Prakash Ambedkar: "...हम सत्ता में रहना चुनेंगे!", निकालापूर्वीच प्रकाश आंबेडकरांनी उडवून दिली खळबळ

प्रकाश आंबेडकरांच्या नव्या भूमिकेने राजकारण बदलणार?

जर उद्या वंचित बहुजन आघाडीला ठराविक जागा मिळाल्या आणि सरकार स्थापन करण्यासाठी कुणाला पाठिंबा देण्याची वेळ आली, तर वंचित कुणाच्या बाजूने राहील असा प्रश्न सध्या वंचितच्या समर्थकांनाही पडला असेल. मात्र प्रकाश आंबेडकर यांनी आता हे स्पष्ट केलं असून, अशा परिस्थितीत आपण जो कुणी सत्ता स्थापन करु शकेल, त्यांच्या बाजूने राहणार असल्याचं सांगितलं आहे. त्यामुळे आता प्रकाश आंबेडकर यांनी आपले दार सर्वांसाठीच खुले केल्याचं दिसतं आहे. 

हे ही वाचा >>Maharashtra Vidhansabha Election 2024: पाहा 288 मतदारसंघाची संपूर्ण आकडेवारी, तुमच्या मतदारसंघात...

उद्या राज्याच्या विधानसभा निवडणुकांचे निकाल जाहीर होणार आहेत. या निकालात येणाऱ्या आकडेवारीवरुन राज्याच्या पुढच्या पाच वर्षांचं भवितव्य ठरणार आहे. त्यामळे जर युती किंवा महाविकास आघाडीला योग्य आकडा गाठता आला नाही, तर ते अपक्ष किंवा लहान पक्षांची मदत घेण्याचा विचार करतील. त्यासाठी चाचपणी देखील सुरु झाल्याचं कळतंय. या सर्व गोष्टी घडत असतानाच प्रकाश आंबेडकर यांनी सत्तेसोबत राहण्याची भूमिका घेतली आहे. त्यामुळे आता प्रकाश आंबेडकरांशी कोण संपर्क साधणार हे उद्या निकालानंतरच स्पष्ट होईल.

राज्यात समोर आलेल्या वेगवेगळ्या एक्झिट पोलनुसार महायुतीचं सरकार येईल किंवा अटीतटीची परिस्थिती निर्माण होऊन अपक्ष किंगमेकर ठरू शकतील. त्यामुळे घोडेबाजार टाळण्यासाठीही महाविकास आघाडीचं लक्ष सर्व आमदारांवर असणार आहे. गेल्या काही दिवसांपासून त्यासाठीची तयारी सुरू झाली असून, मुंबईतल्या हॉटेलही त्यासाठी बूक केल्याची माहिती समोर आली आहे. तसंच बाहेरच्या राज्यातून काँग्रेसचा एक बडा नेता महाराष्ट्रात येणार असून, त्यांच्याकडेच सर्व जबाबदारी असणार असल्याचं सांगितलं जातं आहे. त्यामुळे 26 तारखेपर्यंत होणाऱ्या घडामोडींवर देशाचं लक्ष असणार आहे.