Nanded Lok Sabha By Election 2024: नांदेड लोकसभेची पोटनिवडणूक जाहीर, 'या' तारखेला होणार मतदान

काँग्रेस आमदार वसंत चव्हाण यांचे 26 ऑगस्ट रोजी अकाली निधन झाले होते. त्यानंतर लोकसभा सचिवालयाने नांदेडची जागा रिक्त झाल्याची माहिती 30 ऑगस्टलान केंद्रीय निवडणूक आयोगाला कळवली होती. त्यामुळे नांदेडचे दिवंगत खासदार वसंत चव्हाण यांच्या निधनानंतर नांदेडमध्ये पोटनिवडणूक लागणार होती. त्यात निवडणूक आयोग विधानसभा निवडणुकीसोबत नांदेडची पोटनिवडणूक जाहीर करेल अशी चर्चा होती. तसेच झाले असून आता नांदेडची पोटनिवडणूकीसाठी मतदान हे 20 नोव्हेंबरला पार पडणार आहे. तर 23 नोव्हेंबरला निकाल लागणार आहे. 

हे ही वाचा : 2024 Maharashtra Assembly Election Full Schedule: बिगुल वाजला! महाराष्ट्र विधानसभा निवडणुकीच्या तारखा जाहीर, निकाल 'या' तारखेला

नांदेडमध्ये काँग्रेस आमदार वसंत चव्हाण यांनी भाजपचे प्रतापराव चिखलीकर यांना पराभवाची धूळ चारली होती. लोकसभेत प्रतापराव चिखलीकर यांना 4 लाख 69 हजार 452 मतं पडली होती. तर वसंत चव्हाण यांना 5  लाख 28 हजार 894 मतं पडली होती. त्यामुळे नांदेडमधून वसंत चव्हाण विजयी ठरले होते. या विजयानंतर  काँग्रेस खासदार वसंत चव्हाण यांचे 26 ऑगस्ट रोजी अकाली निधन झाले होते. त्यांच्या जाण्याने काँग्रेस पक्षाला मोठा धक्का बसला होता. 

दरम्यान वसंत चव्हाण यांच्या अचानक जाण्याने काँग्रेसला वसंत चव्हाण यांची गादी त्यांच्या चिरंजीवानेच चालवावी असे वाटत होते. त्यामुळे लोकसभा पोटनिवडणुकीसाठी रवींद्र चव्हाण यांच्या उमेदवारीचा जिल्हा काँग्रेसने ठरावही संमत केला होता. भाजपमधून नांदेडच्या लोकसभा पोट निवडणुकीसाठी काही नावे समोर येत असून नक्की कोणाला उमेदवारी दिली जाणारी याकडे सर्वांचे लक्ष आहे.