Manoj Kumar Death: बॉलिवूडचे ‘भारत कुमार’ काळाच्या पडद्याआड, ज्येष्ठ अभिनेते मनोज कुमार यांचं निधन
Manoj Kumar Death News: भरत कुमार म्हणून प्रसिद्ध असलेले ज्येष्ठ अभिनेते मनोज कुमार यांचे निधन झाले आहे. मुंबईतील कोकिलाबेन धीरूभाई अंबानी रुग्णालयात वयाच्या ८७ व्या वर्षी त्यांनी अखेरचा श्वास घेतला.
ADVERTISEMENT
मुंबई: बॉलिवूडमधून एक दुःखद बातमी आली आहे. ज्येष्ठ अभिनेते मनोज कुमार यांचे निधन झाले आहे. शुक्रवारी वयाच्या ८७ व्या वर्षी मुंबईतील कोकिलाबेन धीरूभाई अंबानी रुग्णालयात त्यांनी अखेरचा श्वास घेतला. पहाटे ३.३० च्या सुमारास त्यांनी अखेरचा श्वास घेतला. ते बऱ्याच काळापासून वयाशी संबंधित आजारांनी ग्रस्त होते. त्यांनी त्यांच्या चित्रपट कारकिर्दीत अनेक देशभक्तीपर चित्रपट केले होते, त्यामुळे त्यांचे चाहते त्यांना प्रेमाने 'भारतकुमार' म्हणत.
शनिवारी करण्यात येणार अंत्यसंस्कार
मनोज कुमार यांच्या पार्थिवावार शनिवारी (५ एप्रिल) दुपारी 12 वाजता मुंबईतील विलेपार्ले येथे अंत्यसंस्कार केले जातील. मनोज कुमार यांच्या कुटुंबातील काही सदस्य परदेशात राहतात, त्यामुळे कुटुंबाने शनिवारी अंतिम संस्कार करण्याचा निर्णय घेतला आहे. त्यांचे पार्थिव सध्या कोकिलाबेन रुग्णालयात ठेवण्यात येईल. शनिवारी, त्यांचे पार्थिव त्यांच्या जुहू येथील घरी नेले जाईल.
जीवन आणि कारकीर्द
मनोज कुमार यांचा जन्म २४ जुलै १९३७ रोजी हरिकिशन गिरी गोस्वामी या नावाने एबटाबाद (सध्याचे पाकिस्तान) येथे झाला. भारत-पाकिस्तान फाळणीनंतर त्यांचे कुटुंब दिल्लीत स्थायिक झाले. फाळणीच्या दुःखद आठवणी त्यांनी जवळून अनुभवल्या होत्या, ज्याचा प्रभाव त्यांच्या चित्रपटांमध्येही दिसून येतो. लहानपणापासूनच त्यांना अभिनयाची आवड होती. अशोक कुमार आणि दिलीप कुमार यांच्या चित्रपटांनी प्रभावित होऊन त्यांनी आपले नाव मनोज कुमार असे ठेवले आणि चित्रपटसृष्टीत प्रवेश केला.
त्यांनी १९५७ मध्ये "फॅशन" या चित्रपटातून आपल्या कारकिर्दीला सुरुवात केली. त्यानंतर "कांच की गुड़िया" (१९६१) मध्ये त्यांनी पहिली मुख्य भूमिका साकारली. पण खरी ओळख त्यांना "शहीद" (१९६५), "उपकार" (१९६७), "पूरब और पश्चिम" (१९७०), "रोटी कपड़ा और मकान" (१९७४) आणि "क्रांति" (१९८१) या देशभक्तीपर चित्रपटांमुळे मिळाली. या चित्रपटांनी त्यांना "भारत कुमार" ही पदवी मिळवून दिली. त्यांच्या चित्रपटांमध्ये देशप्रेम, सामाजिक संदेश आणि भारतीय संस्कृतीचे दर्शन घडते. त्यांनी अभिनयाबरोबरच दिग्दर्शन आणि पटकथा लेखनातही आपली छाप पाडली.
पुरस्कार आणि सन्मान
मनोज कुमार यांच्या योगदानाची दखल घेऊन त्यांना अनेक पुरस्कारांनी गौरवण्यात आले. १९९२ मध्ये त्यांना पद्मश्री आणि २०१५ मध्ये भारतीय चित्रपटसृष्टीतील सर्वोच्च सन्मान "दादासाहेब फाळके पुरस्कार" प्रदान करण्यात आला. याशिवाय त्यांना एक राष्ट्रीय चित्रपट पुरस्कार आणि सात फिल्मफेअर पुरस्कारही मिळाले.
पंतप्रधान मोदींकडून शोकसंदेश
मनोज कुमार यांच्या निधनाची बातमी समजताच चित्रपटसृष्टी आणि राजकीय क्षेत्रातून शोकसंदेशांचा ओघ सुरू झाला. पंतप्रधान नरेंद्र मोदी यांनी आपल्या संवेदना व्यक्त करताना म्हटले, "मनोज कुमार हे भारतीय सिनेमाचे प्रतीक होते. त्यांच्या देशभक्तीच्या जोशाने पीढ्यांना प्रेरणा दिली. त्यांचे कार्य राष्ट्रीय गौरवाची भावना जागृत करत राहील." संरक्षणमंत्री राजनाथ सिंह यांनीही त्यांना श्रद्धांजली वाहिली आणि त्यांच्या चित्रपटांनी भारतीय संस्कृती समृद्ध केल्याचे नमूद केले.
चित्रपट निर्माते अशोक पंडित यांनीही आपल्या भावना व्यक्त करताना म्हटले, "दादासाहेब फाळके पुरस्कार विजेते मनोज कुमार हे आमचे प्रेरणास्थान होते. त्यांच्या जाण्याने चित्रपटसृष्टीला मोठी हानी झाली आहे."
हे ही वाचा>> Viral News: लिंग बदलून आधी सरिताचा झाला शरद.. आता स्वत: बनला बाप, बायकोने दिला बाळाला जन्म
हरिकिशन कसे बनले मनोज कुमार?
मनोज कुमार यांचे खरे नाव हरिकिशन गिरी गोस्वामी असे होते. चित्रपटसृष्टीच्या प्रेमासाठी त्यांनी आपल्या नावात बदल केला होता. पण त्यांना खरी ओळख ‘भारत कुमार’ या नावाने मिळाली. मनोज कुमार यांचा जन्म 24 जुलै 1937 रोजी एबटाबाद (आता पाकिस्तानमध्ये) या ठिकाणी झाला. हरिकिशन गिरी गोस्वामी यांचे कुटुंब फाळणीनंतर भारतात आले आणि दिल्लीत स्थायिक झाले. मनोज कुमार यांनी फाळणीचे दुःख जवळून अनुभवले होते.
लहानपणापासूनच त्यांना अभिनयाची आवड होती. अशोक कुमार, दिलीप कुमार आणि कामिनी कौशल यांच्या चित्रपटांमुळे ते खूप प्रभावित झाले. यामुळे त्यांनी आपले हरिकिशन हे नाव बदलत मनोज कुमार असे केले.
हे ही वाचा>> Pune : पहिल्याच दिवशी कामाला गेला, सिलेंडरच्या स्फोटात तरूण दगावला, 'त्या' दुकानात काय घडलं?
1992 मध्ये त्यांना पद्मश्री पुरस्कारानेही सन्मानित करण्यात आले होते. मनोज कुमार यांना त्यांच्या चित्रपटसृष्टीतील योगदानाबदल दादासाहेब फाळके पुरस्कारानेही गौरवण्यात आले आहे.
हे वाचलं का?
