अजित पवारांनी काढलेल्या चिठ्ठीत निघालं ‘आदित्य’ नाव, CM एकनाथ शिंदे म्हणाले…

Ajit Pawar Eknath Shinde Aaditya Thackeray : छत्रपती संभाजीनगरमध्ये वाघिणीच्या तीन बछड्यांचं बारसं झालं. मुख्यमंत्री एकनाथ शिंदे, उपमुख्यमंत्री अजित पवार, वनमंत्री सुधीर मुनगंटीवार यांच्या उपस्थितीत हा कार्यक्रम पार पडला. पण, हा कार्यक्रम चर्चेत आला तो आदित्य नावामुळे! अजित पवारांनी काढलेल्या एका चिठ्ठीत निघालेल्या आदित्य नावामुळे राजकीय वैराची प्रचिती बघायला मिळाली. किस्सा नेमका काय, तेच वाचा…

मराठवाडा मुक्तिसंग्राम दिनाच्या निमित्ताने सरकारचा छत्रपती संभाजीनगरमध्ये मुक्काम झाला. मंत्रिमंडळ बैठकीसह अनेक कार्यक्रम पार पडले. यात एक कार्यक्रम झाला वाघिणीला झालेल्या तीन बछड्यांच्या बारसाचा. बछड्यांची चिठ्ठ्या काढून नाव ठेवण्यात आली.

अजित पवारांनी चिठ्ठी काढल्यानंतर काय घडलं?

वाघिणीने तीन बछड्यांना जन्म दिला आहे. यात एक मादी आणि दोन नर आहेत. यासाठी काही नावांच्या चिठ्ठ्या टाकण्यात आल्या. यावेळी उपमुख्यमंत्री अजित पवारांनी चिठ्ठी काढली. या चिठ्ठीत आदित्य नाव होतं. अजित पवारांनी सुधीर मुनगंटीवारांना चिठ्ठीतील नाव दाखवलं आणि सांगितलं की, ‘आदित्य आहे… आदित्य’.

हेही वाचा >> Narendra Modi Net Worth : मोदींकडे किती आहे संपत्ती? कुठे केलीये गुंतवणूक?

त्यावर वनमंत्री सुधीर मुनगंटीवार म्हणाले, ‘एक नाव निघालं, पण ते मागे घ्या. ते आदित्य निघालं.’ त्यानंतर अजित पवारांनी दुसरी चिठ्ठी काढली. त्या चिठ्ठीत नाव निघालं विक्रम. दुसऱ्या बछड्याचं नाव निघालं कान्हा. मादी बछड्याला श्रावणी नाव देण्यात आलं.

हेही वाचा >> Brown, Whole Wheat, Multigrain Bread : ब्रेड खाणं तुमच्या आरोग्यासाठी चांगलं की हानिकारक?

एकनाथ शिंदे काय म्हणाले?

या कार्यक्रमानंतर मुख्यमंत्री एकनाथ शिंदे आणि उपमुख्यमंत्री अजित पवार यांची पत्रकार परिषद झाली. एका चिठ्ठीत आदित्य नाव निघालं होतं, असा मुद्दा शिंदेंवर उपस्थित करण्यात आला. त्यावर एकनाथ शिंदे म्हणाले, “नाही हो. चिठ्ठ्या काढल्या, त्यात एकदम दोन चिठ्ठ्या निघाल्या.” त्याचवेळी अजित पवार म्हणाले, “मला आठवत नाही.”