Sangli Lok Sabha Election 2024 : लोकसभा निवडणुकीत ठाकरे यांची सांगली लोकसभा मतदारसंघात लढाई अवघड बनली आहे. या मतदारसंघातील महाविकास आघाडीचे उमेदवार चंद्रहार पाटील यांना विजय मिळवणे सोपे नसणार, हे स्पष्ट झाले आहे. महत्त्वाचे म्हणजे आता सांगली लोकसभा मतदारसंघात हायव्होल्टेज लढत बघायला मिळणार आहे. नक्की सांगलीत काय झालं, हे जाणून घ्या...
ADVERTISEMENT
महाविकास आघाडीत उद्भवलेली पहिलेली बंडखोरी रोखण्यात काँग्रेसच्या नेत्यांना अपयश आले. माजी मुख्यमंत्री वसंतदादा पाटील यांचे नातू विशाल पाटील यांनी माघार घेण्यास नकार दिला. विशाल पाटील यांनी उमेदवारी अर्ज कायम ठेवली असून, त्यांना निवडणूक चिन्हही मिळालं आहे. त्यामुळे आता सांगलीत तीन पाटलांमध्ये खरी लढत रंगणार आहे.
चंद्रहार पाटील यांच्या वाटेत 'विशाल' आव्हान
विशाल पाटील यांनी उमेदवारी अर्ज भरतानाच स्पष्ट केले होते की आता माघार घेणार नाही. उलट महाविकास आघाडीनेच निर्णयाचा फेरविचार करावा. काँग्रेसकडूनही त्याबद्दलचा प्रस्ताव उद्धव ठाकरेंना दिला गेला. पण, त्यावर कोणताही निर्णय झाला नाही, अशी माहिती आहे.
हेही वाचा >> शरद पवारांचा नवनीत राणांविरोधात 'सातारा पॅटर्न', मेसेज काय?
या सगळ्यात काँग्रेस नेत्यांकडून विशाल पाटील यांची मनधरणी करण्याचे प्रयत्न गेल्या काही दिवसांपासून सुरू होते. विशाल पाटील यांनी माघार न घेतल्याने आता काँग्रेसकडून त्यांच्यावर कारवाई केली जाईल हे स्पष्ट आहे.
महाविकास आघाडीतील मित्रपक्षाचा उमेदवार चंद्रहार पाटील रिंगणात असल्याने काँग्रेसकडून विशाल पाटील यांची पक्षातून हकालपट्टी केली जाईल. त्यामुळे आता ते अपक्ष उमेदवार म्हणूनच निवडणुकीच्या प्रचारात फिरताना दिसतील.
भाजपतील असंतोष, उमेदवारी डावलल्याची सहानुभूती
पक्षाच्या भूमिकेच्या विरोधात जाऊन विशाल पाटील यांनी निवडणूक लढवण्याचा बाणा कायम ठेवला आहे. विशाल पाटील हे खूप आधीपासूनच या मतदारसंघातून निवडणूक लढवण्यास इच्छुक आहेत. पण, गेल्यावेळीही त्यांना काँग्रेसकडून उमेदवारी न देता स्वाभिमानी शेतकरी संघटनेकडून तिकीट दिले गेले होते.
याच मुद्द्यावरून विशाल पाटील यावेळी आक्रमक झालेले दिसत आहे. विशाल पाटील हे चांगले बोलतात, त्याचबरोबर वसंतदादा पाटील यांचे नातू असा राजकीय वारसा आणि मतदारसंघात गेल्या काही वर्षांपासून करत असलेल्या कामातून मतदारसंघात त्यांनी लोकांपर्यंत पोहोचण्याचे काम केले.
हेही वाचा >> शिंदे-ठाकरेंच्या जीवाला घोर; 'हा' फॅक्टर ठरवणार औरंगाबादचा खासदार!
भाजपने या मतदारसंघात भाजपने संजयकाका पाटील यांना उमेदवारी दिली आहे. संजयकाका पाटील सलग दोन वेळा येथून निवडून आले आहेत. दहा वर्षाचा काल लोटला आहे, त्यामुळे भाजपमध्येही त्यांच्याविरोधात सुप्त लहर आहे. दुसरीकडे विशाल पाटील यांच्यावर अन्याय झाल्याची भावना असणारा मोठा वर्गही सांगली मतदारसंघात आहे. या दोन्ही गोष्टी विशाल पाटील यांच्या पथ्यावर पडल्यास चंद्रहार पाटलांची म्हणजेच ठाकरेंच्या शिवसेनेला ही निवडणूक जड जाईल.
हेही वाचा >> "चहाच्या टपरीवर असताना उद्धव ठाकरेंनी दिली होती मुख्यमंत्रीपदाची ऑफर"
दुसरं समीकरण म्हणजे विशाल पाटील यांनी वंचित बहुजन आघाडीसह इतर राजकीय बेरीज करण्याचेही प्रयत्न केले आहेत. प्रतिक पाटील यांनी प्रकाश आंबेडकर यांची भेट घेतली. आणखी एक महत्त्वाचं म्हणजे मराठा आंदोलनाच्या काळात विशाल पाटील यांनी काम केले आहे. ओबीसी संघटनेनंही विशाल पाटील यांना समर्थन दिले आहे. त्याचबरोबर विशाल पाटील काँग्रेसचे आहेत, त्यामुळे काँग्रेसचा मतदारही त्यांच्या पारड्यात मते टाकू शकतात. त्यामुळे आजतरी विशाल पाटील हे संजयकाका पाटील यांना टक्कर देताना दिसतील. तर चंद्रहार पाटील यांच्यासाठी लढत अवघड होऊन बसली आहे.
2019 मध्ये कुणाला किती मिळाली होती मते?
संजय काका पाटील (भाजप) > 5 लाख 8 हजार 995 > 43 टक्के मते
विशाल पाटील (स्वाभिमानी शेतकरी पक्ष) > 3 लाख 44 हजार 643 > 29 टक्के मते
गोपीचंद पडळकर (वंचित बहुजन आघाडी) > 3 लाख 234 > 25 टक्के मते
ADVERTISEMENT
![follow whatsapp](/assets/icons/followWhatsApp.png)