Nirav Modi ला झटका, लंडन कोर्टाने दिली प्रत्यार्पणाला मंजुरी

काय म्हटलं आहे लंडन कोर्टाने?

वेस्टमिंस्टर मॅजिस्ट्रेट कोर्टाचे न्यायाधीश सॅम्यअल गोजी यांनी या संदर्भातला निर्णय देताना असं म्हटलं आहे की, “नीरव मोदीला भारतात बऱ्याच प्रश्नांची उत्तरं द्यायची आहेत. भारतात तो दोषी ठरणार यात काहीही शंका नाही. नीरव मोदीच्या वतीने जी काही कबुली देण्यात आली त्यामध्ये परस्परविरोध दिसतो आहे. पहिल्याच फटक्यात समजून जातं की सगळे पुरावे हे नीरव मोदीच्या विरोधात आहेत. भारताची न्यायव्यवस्था निष्पक्षपाती आहे. त्यामुळे भारतात नीरव मोदीचं प्रत्यार्पण केलंच पाहिजे.” असं म्हणत नीरव मोदीने केलेली याचिका लंडन कोर्टाने फेटाळली आहे.

लंडन कोर्टाने दिलेल्या या निर्णयामुळे नीरव मोदीला भारतात आणण्याचा मार्ग मोकळा झाला आहे. त्याला तातडीने भारतात आणलं जाईल की नाही हे अद्याप स्पष्ट झालेलं नाही. अद्याप नीरव मोदीकडे वरच्या कोर्टात याचिका करण्याचा पर्याय उपलब्ध आहे.

नीरव मोदी सध्या लंडनच्या तुरुंगात आहे, ब्रिटनच्या कोर्टात त्याच्या प्रत्यार्पणावर आज सुनावणी झाली. ही सुनावणी गेल्या काही महिन्यांपासून सुरू होती. याप्रकरणी अखेर आज निकाल देत त्याच्या प्रत्यार्पणाला मंजुरी देण्यात आली आहे. भारतासाठी हा मोठा विजय मानला जातो आहे.

पंजाब नॅशनल बँकेत नीरव मोदीने १३ हजार कोटींचा घोटाळा केल्याचा मुख्य आरोप त्याच्यावर आहे. नीरव मोदीची बहीण पूर्वी मोदी आणि तिचा पती या दोघांनीही माफीचा साक्षीदार होण्यास संमती दिली आहे. मुंबईतल्या कोर्टात या दोघांनी एक अर्ज दाखल केला. त्यात असं म्हटलं होतं की जर हा अर्ज कोर्टाने मंजूर केला तर आम्ही नीरव मोदीच्या विरोधात साक्ष देण्यास तयार आहोत. नीरव मोदीने जो १३ हजार कोटींचा घोटाळा केला त्या सगळ्या प्रकरणाचे पुरावे ED ने गोळा केले आहेत. ईडीलाही आम्ही पूर्णपणे सहकार्य करू असंही पूर्वी मोदी आणि तिच्या पतीने म्हटलं आहे.