून, त्याची प्रकृती सध्या गंभीर आहे. मोमीनपुऱ्याजवळील गार्ड लाइन इथे राहणाऱ्या रझा युनूस खान या मुलाला रात्री साडेदहाच्या सुमारास त्याच्या आईनं सकाळच्या सेहरीसाठी दूध आणि दही आणायला पाठवलं होतं. त्यानंतर रात्री साडेअकराच्या सुमारास त्यांना IGGMCH रुग्णालयातून फोन आला. तुमच्या मुलाला गंभीर अवस्थेत रुग्णालयात दाखल करण्यात आल्याचं त्यांना सांगण्यात आलं.

हे ही वाचा >> Pune Crime : बारावीच्या विद्यार्थ्याची मित्रांकडूनच हत्या, दोन विहिरींमध्ये कापून फेकले मृतदेहाचे तुकडे, प्रकरण काय?

रझा युनूस खानच्या आईने सांगितले की, माझा मुलगा हंसापुरी भागातच दूध आणण्यासाठी गेला होता. सकाळी 11.30 च्या सुमारास IGGMCH कडून फोन आला की, त्याला रुग्णालयात दाखल करण्यात आलं आहे. त्यानंतर मुलाला एका खाजगी रुग्णालयात हलवण्यात आलं. आता तो तो सध्या व्हेंटिलेटरवर आहेत. मुलासोबत नेमकं काय झालं, तो जखमी कसा झाला हे खान कुटुंबाला अजून माहिती नाही. लकडगंज पोलीस ठाण्याच्या अधिकाऱ्यानं त्यांचे जबाब नोंदवले असल्याचं त्यांनी सांगितले आहे.