Maharashtra Politics : ना मविआ, ना महायुती... राज्यात कुणालाही बहुमत मिळणार नाही? काय आहे तज्ञांचा अंदाज?

विधानसभेच्या 288 जागांपैकी महायुतीमधील पक्षांनी 284 जागा आपापसात वाटून घेतल्या असून, चार जागा छोट्या मित्रपक्षांसाठी सोडल्या आहेत. महायुतीमध्ये भाजप 152 जागा लढवणार असून त्यापाठोपाठ मुख्यमंत्री एकनाथ शिंदे यांच्या शिवसेनेने 80 जागांवर उमेदवार मैदानात उतरवलेत आहेत. तर उपमुख्यमंत्री अजित पवार यांच्या राष्ट्रवादी काँग्रेसला फक्त 52 जागा मिळाल्या आहेत.

दुसरीकडे महाविकास आघाडीमध्ये काँग्रेसने 101 जागा मिळवण्यात यश मिळवलं. उद्धव ठाकरे यांच्या शिवसेनेने (UBT) 96 जागांवर आणि शरद पवार यांच्या राष्ट्रवादीने 87 जागांवर उमेदवार उतरवलेत. महाविकास आघाडीने समाजवादी पार्टी आणि CPI साठी प्रत्येकी दोन जागा सोडल्या आहेत. MVA मध्ये समान जागावाटप होईल असं चित्र सुरूवातीला होतं, मात्र काँग्रेस आणि शिवसेनेत काही जागांवर वाद झाल्याच्या चर्चा सुरू होत्या. मात्र आता हा प्रश्न जवळपास सुटलाय. 

मविआमध्ये समन्वयाचा अभाव?

हे ही वाचा >>Congress Song : यंदा पंजा, यंदा पंजा... काँग्रेसचं प्रचारगीत, नाना पटोले मुख्यमंत्रीपदाचा चेहरा? का होतेय चर्चा?

महाविकास आघाडीत काँग्रेस आणि उद्धव ठाकरेंच्या शिवसेनेत जागावाटपावरुन ज्या प्रकारे रस्सीखेच झाली, ती सर्वश्रूत आहे. मात्र निवडणुका तोंडावर असल्यानं काही गोष्टींवर तडजोड करण्यात आल्याचं दिसतंय. मिरज , सोलापूर दक्षिण, पंढरपूर आणि सांगोला, परंडा, दिग्रस , धारावीमध्ये अजूनही तिढा कायम असल्याचं दिसतंय. या भागात चार जागांवर काँग्रेस आणि शिवसेनेच्या उमेदवारांनी, म्हणजेच एकाच मतदारसंघात दोन्ही पक्षांच्या उमेदवारांनी अर्ज दाखल केले आहेत. धारावी वगळता या सर्व जागा सध्या महायुतीच्या उमेदवारांकडे आहेत. काँग्रेस प्रभारी रमेश चेन्निथला यांनी मैत्रीपूर्ण लढत होणार नाही असं स्पष्ट केलंय. काही जागांवर आमच्या सहकाऱ्यांनी अर्ज भरले असतील, तर ते प्रश्न येत्या काही दिवसांत सोडवले जातील असंही ते म्हणाले आहेत. त्यामुळे आता या जागांवर होणाऱ्या वाटाघाटीवर मविआचं भवितव्य अवलंबून असल्याचं दिसतंय.

महायुतीमध्येही तिढा

सत्ताधारी महायुतीमध्येही मानखुर्द-शिवाजीनगर, पुरंदर, मोर्शी, दिंडोरी, आष्टीमध्ये अजूनही संघर्ष असल्याचं चित्र आहे. मात्र सर्वाधिक चर्चा मानखुर्द-शिवाजीनगरची होतेय, कारण इथून राष्ट्रवादीने माजी मंत्री नवाब मलिक यांना उमेदवारी दिली आहे. तर शिवसेनेनेही आधीच इथे उमेदवार उभा केला आहे. शिंदेंकडून इथे आपल्याला जागा सुटावी असा दबाव टाकत असल्याची चर्चा आहे. तर अजित पवार यांनी भाजपच्या विरोधाला न जुमानता ज्या प्रकारे नवाब मलिक यांना शेवटच्या क्षणी उमेदवारी दिली, त्यावरून ही युती किती दिवस राहील असाही प्रश्न उपस्थित होतोय. 
सपाचे प्रदेशाध्यक्ष अबू आझमी यांनी गेल्या तीन निवडणुकांमध्ये या जागेवर कायम विजय मिळवला आहे. तर तिकडे पुरंदरमध्येही शिवसेना आणि राष्ट्रवादीचे उमेदवार आमनेसामने आहेत. याठिकाणी विजय शिवतारे यांना शिवसेनेचे तिकीट मिळाले असून अजित पवार यांनी संभाजी यांना उमेदवारी दिली आहे.
मात्र, उपमुख्यमंत्री देवेंद्र फडणवीस यांनी येत्या काही दिवसांत या जागांवरुन सुरू असलेले मतभेद दूर होतील असं सांगितलंय. मात्र नवाब मलिक आणि त्यांच्या मुलीबाबत ज्याप्रकारे आशिष शेलार आणि किरीट सौमय्या यांनी उघडपणे नवाब मलिक यांना विरोध केला, त्यावरुन भाजपमध्ये विरोधाची भूमिका असल्याचं दिसतयं. 

हे ही वाचा >>Maharashtra Assembly Election 2024 LIVE : "शिंदे सरकारकडून महाराष्ट्राची लूट" रमेश चेन्नीथला स्पष्टच बोलले!

एकूणच ही सर्व परिस्थिती राज्यात जे चित्र निर्माण होतंय, त्यावरून ना युती ना आघाडी, कुणालाच पूर्ण बहुमत मिळणार नसल्याची शक्यता राजकीय विश्लेषकांकडून व्यक्त केली जातेय. अशा पस्थितीत पुन्हा एकदा घोडेबाजार सुरू होणार असं दिसतंय. त्यामुळे येणाऱ्या काळात पुन्हा अनेक पक्ष फुटतील की काय अशी शक्यता निर्माण झाली आहे. अजित पवार यांच्याबाबत भाजपमध्ये जी अंतर्गत नाराजी आहेत, त्यामुळे ते किती काळ सोबत राहतील असा सवाल उपस्थित केला जातोय. तर दसुरीकडे काँग्रेस आणि उद्धव ठाकरेंच्या शिवसेनेतही समन्वयाचा अभाव असल्याचं दिसतंय. त्यामुळे आता निवडणुकांचे निकाल काय येतात बहे पाहणं महत्वाचं असेल.