'सदा सरवणकरांचा माज उतरवायचा होता, तो माज आज उतरवला', ठाकरेंच्या आमदाराची थेट टीका

सावंतवाडीमधील आपल्या मूळ गावी यात्रेला गेलेले असताना महेश सावंत यांनी पत्रकारांशी संवाद साधला. यावेळी त्यांनी सदा सरवणकरांवर जोरदार टीका केली.

आमदार महेश सावंत नेमकं काय म्हणाले? 

'गद्दारीचा शाप शिवसैनिकांनी आणि महाविकास आघाडीच्या कार्यकर्त्यांनी पुसून टाकला.' असे मत नवनिर्वाचित आमदार महेश सावंत यांनी व्यक्त केले. तसेच कोकणची जबाबदारी उद्धव ठाकरेंनी दिली तर स्वीकारेनच, नाही दिली तरीही इथल्या शिवसैनिकांना ताकद देईन. असा विश्वास महेश सावंत यांनी व्यक्त केला.

हे ही वाचा>> Bhaskar Jadhav : विरोधी पक्षाच्या आमदारांकडून शपथविधीवर बहिष्कार! भास्कर जाधवांनी सांगितलं खरं कारण

आमदार महेश सावंत म्हणाले, 'गावात घोडेमुखाचं दर्शन घेण्यासाठी आलो होतो. देवावर माझी श्रद्धा असून आजवर कधीही यात्रा चुकवली नाही. उद्या आदित्य ठाकरे यांच्यासह बैठक आहे. त्यानंतर आमदारांच्या शपथविधीविषयी निर्णय होईल.' 

'बाळासाहेब ठाकरेंनी ज्या दगडाला शेंदूर फासला त्या ३० वर्ष राजकारणात असलेल्या सदा सरवणकर यांचा माज उतरवायचा होता. तो माज आज उतरवला. त्यांच्या मुलाविरोधात देखील मी अपक्ष लढत दिली होती. मात्र, काहीशा मतांनी पराभव झाला. आज सगळा हिशोब चुकता झाला.'

'माझ्यावर गणेश चतुर्थीत गोळीबार करण्याचा प्रयत्न देखील सरवणकर यांनी केला होता. माहिमला शिवसेनेचा भगवा फडकणार हे बाळासाहेबांना दिलेलं वचन पूर्ण करता आलं. गद्दारीचा शाप शिवसैनिकांनी, महाविकास आघाडीच्या कार्यकर्त्यांनी पुसून टाकला. तर राज ठाकरेंचं आव्हान आमच्यासमोर नव्हतं.' अशी खोचक टीकाही आमदार सावंत यांनी केली.

हे ही वाचा>> 'गृहमंत्री भाजपचाच...' CM फडणवीसांनी शिंदेंचा 'तो' विषय एका मिनिटातच संपवला!

'आगामी महापालिकांसाठी आम्ही तयारी सुरू केली आहे. आमचे सर्वाधिक नगरसेवक निवडून आणण्यासाठी बांधणी सुरू केली आहे. महानगरपालिकेत शिवसेना स्वतंत्र होती. महाविकास आघाडी हा वरच्या स्तरावरचा विषय आहे. असंख्य कार्यकर्ते स्थानिक पातळीवर काम करत असतात. त्यांना प्रतिनिधित्व मिळाव अशी इच्छा असते. त्यामुळे आघाडी झाली नाही तर स्वबळावर लढू, महानगरपालिकेत यश मिळवणं हे महाराष्ट्रात यश मिळवण्यासारख असेल.' असं मतही त्यांनी व्यक्त केले. 

'सिंधुदुर्गात उद्धव ठाकरे यांनी जबाबदारी दिली तर स्वीकारेन अन्  नाही दिली तरीही येथील शिवसैनिकांना ताकद देईन.' असा विश्वास आमदार महेश सावंत यांनी व्यक्त केला. 

यावेळी माजी आमदार राजन तेली, विधानसभा प्रमुख रूपेश राऊळ, तालुकाप्रमुख मायकल डिसोझा, उपजिल्हा प्रमुख चंद्रकांत कासार, शब्बीर मणियार, शैलैश गवंडळकर, शिवदत्त घोगळे, मेघश्याम काजरेकर, बाळू माळकर, राजू शेटकर, श्रृतीका दळवी, आशिष सुभेदार, राजा वाडकर, निशांत तोरसकर, सोनू दळवी आदी शिवसैनिक उपस्थित होते.