लालबागचा राजाच्या मंडपातील कार्यकर्ता ते ठाकरेंचा विश्वासू शिलेदार.. कोण आहेत सुधीर साळवी?

काही दिवसांपूर्वीच नव्या नियुक्त्या या करण्यात आल्या. ज्यामध्ये प्रवक्त्यांच्या नावांची घोषणा करण्यात आली होती. त्यात मुख्य प्रवक्ते म्हणून खासदार संजय राऊत आणि खासदार अरविंद सावंत यांची निवड झालेली. दरम्यान, आता सचिवपदी सुधीर साळवींच्या नियुक्तीची घोषणा करण्यात आली आहे. दरम्यान, या मोठ्या पदावर नियुक्ती करण्यात आल्यामुळे साळवींवर मुंबईतील लालबाग आणि परिसरात शिवसेना (UBT) पक्षाची पाळमुळं घट्ट करण्याची जबाबदारी आली आहे.

हे ही वाचा>> Uddhav Thackeray: "गद्दारांनो 'छावा' बघा..", उद्धव ठाकरेंनी शिंदेंवर डागली तोफ, अबू आझमी, नीलम गोऱ्हेंनाही सुनावलं

2024 विधानसभा निवडणुकीत सुधीर साळवी आणि त्यांचे समर्थक हे शिवडी मतदारसंघातून उमेदवारी मिळावी यासाठी प्रचंड आग्रह होते. मात्र, त्यावेळी उद्धव ठाकरेंनी विद्यमान आमदार अजय चौधरी यांना तिकीट देऊ केलं होतं. ज्यामुळे साळवी यांचे समर्थक नाराज झालेले. मात्र, त्या परिस्थितीत देखील सुधीर साळवींनी आपण पक्षासोबतच असू आणि यापुढे पक्षाचं काम प्रामाणिकपणे करू असं जाहीरपणे म्हटलं. जे त्यांनी निवडणुकीत देखील केलं. कारण या मतदारसंघातून अजय चौधरी हे मोठ्या मताधिक्याने जिंकून आले. या गोष्टीचं फळ म्हणून आता पक्षाच्या सचिवपदी साळवींची नियुक्ती करण्यात आली आहे.

कोण आहेत सुधीर साळवी?

मुंबईतील सुप्रसिद्ध लालबागचा राजा या गणेशोत्सव मंडळाचे ते मानद सचिव आहे. त्यामुळे त्यांचा या परिसरावर चांगलीच पकड असून त्यांचा दबदबा आहे. ते मागील 35 वर्षांपासून लालबागचा राजा सार्वजनिक गणेशोत्सव मंडळात सक्रिय असून अनेक वर्षांपासून त्यांच्यावर मानद सचिव पदाची जबाबदारी आहे.

हे ही वाचा>> हिंदू व्यक्तीवर अंत्यसंस्कार करणाऱ्या पुण्याच्या जावेद खान यांना थेट उद्धव ठाकरेंचा फोन म्हणाले, 'तुम्हाला तर...'

लालबागचा राजा हा मुंबईतील सर्वात प्रसिद्ध गणेशोत्सव मंडळांपैकी एक आहे, जिथे गणेशोत्सवात दरवर्षी कोट्यवधी लोकं दर्शनासाठी येतात. 

राजकीय कारकीर्द

सुधीर साळवी हे शिवसेना (उद्धव बाळासाहेब ठाकरे) पक्षाचे निष्ठावान कार्यकर्ते मानले जातात. शिवसेनेत फूट पडल्यानंतरही सुधीर साळवी यांनी उद्धव ठाकरेंसोबत राहणंच पसंत केलं. एक कट्टर शिवसैनिक अशी त्यांची संपूर्ण लालबाग परिसरात ओळख आहे.

लालबाग परिसर हा शिवडी मतदारसंघात येतो जिथे साळवींचा मोठा प्रभाव आहे. त्यामुळेच त्यांना इथून उमेदवारी देण्यात यावी अशी मागणी कार्यकर्त्यांनी केली होती. मात्र, उद्धव ठाकरेंकडून साळवींना काही काळ धीर धरण्यास सांगण्यात आलं होतं.

शिवडी विधानसभा संघटक आणि दक्षिण मुंबई लोकसभा समन्वयक म्हणून साळवींनी काम पाहिलंय. त्यामुळे आता सचिव पदाची जबाबदारी देत उद्धव ठाकरेंनी त्यांच्यावर अधिक विश्वास व्यक्त केला आहे.

सुधीर साळवी यांच्या सचिवपदी नियुक्तीवर पक्षातील कार्यकर्त्यांनी आनंद व्यक्त केला आहे. सोशल मीडियावरही अनेकांनी त्यांचे अभिनंदन केले आहे. एका कार्यकर्त्याने X वर लिहिले, "निष्ठेचं फळ... सुधीर साळवी यांची सचिवपदी नियुक्ती जाहीर. अभिनंदन सुधीरभाऊ!"

उद्धव ठाकरेंचे विश्वासू शिलेदार...

दुसरीकडे, काही राजकीय विश्लेषकांचे मत आहे की, साळवी यांना उमेदवारी नाकारल्यानंतर त्यांच्या समर्थकांमध्ये नाराजी होती. ही नाराजी दूर करण्यासाठी उद्धव ठाकरे यांनी हा निर्णय घेतला.

सुधीर साळवी यांची शिवसेना (उद्धव बाळासाहेब ठाकरे) पक्षाच्या सचिवपदी नियुक्ती ही त्यांच्या पक्षनिष्ठेची आणि सामाजिक कार्याची पावती आहे. लालबागचा राजा मंडळाच्या माध्यमातून त्यांनी मुंबईतील सामाजिक कार्यात मोलाचे योगदान दिले आहे, तर शिवसेनेतही त्यांनी आपली निष्ठा सिद्ध केली आहे. आता सचिवपदी त्यांच्यासमोर पक्षसंघटना मजबूत करण्याची आणि उद्धव ठाकरे यांच्या नेतृत्वाखाली पक्षाला पुढे नेण्याची मोठी जबाबदारी त्यांच्यावर आहे.