IPL 2025: 35 चेंडूत 100 धावा करणारा 14 वर्षांचा वैभव सूर्यवंशी मराठी आहे?
आयपीएल 2025 मध्ये 14 वर्षीय वैभव सूर्यवंशीने 35 चेंडूत शतक झळकावून एक नवा इतिहास रचला आहे. पण वैभव हा मराठी आहे का? अशी चर्चा आता सोशल मीडियावर सुरू झाली आहे.
ADVERTISEMENT
जयपूर: इंडियन प्रीमियर लीग (IPL) 2025 मध्ये राजस्थान रॉयल्सचा 14 वर्षीय सलामीवीर वैभव सूर्यवंशी याने क्रिकेट विश्वात इतिहास रचला. गुजरात टायटन्सविरुद्ध जयपूरच्या सवाई मानसिंह स्टेडियमवर झालेल्या सामन्यात वैभवने अवघ्या 35 चेंडूत शतक झळकावत आयपीएलमधील सर्वात तरुण शतकवीराचा मान मिळवला. त्याच्या या खेळीने राजस्थानने 210 धावांचे आव्हान 16 षटकांतच पार केले. दरम्यान, आता वैभव सूर्यवंशीच्या शतकासोबतच तो मराठी आहे का? याविषयी देखील सोशल मीडियावर चर्चा सुरू झाली आहे. चला, याबाबत सविस्तर माहिती जाणून घेऊया.
कोण आहे वैभव सूर्यवंशी?
वैभव सूर्यवंशी हा बिहारच्या समस्तीपूर जिल्ह्यातील ताजपूर गावातील रहिवासी आहे. त्याचा जन्म 27 मार्च 2011 रोजी झाला. वयाच्या चौथ्या वर्षापासूनच त्याने क्रिकेटची बॅट हाती घेतली होती. त्याचे वडील संजीव सूर्यवंशी, जे शेतकरी आहेत, यांनी वैभवच्या क्रिकेटप्रती असलेल्या उत्साहाला ओळखून त्याच्यासाठी घराच्या मागील बाजूस छोटे मैदान तयार केले. वयाच्या नवव्या वर्षी वैभव समस्तीपुरच्या क्रिकेट अकादमीत दाखल झाला आणि त्याची प्रतिभा लवकरच सर्वांसमोर आली.
हे ही वाचा>> वडिलांनी विकलेल्या जमिनीचं पोरानं आज सोनं केलं, 35 चेंडूत शतक ठोकणारा 14 वर्षांचा वैभव सूर्यवंशी आहे तरी कोण?
वैभवने वयाच्या 12व्या वर्षी बिहारसाठी विनू मांकड ट्रॉफीमध्ये सुमारे 400 धावा केल्या. यंदा त्याने ऑस्ट्रेलियाविरुद्ध अंडर-19 कसोटी सामन्यात 58 चेंडूत शतक ठोकले होते. आयपीएल 2025 च्या मेगा लिलावात राजस्थान रॉयल्सने त्याला 1.10 कोटींना खरेदी केले, ज्यामुळे तो आयपीएल इतिहासातील सर्वात तरुण खेळाडू ठरला.
वैभव सूर्यवंशी मराठी आहे का?
वैभव सूर्यवंशी हा मराठी नसून तो बिहारचा आहे. त्याचे मूळ गाव आणि कुटुंब बिहारच्या समस्तीपूर जिल्ह्यात आहे, आणि तो बिहारच्या स्थानिक क्रिकेट संघाकडून खेळतो. त्याच्या नावातील "सूर्यवंशी" हे आडनाव राजपूत समाजाशी संबंधित आहे. जे बिहार आणि उत्तर भारतात सामान्य आहे. मराठी किंवा महाराष्ट्राशी त्याचा थेट संबंध नाही.
मात्र, असं असलं तरी वैभवने कालच्या (28 एप्रिल) सामन्यात जी ऐतिहासिक कामगिरी केली त्यामुळे तो बिहारच नव्हे तर महाराष्ट्रासह देशभरातील क्रिकेटप्रेमींच्या चर्चेचा विषय ठरला आहे. काही मराठी चाहत्यांना त्याचे आडनाव सूर्यवंशी असल्याने तो मराठी आहे का? असा सवाल सोशल मीडियावर विचारणं सुरू केलं आहे.
वैभवच्या ऐतिहासिक शतकाची कहाणी
28 एप्रिल 2025 रोजी गुजरात टायटन्सविरुद्ध वैभवने आपल्या तिसऱ्या आयपीएल सामन्यात हा पराक्रम केला. त्याने 17 चेंडूत 6 षटकार आणि 3 चौकारांसह अर्धशतक पूर्ण केले. त्यानंतर 35 चेंडूत 11 षटकार आणि 7 चौकारांसह शतक ठोकले. त्याच्या 101 धावांच्या खेळीत 94 धावा केवळ चौकार-षटकारांमधून आल्या.
हे ही वाचा>> IPL 2025 Video : स्टंपला बॅट लागूनही सुनील नरेनला OUT दिलं नाही! 'हा' नियम वाचून तुम्हीही व्हाल थक्क
वैभवने अफगाणिस्तानच्या पदार्पणवीर गोलंदाज करीमच्या एका षटकात 30 धावा (6,4,6,4,4,6) आणि इशांत शर्माच्या षटकात 28 धावा (6,6,4,0,6,4) काढल्या. तर राशिद खानला षटकार मारत त्याने आपले शतक पूर्ण केले. आयपीएलमधील सर्वात वेगवान शतकाचा विक्रम ख्रिस गेलच्या नावावर आहे (30 चेंडू), तर वैभवने युसूफ पठानचा 37 चेंडूंचा विक्रम मोडत दुसरे वेगवान शतक नोंदवले.
वैभवने रचलेले विक्रम
आयपीएलमधील सर्वात तरुण शतकवीर: 14 वर्षे 32 दिवस वयात शतक.
टी-20 क्रिकेटमधील सर्वात तरुण शतकवीर: यापूर्वी हा विक्रम विजय झोल (18 वर्षे 118 दिवस) यांच्या नावावर होता.
आयपीएलमधील सर्वात वेगवान भारतीय क्रिकेटरचं शतक: 35 चेंडूत शतक, युसूफ पठानचा विक्रम मोडला.
वैभवच्या या खेळीने त्याला रातोरात स्टार बनवले आहे. राजस्थान रॉयल्सचे कर्णधार संजू सॅमसन आणि माजी प्रशिक्षक राहुल द्रविड यांनी त्याच्या प्रतिभेचे कौतुक केले आहे. वैभवने स्वतः मुलाखतीत सांगितले की, तो गोलंदाजांना घाबरत नाही आणि फक्त चेंडूकडे लक्ष देतो. त्याच्या या निर्भय वृत्तीमुळे क्रिकेट तज्ज्ञ त्याला भविष्यातील सुपरस्टार मानत आहेत.
वैभव सूर्यवंशी हा मराठी नसला तरी त्याची ही ऐतिहासिक कामगिरी भारतीय क्रिकेटसाठी अभिमानास्पद आहे. या तरुण खेळाडूने वयाच्या 14व्या वर्षीच क्रिकेट विश्वात आपले नाव कोरले आहे. त्याच्या या खेळीने आयपीएल 2025 मध्ये नव्या इतिहासाची नोंद झाली असून, तो भविष्यात भारतीय क्रिकेटचा चेहरा बनू शकतो, यात शंका नाही.
हे वाचलं का?
