Dhananjay Munde Beed : बीडचं पालकमंत्रीपद धनंजय मुंडेंच्या हातातून जाणार का? CM फडणवीस, अजितदादा काय निर्णय घेणार?

राज्यात पुन्हा महायुतीचं सरकार आल्यानंतर झालेलं पहिलंच अधिवेशन गाजलं ते मस्साजोगच्या प्रकरणामुळे. मस्साजोगचे सरपंच संतोष देशमुख यांच्या निघृन हत्येनंतर हा मुद्दा विरोधकांनी उचलून धरला. विरोधकांबरोबरच सत्ताधारी आमदारांनी हा मुद्दा लावून धरला. या सगळ्या प्रकरणामध्ये धनंजय मुंडे यांचे निकटवर्तीय असलेल्या वाल्मिक कराड यांचं नाव विरोधकांकडून अनेकदा घेण्यात आलं. धनंजय मुंडे देखील अधिवेशनात दिसले नाहीत. हे प्रकरण गाजल्यानंतर मुख्यमंत्री देवेंद्र फडणवीस यांनी या प्रकरणाची गंभीर दखल घेतली.

बीडच्या एसपींची फडणवीसांनी बदली केली. त्याचबरोबर या प्रकरणाचा तपास एसआयटीच्या माध्यमातून करणार असल्याचं देखील फडणवीसांनी जाहीर केलं. असं असलं तरी धनंजय मुंडे यांच्या निकटवर्तीयाचं नाव या सगळ्या प्रकरणात घेतलं जात असल्यानं मुंडेंना मंत्रिमंडळात ठेवून या प्रकरणाची चौकशी कशी होणार असा प्रश्न देखील विरोधकांकड़ून उपस्थित करण्यात आला. 

हे ही वाचा >> CM Devendra Fadnavis यांची बदनामी करणाऱ्या पोस्ट टाकणाऱ्या 12 सोशल मिडीया युजर्सविरोधात FIR, यादीत कोणकोणती नावं?

दुसरीकडे अधिवेशनाच्या शेवटच्या दिवशी अजित पवारांनी देशमुख कुटुंबियांची भेट घेतली. अजित पवारांनी गावकऱ्यांकडून घटनाक्रमाची माहिती घेतली. यावेळी धनंजय मुंडेंना मंत्रिमंडळातून काढून टाकण्याची मागणी गावकऱ्यांकडून करण्यात आली. रविवारी अजित पवारांचा नागरी सत्कार बारामतीत पार पडला यावेळी देखील अजित पवारांनी मस्साजोगच्या घटनेतील मास्टरमाईंडला सोडणार नसल्याचं ते म्हणाले. 

हे ही वाचा >>  Allu Arjun Stampede Case : अल्लू अर्जून पुन्हा पोलीस स्टेशनमध्ये, आज चौकशी होणार? हैदराबादमध्ये नेमकं काय घडतंय?

एकीकडे मस्साजोगच्या प्रकरणामुळे धनंजय मुंडे यांच्या निकटवर्तीयावर आरोप केले जात असताना धनंजय मुंडे यांना पालकमंत्री पद मिळणार का याबाबत शंका उपस्थित केली जात आहे. मंत्रिमंडळाची स्थापन झाल्यानंतर आता पालकमंत्रिपदं कोणाला मिळणार याकडे सर्वांचं लक्ष लागलं आहे. अनेक जिल्ह्यांमध्ये मंत्र्यांची संख्या अधिक असल्याने पालकमंत्रिपदामध्ये रस्सीखेच सुरु आहे. बीडमधून धनंजय मुंडे आणि पंकजा मुंडे हे दोघे मंत्री आहेत. धनंजय मुंडे याआधी बीडचे पालकमंत्री राहिले आहेत. बीडमध्ये कशा पद्धतीने गुन्हेगारी चालते याबाबात सुरेश धस, आव्हाड आणि संदीप क्षीरसागर यांनी सभागृहात माहिती दिली आहे. पालकमंत्री म्हटल्यावर त्या जिल्ह्याचं पालकत्व त्या मंत्र्याकडे असतं आता धनंजय मुंडे यांच्या जवळच्या सहकाऱ्याची चौकशी होत असल्याने पालकमंत्री पदावरुन धनंजय मुंडे यांचा पत्ता कट होण्याची शक्यता आहे. दुसरीकडे पंकजा मुंडे या देखील मंत्री असल्याने लोकांचा रोष कमी करण्यासाठी बीडचं पालकमंत्रीपद पंकजा मुंडेंना दिलं जाऊ शकतं. 

अर्थात काही काळात या सगळ्याचा खुलासा होण्याची शक्यता आहे. तुम्हाला काय वाटतं धनंजय मुंडेंना बीडचं पालकमंत्रीपद मिळायला हवं का? आम्हाला कमेंट करुन सांगायला विसरु नका.