NCP: महाराष्ट्रात राष्ट्रवादी काँग्रेस पुन्हा फुटणार?, पवारांच्या नव्या डाव्याने सगळेच बुचकळ्यात!

शरद पवारांच्या या प्रतिक्रियेनंतर महाराष्ट्रात अजित पवार गटात खळबळ माजली आहे. अजित पवार गटाचे प्रवक्ते आणि आमदार अमोल मिटकरी यांनी खुलासा करताना सांगितले की, “शरद पवार साहेबांचे हे विधान जनतेमध्ये आणि कार्यकर्त्यांमध्ये संभ्रम निर्माण करण्यासाठी करण्यात आले आहे, त्यात काहीही तथ्य नाही. आमचे आमदार आमच्या पाठीशी भक्कमपणे उभे आहेत. कोणी कुठेही जाण्याची शक्यता नाही.”

हे ही वाचा>> Om Birla : निकाल लागला! लोकसभेची सूत्रे ओम बिर्लांच्या हातात

लोकसभा निवडणुकीच्या निकालात शरद पवारांना मोठे यश मिळाले. राष्ट्रवादी काँग्रेस (शरद पवार) यांनी 10 जागा लढवून 8 जागा जिंकल्या. दुसरीकडे अजित पवार यांनी 4 जागा लढवल्या होत्या. मात्र, सुनील तटकरे यांची रायगडची जागा वगळता त्यांना यश मिळाले नाही. तर अजित पवार यांच्या पत्नी सुनेत्रा पवार यांचाही बारामती मतदारसंघातून सुप्रिया सुळे यांच्याकडून पराभव झाला. मात्र अजित पवारांनी सुनेत्रा पवार यांना पुन्हा राजकारणात आणण्यासाठी त्यांना राज्यसभेवर पाठवले आहे.

कोणते आमदार शरद पवारांच्या पक्षात येऊ शकतात..?

लोकसभा निवडणुकीचे निकाल पाहिले असता, यावेळी जनतेला राष्ट्रवादी काँग्रेस (अजित पवार) आणि भाजपची युती आवडली नाही. दोन्ही पक्षांना एकमेकांची मते हस्तांतरित करता आली नाहीत. अजित पवार यांच्या पक्षाला केवळ 3 ते 3.5 टक्के मते मिळाली. ज्याचा उल्लेख भाजपच्या अंतर्गत बैठकीतही करण्यात आला आहे. ज्या आमदारांना आपापल्या विधानसभा मतदारसंघात राष्ट्रवादी किंवा भाजपला आघाडी देणे शक्य नाही, ते आता आपल्या राजकीय भवितव्याची चिंता करत आहेत. विधानसभा निवडणुकीतही आपण अजित पवारांसोबत राहिलो आणि भाजपसोबत निवडणूक लढवली तर जनता आपल्याला स्वीकारणार नाही, असे त्यांना वाटते.

हे ही वाचा>> Maharashtra Live : राऊतांनी शेअर केला मोदी-गांधींचा फोटो; म्हणाले, "ये तो..."

दुसरीकडे पक्ष फोडण्याचे आरोप, गद्दारसारखं नरेटिव्हमुळे होणारं नुकसान त्यांना थांबवणं कठीण जात आहे. याशिवाय जीएसटीचा फटका, शेतकऱ्यांना त्यांच्या मालाला भाव न मिळणे आणि मराठा-ओबीसी यांच्यात सुरू असलेला वाद लक्षात घेता सध्याचे सरकार अडचणीत आले आहे. त्यामुळे अजित पवार यांच्यासह विद्यमान 40 आमदार, त्यापैकी काही मराठवाडा आणि पश्चिम महाराष्ट्रातून आलेले आमदार हे वेगळा निर्णय घेऊ शकतात, असा दावा शरद पवार यांचे पक्षनेते आणि आमदार रोहित पवार यांनी केला आहे.

शरद पवारांचे दरवाजे कोणासाठी बंद..?

राष्ट्रवादी काँग्रेसमध्ये फूट पडल्यानंतर अनेक बड्या नेत्यांनी शरद पवार यांच्यावर वैयक्तिक हल्लाबोल केला होता. त्यांच्या राजकीय धोरणांवर, तत्त्वांवर आणि धर्मनिरपेक्ष विचारसरणीवर प्रश्न उपस्थित केले गेले. यामध्ये स्वतः त्यांचे पुतणे अजित पवार, पक्षाचे कार्याध्यक्ष प्रफुल्ल पटेल, पक्षाचे महाराष्ट्राचे प्रदेशाध्यक्ष सुनील तटकरे, ज्येष्ठ नेते छगन भुजबळ आणि अजित पवार यांचे निकटवर्तीय आणि भाजपशी चांगले संबंध असलेले धनंजय मुंडे यांचा समावेश आहे. 

या नेत्यांवर शरद पवार चांगलेच नाराज असल्याची चर्चा आहे. याशिवाय ज्या नेत्यांनी मंत्रिपदाची शपथ घेतली होती त्यांच्यावर शरद पवार यांच्या पक्षातील लोकांनी जोरदार हल्लाबोल केला होता. त्यामुळे आता त्यांना सोबत घेणं हे राजकीयदृष्ट्या चुकीचं ठरु शकतं असं काही आमदारांचं मत आहे. 

तिसरी गोष्ट म्हणजे भाजपने ज्यांच्यावर भ्रष्टाचाराचे गंभीर आरोप केले होते त्यांनाच त्यांनी सोबत घेतलं. या मुद्द्यावरून शरद पवार यांच्या राष्ट्रवादीने जोरदार टीकाही केली होती. अशावेळी आता अजित पवारांसोबत असलेल्या आमदारांना परत पक्षाच घेणं हे शरद पवारांसाठीही अवघड ठरू शकतं. कारण त्यांच्यावर असणाऱ्या आरोपांची जबाबदारी पुन्हा एकदा पक्षाला घ्यावी लागू शकते.

अजित पवारांसमोर मोठे आव्हान काय?

विधानसभा निवडणुका अवघ्या अडीच महिन्यांवर आल्या आहेत. विधानसभेचे अधिवेशन अजून बाकी असून अर्थसंकल्पही येणार आहे. या दोन महिन्यात आपल्या मतदारसंघात जास्तीत जास्त विकासासाठी बजेट मंजूर करून घेण्यास आमदारांचे प्राधान्य आहे. आणि अजित पवार स्वतः महाराष्ट्राचे अर्थमंत्री आहेत. त्यामुळे सध्या आमदारांना अजित पवारांची गरज आहे. पण जसजशी निवडणूक जवळ येईल आणि जागावाटपाची चर्चा सुरू होईल, तसतसं लोकांना जोडून ठेवण्यासाठी प्रयत्न करावे लागतील. अजित पवारांसह राष्ट्रवादीचे सध्या 40 आमदार आणि तीन खासदार आहेत. तर शरद पवार यांच्यासोबत 13 आमदार आणि 8 खासदार आहेत.