सातशे शूटरचं नेटवर्क, सलमानशी वैर! सिद्दीकींच्या हत्येची जबाबदारी घेणारी कशी आहे बिश्नोई गँग?

या प्रकरणात पोलिसांनी दोन हल्लेखोरांना अटक केली आहे. गुरमेल बलजीत सिंग, धर्मराज कश्यप अशी आरोपींची नावं आहे. धर्मराज हा तर अवघ्या १९ वर्षांचा आहे. तिसरा आरोपी शिवा हा घटनास्थळावरुन फरार झाला, त्याचा आता पोलीस शोध घेतायेत. बाबा सिद्दीकी यांची सुपारी देऊन खून झाला असा पोलिसांना संशय आहे. आता बाबा सिद्दीकी यांच्या हत्येची जबाबदारी लॉरेन्स बिश्नोई गँगने घेतली आहे. फेसबुकवर पोस्ट लिहीत त्यांनी ही जबाबदारी घेतली आहे. त्याचबरोबर या पोस्टमध्ये सलमान खानचा देखील उल्लेख करण्यात आला आहे. 

१४ एप्रिलला सलमान खानच्या गलक्सी या घरावर पहाटे गोळीबार करण्यात आला होता. यावेळी देखील बिश्नोई गँगचं नाव समोर आलं होतं. आता ही बिश्नोई गँग नेमकी आहे कोण, तिहार जेलमध्ये असलेला लॉरेन्स बिश्नोई ही गँग कशी चालवतो आणि सलमानशी त्यांचं वैर का आहे हे सगळं समजून घेऊयात.

हेही वाचा : Gangster Lawrence Bishnoi: बॉलिवूडचा 'तो' दिग्गज अभिनेता लॉरेन बिश्नोईच्या हिटलिस्टमध्ये पहिल्या नंबरवर

बिश्नोई गँगचा म्होरक्या असलेला लॉरेन्स बिश्नोई सध्य तिहार जेलमध्ये आहे. लॉरेन्सचा जन्म १९९३ मध्ये पंजाबमध्ये झाला. सुरुवातीच्या काळात तो अबोहारमध्ये राहिला. मग पुढील शिक्षणासाठी तो चंदीगढच्या डीएव्ही कॉलेजमध्ये गेला. त्याने पंजाब विद्यापीठाची स्टुडंट काउंसिलमध्ये सहभाग घेतला. तिथे त्याची ओळख गोल्डी ब्रारशी झाली. बिश्नोई आणि ब्रार हे विद्यापीठाच्या राजकारणात सक्रीय झाले विद्यीपाठात त्यांनी अनेक गुन्हेगारी कृत्य देखील केली. 

बिश्नोईच्या विरोधात अनेक गुन्हे आहेत. त्यात खून, खंडणी वसूल करने असे गुन्हे दाखल आहेत. त्याच्या गँगमध्ये देशभरात ७०० शूटर आहेत. सध्या बिश्नोई हा तिहार जेलमध्ये आहे परंतु तिहार जेलमधून देखील तो त्याची गँग ऑपरेट करत असल्याचं समोर आलं आहे. आता बिश्नोई आणि सलमानची नेमकी दुश्मनी का आहे ते समजून घेण्यासाठी एक प्रसंग जाणून घेऊयात. 

वर्ष होतं २०१८, राजस्थानचा गँगस्टर संपत नेहराला एक सुपारी मिळाली होती. ती सुपारी होती बॉलिवूडचा दबंग स्टार सलमान खान याच्या हत्येची. संपतने मुंबईत येऊन सलमानच्या घराची रेकी केली. एके दिवशी सलमान त्याच्या समोर होता, संपतने त्याची पिस्टल लोड केली परंतु सलमानच्या सोबत असलेल्या सिक्युरिटीमुळे तो सलमानपर्यंत पोहचू शकला नाही. 

हेही वाचा : Baba Siddique: राजकीय प्रवास ते बॉलिवूड कनेक्शन! बाबा सिद्दीकींबद्दल माहित नसलेल्या 'त्या' गोष्टी...

 
त्यानंतर लांबूनही निशाना लावता येईल म्हणून संपतने स्प्रिंग रायफल ऑर्डर केली. ही रायफल संपतपर्यंत पोहचण्याच्या आधीच दिनेश फौजी जो संपतला रायफल देणार होता तो पकडला गेला. काही काळाने संपत देखील पकडला गेला. संपतला सलमानच्या हत्येची सुपारी देणाऱ्या व्यक्तीचं नाव होतं लॉरेन्स बिश्नोई. संपत हा लॉरेन्सचा खास होता. त्यावर तो डोळे बंद करुन देखील विश्वास ठेवू शकत होता. 

आता सलमान खान हा बिश्नोईच्या टार्गेटवर का आला हे समजण्यासाठी आपल्याला थोडं मागे जावं लागेल. तुम्हाला ‘हम साथ साथ हे’ ही फिल्म आठवत असेल. या फिल्मचं शुटींग राजस्थानमध्ये झालं होतं. या शुटींगच्या दरम्यान सलमानने कांकणी गावाजवळ दोन काळविटांची शिकार केल्याचा त्यावर आरोप लावण्यात आला होता. एप्रिल २०१८ मध्ये सलमान खानला या प्रकरणात दोषी ठरवत त्याला पाच वर्षांची शिक्षा सुनावण्यात आली होती. परंतु त्याच दिवशी सलमान हा ५० हजारांच्या जामीनावर बाहेर देखील आला होता.

राजस्थानमध्ये बिश्नोई समाजात काळविटाला आपल्या कुटुंबाप्रमाणे माणलं जातं. त्यांच्याकडे काळविटाची पूजा देखील केली जाते. त्यामुळेच बिश्नोईच्या निशाण्यावर सलमान खान आला होता. एप्रिलमध्ये सलमानच्या घरावर फायरिंग झाल्यानंतर त्याच्या सुरक्षेत कमालिची वाढ करण्यात आली होती. बाबा सिद्दीकी हे सलमानच्या जवळचे आहेत. सरकारकडून त्यांनी सलमानची सुरक्षा मोठ्याप्रमाणावर वाढवली होती. त्याचबरोबर सलमानच्या घरावर हल्ला झाला तेव्हा त्याच्या घरी जाणारे सिद्दकी हे पहिले होते. सलमानच्या घरावर हल्ला करणाऱ्या अनुज थापन याला पोलिसांनी अटक केली होती. अनुज थापन याने पोलीस कस्टडीमध्ये आत्महत्या केली होती. सिद्दकींच्या हत्येचं कारण म्हणजे अनुज थापन असं फेसबुक पोस्टमध्ये म्हणण्यात आलं आहे. 

सलमानसोबत असलेल्या मैत्रीमुळे बिश्नोई टोळीच्या रडारवर सिद्दकी देखील आले होते. सोशल मीडियावर लिहीलेल्या पोस्टमध्ये देखील याचा उल्लेख करण्यात आला आहे. आता आरोपींच्या तपासात आणखी काय समोर येतं हे पाहणं महत्त्वाचं असणार आहे. 
पोलीस आरोपींकडे कसून चौकशी करयायेत. मुंबईतील सलमानच्या घराची सुरक्षा देखील आता वाढवण्यात आली आहे.  याप्रकरणात पुढे काय होतं हे पाहणं महत्त्वाचं असणार आहे.