Dharavi: ‘विकासाला विरोध नाही तर अदानींना…’, ठाकरे गट अदानींच्या कार्यालयावर धडकणार

‘शनिवारी काढण्यात येणारा मोर्चा मोठा असेल, त्यात दीड ते दोन लाख लोक सहभागी होतील, असा दावा त्यांनी केला. धारावीतील प्रत्येक घरातील लोकांना मोर्चात सहभागी करून घेणार आहोत. पोलिसांनी परवानगी द्या किंवा देऊ नका, मोर्चा सुरूच राहणार आहे. आमचे अनेक नेते मोर्चाला संबोधित करणार आहेत. मोर्चामुळे कायदा व सुव्यवस्थेचा प्रश्न निर्माण होऊ नये यासाठी आमचे प्रयत्न असतील.’ असंही ते यावेळी म्हणाले.

हे ही वाचा>> पाकिस्तानातून परतलेली अंजू गरोदर.. होणार नसरुल्लाहच्या मुलाची आई?, पाहा काय म्हणाली!

आमचा मोर्चा धारावीच्या पुनर्विकासाच्या विरोधात नाही, तर धारावी पुनर्विकासाच्या नावाखाली अदानींना फायदा करून देण्याच्या सरकारच्या इराद्याविरोधात असल्याचे ठाकरे गटाने म्हटले आहे. दरम्यान, धारावी पुनर्विकास समिती आणि धारावी बचाव समितीने शुक्रवारी स्वतंत्र पत्रकार परिषद घेऊन एकमेकांवर जोरदार आरोप केले.

काय आहे संपूर्ण प्रकरण

धारावी बचाव समितीचे म्हणणे आहे की, उद्धव ठाकरे यांच्या कार्यकाळात धारावीतील लोकांना 400 चौरस फुटांची घरे देण्याचा प्रस्ताव आला होता. मात्र त्यावेळी विकासकांना एसआरएकडून अदानीला जेवढी सवलत दिली जात होती तेवढी मिळत नव्हती, त्यामुळे आता धारावीतील लोकांना 500 चौरस फुटांचे घर मिळाले पाहिजे. धारावीचा पुनर्विकास अदानी किंवा कोणत्याही खासगी विकासकाने न करता सरकारी संस्थेने म्हाडाने करावा, अशीही धारावी बचाव समितीची मागणी आहे.

धारावीत ज्यांचे व्यवसाय आहेत त्यांना तेथे व्यवसायासाठी जागा उपलब्ध करून द्यावी. शतकानुशतके चालत आलेल्या धारावीतील कुंभारवाडा व इतर व्यवसायांचे तेथे पुनर्वसन झाले पाहिजे. धारावीचे पुन्हा सर्वेक्षण करून त्या आधारे लोकांना घरे देण्यात यावीत.

काय म्हणाली धारावी पुनर्विकास समिती?

वर्षांनुवर्षे रखडलेला धारावीचा पुनर्विकास रोखण्याचे काम उद्धव ठाकरे आणि धारावीच्या आमदार काँग्रेस नेत्या वर्षा गायकवाड करत असल्याचा आरोप धारावी पुनर्विकास समितीने केला आहे. पत्रकार परिषदेत धारावी पुनर्विकास समितीचे कोषाध्यक्ष मनोहर रायबागे म्हणाले की, धारावी पुनर्विकासाविरोधात उद्याचा मोर्चा हा धारावीतील नागरिकांचा नसून धारावीच्या विकासाला विरोध करणाऱ्यांचा आहे.

हे ही वाचा>> Thane: MSRDC च्या संचालकाच्या मुलाचं भयंकर कृत्य, गर्लफ्रेंडला कारने चिरडल्याचा आरोप

दरम्यान धारावी पुनर्विकास समितीचे अध्यक्ष आणि भाजप नेते रमाकांत गुप्ता म्हणाले की, धारावीचा पुनर्विकास हे बाळासाहेब ठाकरे यांचे स्वप्न होते. त्यांनी तत्कालीन मुख्यमंत्री मनोहर जोशी यांना योजना करायला सांगितली आणि एसआरए योजनेचा जन्म झाला. इतकी सरकारे आली आणि गेली, पण धारावीचा विचार कोणीच केला नाही. धारावीच्या पुनर्विकासाला 500 चौरस फुटांची मागणी करून विरोध करणाऱ्या उद्धव ठाकरेंनी मुख्यमंत्री असताना धारावीतील जनतेला 500 चौरस फुटांची घरे का दिली नाहीत? असा सवालही त्यांनी यावेळी केला.