Bhiwandi: लिव्ह इनमध्ये राहणाऱ्या प्रेयसीचा कटरने गळा चिरला, अन् आरोपीने…

ओळखीचे रुपांतर प्रेमात

भिवंडीमधील कोनगावमध्ये गेल्या काही दिवसांपासून मधू प्रजापती ही आपला प्रियकर शब्बीर दिलावर शेख (वय 32) याच्याबरोबर राहत होती. मधू ही नवऱ्यापासून विभक्त राहत होती. त्यानंतर ती एका कंपनीतही नोकरी करत होती. त्यावेळी तिची ओळख शब्बीर दिलावर शेख बरोब झाली होती. काही दिवसांनी त्यांच्या ओळखीचे रुपांतर प्रेमात झाले. त्यानंतर ती दोघं भाडोत्री रुम घेऊन भिवंडीतील कोनगावमधील गणेशनगरमध्ये राहत होती. काही दिवस एकत्र राहिल्यानंतर शब्बीर शेख हा तिच्या चारित्र्यावर संशय घेत होता. त्यावरुनच त्यांची अनेकदा वाद होत होते.

हे ही वाचा >> आमदार अपात्रतेबाबतच्या हालचालींना वेग, राहुल नार्वेकरांनी दिले मोठे संकेत

लिव्ह इन रिलेशन आणि संशय

शब्बीर आणि मधू ही दोघं लिव्ह इन रिलेशनमध्ये राहत असतानाच त्यांच्यामध्ये वाद होण्यास सुरुवात झाली होती. शब्बीर हा तिच्यावर कायम संशय घेत असल्याने दोघांमध्ये खटकेही उडत होते. त्यावरुनच 15 सप्टेंबर रोजी त्या दोघांचे वाद झाले. हा वाद इतका टोकाला गेला की, शब्बीरने रागाच्या भरात धारदार कटरने मधूचा गळा चिरला व तिच्या दोन्ही हाताच्या नसाही कापल्या. त्यानंतर तिचा मृतदेह त्याने तसाच त्या खोलीत टाकून तो पश्चिम बंगालला फरार झाला होता.

खोलीतून दुर्गंधी सुटली

शब्बीरने मधूची हत्या करुन खोलीतच मृतदेह टाकून गेल्यामुळे काही दिवसांनी खोलीतून दुर्गंधी सुटली. त्यानंतर शेजाऱ्याच्यांनी कोनगाव पोलिसांना माहिती दिली. या घटनेची माहिती मिळाल्यानंतर वरिष्ठ पोलीस निरीक्षक राजेंद्र पवार आणि त्यांच्या सहकाऱ्यांनी खोलीचे कुलूप तोडून घरात प्रवेश केला. त्यावेळी गळा चिरलेल्या अवस्थेत मधूचा मृतदेह आढळून आला. त्यानंतर शवविच्छेदनासाठी तो मृतदेह जेजे रुग्णालयात पाठवण्यात आला.

मैत्रिणीने दिली फिर्याद

मधू प्रजापतीची हत्या झाल्यानंतर तिची मैत्रीण अनिता शर्मा यांनी शब्बीर शेख याच्याविरोधात पोलिसात तक्रार दाखल केली होती. या दोघांसोबतच आणखी एक महिला आणि पुरुषही राहत असल्याची माहिती आता पोलिसांना मिळाली आहे. शब्बीर राहत असलेल्या ठिकाणच्या सीसीटीव्ही फुटेजवरून त्याचा शोध घेण्यास पोलिसांना मदत झाली आहे.

हे ही वाचा >> क्रुरतेचा कळस गाठणाऱ्याचा एन्काऊंटर, ट्रेनमध्ये महिला कॉन्स्टेबलची केली होती हत्या

पोलिसांचे वेषांतर

मधू आणि शब्बीरचा जेव्हा वाद झाला होता. त्या दिवशी शब्बीरच्या हातालाही मार लागला होता. त्यामुळे तो गावी फरार झाल्यानंतर दवाखान्यात उपचारासाठी गेला होता. त्यावेळी पोलिसांनी वेषांतर करुन त्याच्या सासरवाडीला पोलीस पोहचले होते. तो रुग्णालयात पोलिसांनी सापळा रचून त्याला ताब्यात घेतले, त्यानंतर 21 सप्टेंबर रोजी कोनगाव पोलीस स्थानकात त्याच्याविरोधात गुन्हा नोंद करण्यात आला.