Ajit Pawar Delhi : राज्यात शपथविधीची तयारी, पण अजित पवार कालपासून दिल्लीत तळ ठोकून, कुणाचा ताप वाढणार?

राज्यात मागच्या काही दिवसांप्रमाणे आजचा दिवसही राजकीय घडामोडींनी भरलेला होता. निकालानंतर 10 व्या दिवशीही मुख्यमंत्री आणि दोन उपमुख्यमंत्र्‍यांची नावं स्पष्ट झालेली नाहीत. तर दुसरीकडे एकनाथ शिंदे यांची प्रकृती काहीशीा खालावलेली आहे. काही वेळापूर्वीच एकनाथ शिंदे आणि अजित पवार यांची बर्षा बंगल्यावर भेट झाली. तर दुसरीकडे अजित पवार हे सध्या दिल्लीत आहेत. मागच्या काही दिवसांपासून एकनाथ शिंदे हे नाराज असून, मुख्यमंत्रि‍पदाच्या शर्यतीबाहेर पडल्यानंतर शिंदेंनी आता गृहमंत्रिपदासाठी आग्रह धरल्याचं दिसतंय. मात्र, दिल्लीत गेलेले अजित पवारही आता शिंदेंच्या बरोबरीचे खाते मागणार असल्याची शक्यता वर्तवली जाते आहे.
 
अजित पवार कालपासून (2 डिसेंबर) संध्याकाळपासून दिल्लीत आहेत. राज्यातील सत्तास्थापनेची चर्चा अंतिम टप्प्यात पोहोचली की नाही, हे अद्याप स्पष्ट झालेलं नाही. अशा परिस्थितीत अजित पवार गेल्या 24 तासांपासून दिल्लीत तळ ठोकून का आहेत? असा प्रश्न आता अनेकांना पडला आहे. अजित पवार हे शिंदेंच्या तुलनेत कमी खाती घेण्यासाठी तयार नसल्याची चर्चा आहे. तसंच यादरम्यान अजित पवार अमित शाह यांचीही भेट घेणार असल्याचीही शक्यता आहे. त्यामुळे आता अजित पवार यांच्या हालचालींचा अर्थ काय हे आता पुढच्या काही तासांमध्ये स्पष्ट होण्याची शक्यता आहे.