Lok Sabha Election: भाजपने एक जागा बळकावली, शिंदेंनी गमावली... अमित शाहांची भर सभेत 'ती' घोषणा!

जाणून घ्या जाहीर सभेत अमित शाहांनी नेमकी काय घोषणा केली..

' नरेंद्र मोदी हे देशातील एकमेव नेते आहेत की, ज्यांना 14 देशांनी त्यांच्या देशातील सर्वोच्च पुरस्कार.. म्हणजे भारतरत्नसारखे पुरस्कार दिले आहेत. हा मोदींचा, भाजपचा सन्मान नाही. हा देशातील 130 कोटी जनतेचा आणि माझ्या संभाजीनगरमधील बंधू-भगिनींचा सन्मान आहे. मोदीजी जगात भारताचा सन्मान वाढवत आहेत.' 

'काँग्रेसने काय केलं.. काँग्रेस पक्ष आणि घमेंडी आघाडी.. जे महाराष्ट्रात आमच्याविरोधात निवडणूक लढणार आहेत.. त्यांना ओळखा.. त्यांनी 370 कलम, ट्रिपल तलाक, ओबीसी आयोग बनवण्यास विरोध केला. रामजन्मभूमीच्या प्राणप्रतिष्ठापनेला देखील यांनी विरोध केला.'

हे ही वाचा> 'लोकसभेत महाराष्ट्र कमी पडणार नाही', पंकजा मुंडेनी अमित शाहांना शब्दच दिला

'ही लोकं काही चांगलं काम करू शकत नाही. देशाला जगात पुढे न्यायचं आहे तर केवळ मोदीजीच ते करू शकतात..' 

'आणि मी तर संभाजीनगर मागून घेतलंय मित्रांनो... संभाजीनगर मागून घेतलंय.. संपूर्ण देशात संभाजीनगरचं जेव्हा नाव घेतलं जातं.. तेव्हा विचारतात की, तिथला खासदार कोण आहे? तेव्हा म्हणतात की, मजलीसचा आहे..' 

 

'तुम्ही आज इथून ठरवून जाणार का? की, या मजलीसला उखाडून टाकूच आणि मोदीजींना एक कमळ येथून भेट देऊ.. तुम्ही हे ठरवणार आहात का?' 

असं म्हणत अमित शाह यांनी एक गोष्ट स्पष्ट केली आहे की, लोकसभा निवडणुकीसाठी छत्रपती संभाजीनगरमधून भाजपचा उमेदवार असेल. 

शिंदे गटाला मोठा धक्का?

महायुतीतील जागा वाटपाचा प्रश्न अद्यापही कायम आहे. त्यामुळेच भाजपने पहिल्या यादीत महाराष्ट्रातील एकाही जागेवरील उमेदवार जाहीर केला नाही. असं असताना दुसरीकडे अमित शाह यांनी आता छत्रपती संभाजीनगर भाजपच लढवणार यावर शिक्कामोर्तब करून टाकलं आहे. जो शिंदे गटासाठी मोठा धक्का आहे.. 

2019 साली शिवसेनेने जेवढ्या जागा लढवल्या होत्या तेवढ्याच जागा आपल्याला मिळाव्यात यासाठी शिंदे गट आग्रही आहे. याच जागांमध्ये संभाजीनगरची जागाही शिवसेनेकडे होती. पण आता त्यावर भाजप आपला उमेदवार देणार आहे. त्यामुळे शिवसेनेतील इच्छुकांच्या आकांक्षांवर पाणी फिरलं आहे.

हे ही वाचा> Amruta Fadnavis सापडल्या अडचणीत ठाकरे धावले मदतीला!

2019 मध्ये जे जागा वाटप झाला होतं त्यात संभाजीनगरची जागा ही शिवसेनेच्या वाट्याला आली होती. याआधी त्या जागी अनेक वर्ष शिवसेनेचे चंद्रकांत खैरे हे निवडून येत होते. पण 2019 च्या लोकसभा निवडणुकीत हर्षवर्धन जाधवांच्या अपक्ष उमेदवारीमुळे चंद्रकांत खैरे यांचा पराभव झालेला आणि त्याठिकाणी एमआयएमचे इम्तियाज जलील हे निवडून आले होते. 

मात्र, असं असलं तरीही जागा वाटपात आपल्याला ही जागा मिळावी अशी मागणी  शिंदे गट सुरुवातीपासून करत होता. मात्र, अमित शाह यांनी अत्यंत अनपेक्षितपणे या जागेबाबत थेट घोषणा करत त्यांची मागणी धुडकावून लावली आहे. त्यामुळे आता जागा वाटपादरम्यान, एकनाथ शिंदे नेमकी काय भूमिका घेणार हे पाहणं अत्यंत महत्त्वाचं ठरणार आहे.