–योगेश पांडे, नागपूर
ADVERTISEMENT
राज्यातील विधान परिषदेच्या सहापैकी चार जागी बिनविरोध निवडणूक होणार असली, तरी नागपूर आणि अकोला स्थानिक स्वराज संस्था मतदारसंघात मात्र, चुरशीची लढत होण्याची चिन्हं दिसत आहे. भाजपच्याच नगरसेवकाला पक्षात घेत काँग्रेसने उमेदवारी दिल्यानं भाजप सावध झाली आहे. नगरसेवकांचा घोडेबाजार टाळण्यासाठी भाजपने नगरसेवकांना गोव्याला हलवलं आहे.
नागपूर स्थानिक स्वराज्य संस्था विधान परिषद निवडणुकीकडे सगळ्याचंच लक्ष लागलेलं आहे. भाजपकडून माजी ऊर्जामंत्री चंद्रशेखर बावनकुळे यांना उमेदवारी देण्यात आलेली आहे. तर काँग्रेसने निवडणुकीच्या तोंडावर भाजपातून पक्षात आलेल्या डॉ. रवींद्र उर्फ छोटू भोयर यांना मैदानात उतरवलं आहे.
या राजकीय समीकरणामुळे भाजपला नगरसेवकांचा घोडेबाजारा होण्याची भीती आहे. निवडणुकीमध्ये नगरसेवकांचा घोडेबाजार होऊन मतं फुटू नये, यासाठी भाजपनं पक्षाच्या नगरसेवकांना मतदानापर्यंत बाहेर पाठवलं आहे. रविवारी रात्री उशिरा भाजपने नगरसेवकांना गोव्याला रवाना केलं आहे. नागपूर विमानतळावरून हे नगरसेवक रात्री गोव्याला रवाना झाले.
MLC election : कोल्हापुरात लढाईआधीच महाडिकांकडून तलावर म्यान, धुळ्यात पटेल बिनविरोध
‘काँग्रेसचे नेते नगरसेवकांच्या संदर्भात चर्चा करत आहेत. नगरसेवकांना बदनाम करण्याचा प्रयत्न करत आहेत. त्यामुळे आमच्या नगरसेवकांची काळजी आम्हाला वाटत आहे. नगरसेवकांना बदनाम करून जनतेमध्ये संभ्रम निर्माण केला जात आहे. याचा परिणाम येणाऱ्या निवडणुकीवर होण्याची शक्यता आहे. काँग्रेसच्या नेत्यांचा घोडेबाजार करण्याचा प्रयत्न यशस्वी होऊन नये म्हणून सर्व नगरसेवक अज्ञात स्थळी पाठवत आहोत, असं भाजपचे महानगरपालिकेतील नेते अविनाश ठाकरे म्हणाले.
काँग्रेसचं ‘मिशन नागपूर’
विधान परिषदेच्या सहा रिक्त जागांसाठी निवडणूक होत असून, यातील चार जागांचे निकाल स्पष्ट झाले आहे. नागपूर स्थानिक स्वराज्य संस्था, अकोला-बुलढाणा-वाशिम या दोन मतदारसंघातच बिनविरोध निवडणूक होऊ शकलेली नाही. त्यामुळे या मतदारसंघाकडे सगळ्याचं लक्ष आहे. काँग्रेसनं विदर्भावर लक्ष केंद्रीत केलेलं असून, नागपूरमध्ये दबदबा निर्माण करण्यासाठी भाजपचीच खेळी खेळली आहे.
भाजपच्या चंद्रशेखर बावनकुळे यांच्याविरोधात काँग्रेसनं भाजपचे डॉ. रवींद्र उर्फ छोटू भोयर यांना उमेदवारी दिली आहे. भोयर स्वतःच नगरसेवक असल्यानं भाजपला नगरसेवक फुटण्याची भीती आहे. त्यामुळे भाजपनं मतांना फटका बसू नये म्हणून आता सावध पावलं टाकल्याचं दिसत आहे.
ADVERTISEMENT
![follow whatsapp](/assets/icons/followWhatsApp.png)