कराडच्या Encounter चा दावा, EVM मशीन आणि मुंडेंवर खळबळजनक आरोप करणारा पोलीस रणजीत कासलेची A to Z माहिती
मुख्यमंत्री फडणवीस, धनंजय मुंडे यांच्याविरोधात गंभीर आरोप करणारा निलंबित पोलीस अधिकारी रणजीत कासले याला आता बीड पोलिसांनी अटक केली आहे. जाणून घ्या त्याच्याविषयी सविस्तर.
ADVERTISEMENT
पुणे: माजी मंत्री धनंजय मुंडे आणि मुख्यमंत्री देवेंद्र फडणवीस यांच्यावर गंभीर आरोप करून खळबळ उडवून देणाऱ्या निलंबित पोलीस अधिकारी रणजीत कासलेला आज (18 एप्रिल) अटक करण्यात आली आहे. पहाटे पुण्यातील स्वारगेट परिसरातील एका हॉटेलमधून बीड पोलिसांनी त्याला अटक केली आहे. त्याच्या अटकेमुळे बीडमधील राजकीय वातावरण पुन्हा तापले आहे.
नेमकं प्रकरण काय?
रणजीत कासले हा बीड पोलीस दलाच्या सायबर गुन्हे शाखेतील निलंबित पोलीस उपनिरीक्षक आहे. तो गेल्या काही महिन्यांपासून आपल्या सोशल मीडिया पोस्ट्स आणि व्हिडिओद्वारे सातत्याने धक्कादायक खुलासे करत होता.
वाल्मिक कराडच्या एन्काऊंटरचा दावा
कासले याने दावा केला होता की, संतोष देशमुख हत्या प्रकरणातील मुख्य आरोपी वाल्मिक कराड याच्या एन्काऊंटरसाठी त्याला 10 कोटी रुपयांची ऑफर देण्यात आली होती. त्याने ही ऑफर धनंजय मुंडे यांच्याशी जोडली होती. कराड हा मुंडे यांचा निकटवर्तीय असल्याचा आरोपही त्याने केला होता.
विधानसभा निवडणूक आणि पैसे
कासले याने असा खळबळजनक दावा केला की, 2024 च्या विधानसभा निवडणुकीदरम्यान त्याच्या बँक खात्यात 10 लाख रुपये जमा करण्यात आले होते. हे पैसे त्याला EVM मशीन असलेल्या स्ट्राँग रूमपासून दूर राहण्यासाठी देण्यात आले होते. यापैकी साडेसात लाख रुपये त्याने परत केल्याचेही तो म्हणाला होता. त्याने धनंजय मुंडे यांच्यावर निवडणुकीत गैरप्रकार केल्याचा आरोप केला आहे.
कासले याने एका व्हिडिओमध्ये जातीय वक्तव्य केल्याचा आरोप आहे, ज्यामुळे विशिष्ट समाजाच्या भावना दुखावल्या गेल्या. याप्रकरणी शिवाजीनगर पोलीस ठाण्यात त्याच्याविरुद्ध गुन्हा दाखल झाला होता.
कासले याने बीड पोलिस आणि राज्य सरकारवर गंभीर आरोप केले होते. त्याने दावा केला होता की, त्याच्याविरुद्ध खोटे गुन्हे दाखल केले जात आहेत आणि त्याचा बळी घेतला जाणार आहे.
कासलेला करण्यात आली अटक
17 एप्रिल 2025 रोजी रात्री कासले दिल्लीहून पुणे विमानतळावर दाखल झाला. तिथे त्याने माध्यमांशी संवाद साधताना पुन्हा एकदा धनंजय मुंडे यांच्यावर गंभीर आरोप केले. त्याने पुणे पोलिसांना विनंती केली होती की, त्याला संरक्षण देऊन बीड पोलिसांच्या स्वाधीन करावे. मात्र, 18 एप्रिल रोजी पहाटे बीड पोलिसांनी स्वारगेट परिसरातील एका हॉटेलमधून त्याला ताब्यात घेत अटक केली.
अटकेनंतर सोशल मीडियावर सीसीटीव्ही फुटेज व्हायरल झाले, ज्यामध्ये पोलीस कासले याला हॉटेलमधून बाहेर घेऊन जाताना दिसत आहेत.
कासले याने अटकेपूर्वी एक व्हिडिओ शेअर केला होता, ज्यामध्ये त्याने म्हटले होते, “सिस्टमविरुद्ध फार लढता येत नाही. माझ्याविरुद्ध गुन्हे दाखल होत आहेत, माझाच बळी जाणार आहे. पण मी अटकेनंतरही माझी लढाई लढेन आणि आरोप सिद्ध करेन.”
जातीय वक्तव्य: बीडमधील एका वकिलाने कासले याच्या जातीय वक्तव्याविरुद्ध तक्रार दाखल केली होती, ज्यामुळे शिवाजीनगर पोलिस ठाण्यात गुन्हा दाखल झाला. तसेच त्याने विधानसभा निवडणुकीत पैसे घेतल्याचा आणि गैरप्रकार केल्याचा दावा केला, ज्यामुळे पोलिसांनी त्याच्या दाव्यांची चौकशी सुरू केली.
निलंबन आणि आधीचे आरोप
कासले याला मार्च 2025 मध्ये निलंबित करण्यात आले होते. त्याच्यावर परराज्यात तपासासाठी परवानगी न घेता गेल्याचा आणि आरोपींकडून पैसे घेतल्याचा आरोप होता. कासले याने सातत्याने सोशल मीडियावर व्हिडिओ शेअर करून पोलिस आणि राजकीय नेत्यांवर आरोप केले आहेत.
दरम्यान, सामाजिक कार्यकर्त्या अंजली दमानिया यांनी कासले याच्या खुलाशांवर प्रतिक्रिया देत या प्रकरणाची सखोल चौकशी व्हावी, अशी मागणी केली आहे. कासले याच्या अटकेनंतर सोशल मीडियावर त्याच्या समर्थकांनी आणि विरोधकांनी परस्परविरोधी प्रतिक्रिया व्यक्त केल्या. काहींनी त्याला “सत्य उघड करणारा” म्हटले, तर काहींनी त्याच्या दाव्यांना “बनावट” आणि “व्हायरल होण्याची स्टंटबाजी” असे संबोधले आहे.
पोलिसांची भूमिका
बीड पोलिस अधीक्षक नवनीत काँवत यांनी सांगितले की, कासले याच्याविरुद्ध दाखल गुन्ह्यांप्रकरणी चौकशी सुरू आहे. त्याच्या कुटुंबीयांशीही चौकशी करण्यात आली आहे. कासले याने केलेल्या आरोपांची सत्यता तपासण्यासाठी पोलिसांनी विशेष पथक नेमले आहे. विशेषतः त्याच्या बँक खात्यातील व्यवहार आणि निवडणूक गैरप्रकारांच्या दाव्यांचा तपास केला जात आहे.
कासले याला अटक झाल्यानंतर त्याला बीड पोलिसांच्या ताब्यात देण्यात आले आहे. त्याच्यावर पुढील कायदेशीर कारवाई सुरू आहे.
हे वाचलं का?
