Digital Scam: बँक खात्यात पैसे नाही तरी तुमच्या लाखो रुपयांवर डल्ला, काय आहे हे नवं Scam?

तुमच्या बँक खात्यावर फार थोडे पैसे आहेत, मग तुम्हाला या टोळ्या कशा लुटतील या आत्मविश्वासात असलेल्या प्रत्येकासाठी हा धोक्याचा इशारा आहे. कारण आता तुमच्या खात्यातले पैसे सोडाच, पण थेट तुमच्या नावावर बँक लोन घेऊन ते पैसे लुटणाऱ्या टोळ्या सक्रीय झाल्या आहेत. हे लोन तुमच्या नावावर घेतलं गेल्यानं तुम्हाला मोठं नुकसान यामुळे होऊ शकतं.

हे ही वाचा>> Govt Job: NHM अंतर्गत सरकारी नोकरीची सुवर्ण संधी! अशी आहे अर्ज प्रक्रिया... 

काय आहे डिजिटल अरेस्ट स्कॅम?

तुम्हाला एखाद्या नंबरवरुन कॉल येतो आणि तुम्हाला सांगितलं जातं की तुमच्या नावाने विदेशात जाणाऱ्या पार्सलमध्ये ड्रग्ज सापडलं किंवा तुमच्या खात्याचा वापर मनीलाँड्रींगसाठी झालाय. अशी बतावणी करून तुमचा या गुन्ह्यात सहभाग असल्याचं म्हणत तुमच्यावर अनेक खोटे आरोप करत, तुम्हाला घाबरवलं जातं. 

अचानक आलेल्या या फोनमुळे घाबरलेले अनेकजण जाळ्यात अडकतात. कारण खरं नाट्य यापूढे सुरू होतं. तुम्हाला डिजिटल अरेस्ट करून तुम्हाला कॅमेऱ्यासमोर राहायला सांगितलं जातं. तसंच यादरम्यान तोतया CBI किंवा अन्य काही तपास अधिकारी तुम्हाला व्हाट्सअप कॉल आणि त्यानंतर स्क्रिन शेअरींग करायला सांगतात. त्यानंतर तुमच्या फोनवर बँकेकडून ओटीपी येतो आणि स्क्रिन शेअरींग सुरू असल्यानं तो ओटीपी त्यांना सहज पाहता येतो.

हे ही वाचा>> Ladki Bahin Yojana : 'दिवाळी बोनस'साठी 'या' महिलाच पात्र, खटाखट 5500 येणार खात्यात?

इथेच आपण फसतो आणि हवं तेवढं बँक लोन आपल्या नावाने घेतलं जातं. कारण आज अनेक बँका आपल्या नावाने प्री अप्रूव्हड लोन देतात. यासाठी फक्त एका ओटीपीची गरज असते. त्यामुळे अनेक टोळ्या याचा फायदा घेऊन लोकांना लुटताना दिसतायत. 

या घटनांपासून कसं सुरक्षित राहाल? 

१. अनोळखी नंबरवरुन येणारे कॉल उचलणं टाळा.

२. अनोळखी कॉलवर बोलताना सावधान राहा. 

३. ओटीपी कुणाशीही शेअर करू नका. 

४. बँक खात्याशी संबंधीत माहितीदेखील कुणाला देऊ नका.

५. बँक खात्यासाठी आणि ऑनलाईन बँकिंगसाठी लागणारे स्ट्राँग पिन आणि पासवर्ड वापरा. 

६. बँक खात्यात येणाऱ्या आणि जाणाऱ्या लहानात लहान रकमेवर आणि व्यवहारावर लक्ष ठेवा.