मुंबई: कॉंग्रेसचे माजी नेते आणि माजी गृहराज्यमंत्री कृपाशंकर सिंह हे बुधवारी भाजपमध्ये जाहीर प्रवेश करणार आहेत. मिळालेल्या माहितीनुसार, सिंह यांच्यासह नाशिक जिल्ह्यातील युवा नेते रावसाहेब कदम हे देखील बुधवारी मुंबईत होणाऱ्या कार्यक्रमात भाजपमध्ये प्रवेश करतील. महाराष्ट्राचे माजी मुख्यमंत्री आणि विद्यामान विरोधी पक्ष नेते देवेंद्र फडणवीस आणि भाजप प्रदेशाध्यक्ष चंद्रकांत पाटील यांच्या उपस्थित कृपाशंकर सिंह हे भाजपमध्ये प्रवेश करणार आहेत.
ADVERTISEMENT
माजी गृहराज्यमंत्री कृपाशंकर सिंह यांनी 10 सप्टेंबर 2019 रोजी काँग्रेस पक्षाचा राजीनामा दिला होता. त्यावेळी त्यांनी केंद्रातील भाजपा सरकारने जम्मू-काश्मीरमधून अनुच्छेद 370 हटविण्यास पाठिंबा दर्शविला होता. तेव्हापासून ते भाजपच्या गोटात जाऊ शकतात असा अंदाज वर्तवला जात होता. ते काँग्रेसच्या तिकिटावर कलिना विधानसभा मतदार संघातून तीन वेळा आमदार म्हणून निवडून आले होते.
दरम्यान, 2019 विधानसभा निवडणुकीच्या वेळी काँग्रेसकडून त्यांच्यावर जोरदार हल्ला चढविण्यात आला होता. निवडणुकीच्या पार्श्वभूमीवर कृपाशंकर हे भाजप किंवा शिवसेनेत प्रवेश करतील असं काँग्रेसने त्यावेळी म्हटलं होतं. पण मागील विधानसभा निवडणूक त्यांनी लढवलीच नाही.
गेल्या काही महिन्यांत त्यांनी पंतप्रधान नरेंद्र मोदी, केंद्रीय गृहमंत्री अमित शाह आणि भाजपचे राष्ट्रीय अध्यक्ष जेपी नड्डा यांची भेट घेतली असल्याची जोरदार चर्चा होती. त्यामुळे ते लवकरच भाजपमध्ये प्रवेश करतील अशी चर्चा होती. ज्यावर आता शिक्कामोर्तब झालं आहे. मागील काही दिवसांपासून ते देवेंद्र फडणवीस यांच्या देखील सतत संपर्कात होते.
बुधवारी दुपारी 12 वाजता कृपाशंकर सिहं हे फडणवीस आणि भाजपा प्रदेशाध्यक्ष चंद्रकांत पाटील यांच्या उपस्थितीत भाजपमध्ये प्रवेश करतील.
मुंबई महानगरपालिकेच्या पुढील वर्षी होणार्या निवडणुका लक्षात घेता कृपाशंकर सिंग यांचा भाजप प्रवेश महत्त्वाचा मानला जात आहे. गेल्या निवडणुकीत भाजपने शिवसेनेला जोरदार टक्कर दिली होती. शिवसेनेने भाजपच्या तुलनेने थोड्याच जागा जिंकल्या होत्या. जी शिवसेनेसाठी धोक्याची घंटा मानली जात आहे.
यावेळी मुंबई मनपावर भाजपचा झेंडा फडकवून शिवसेनेला सत्तेतून खाली ओढण्यासाठी भाजपने आतापासूनच तयारी केली आहे. विशेषत: गेल्या विधानसभा निवडणुकीनंतर शिवसेनेने ज्याप्रकारे राज्यातील सत्तेतून भाजपला खाली ओढलं त्या सगळ्याचा बदला भाजपला आता घ्यायचा आहे.
तसं काहीही नाही म्हणणाऱ्या मिथुन चक्रवर्तींची थेट BJP मध्ये एंट्री
भाजपला कृपाशंकर सिंह यांचा हिंदी भाषिक चेहरा मुंबई निवडणुकीसाठी ठरु शकतो उपयोगी
मुंबईत असे अनेक प्रभाग आहेत जिथे हिंदी भाषिक मतदार हे निर्णायक भूमिका बजावतात. मुळात हा वर्ग काँग्रेसशीच संबंधित आहे. पण 2014 नंतर मोदींच्या नावाने हिंदी भाषिक लोकांचा कल भाजपकडे आहे. परंतु मुंबई भाजपमध्ये हिंदी भाषिकांचा प्रभावी चेहरा नसल्यामुळे म्हणावा तेवढा मुंबई पालिका निवडणुकीत फायदा झाला नाही.
कृपाशंकर यांना आणून आता ही उणीव भाजपला दूर करायची आहे. मुंबईतील जवळपास 1.25 कोटी लोकसंख्येपैकी हिंदी भाषिकांची संख्या सुमारे 40 लाख आहे. कृपाशंकर सिंह यांच्या प्रवेशामुळे भाजपला मुंबईत बराच फायदा होऊ शकतो असा अंदाज सध्या वर्तवला जात आहे.
कृपाशंकर सिंह हे मुंबई कॉंग्रेसचे अध्यक्ष असताना त्यांनी आपल्या कार्यकाळात कॉंग्रेस-राष्ट्रवादी आघाडीच्या मुंबईतील सर्व सहा लोकसभा जागा जिंकून आणल्या होत्या. त्यापैकी पाच जागा कॉंग्रेसने जिंकल्या होत्या तर एक जागा त्यांचा मित्रपक्ष राष्ट्रवादीनी जिंकली होती.
तसंच मुंबई काँग्रेसचे अध्यक्ष असताना विधानसभा निवडणुकीत कॉंग्रेसने मुंबईतील 34 पैकी 22 जागा जिंकल्या होत्या. त्यापैकी सहा जागांवर हिंदी भाषिक आमदार प्रथमच निवडून आले होते. या सगळ्या गोष्टी लक्षात घेऊन कृपाशंकर सिंह यांना भाजपमध्ये प्रवेश देण्यात आला आहे.
ADVERTISEMENT
![follow whatsapp](/assets/icons/followWhatsApp.png)